{ முகநூல் கருத்துக்கள்}{ட்விட்டர் கருத்துக்கள்}

காபாவை சுற்றி கட்டபட்டிருக்கும் துணிக்கு - கிஸ்வா என்று பெயர். இது ஒவ்வொரு வருடமும் துல்ஹஜ் பிறை ஒன்பதில் மாற்றப்படுவது வழக்கம். அதன்படி நேற்று புதிய கிஸ்வா கொண்டு காபா மறைக்கப்பட்டது. ஹஜ்ஜு கடமைகளை முடித்துவிட்டு மீண்டும் ஹரம் ஷரீபிற்கு யாத்ரிகர்கள் வரும்போது புதிய கிஸ்வா காட்சிதரும்.

கருப்பு கிஸ்வா துணி 670 கிலோ எடையுள்ள சுத்தமான பட்டு கொண்டு தயாரிக்கப்படுகிறது. மேலும் குரான் ஆயத்துகளை எழுத 150 கிலோ எடையுள்ள தங்கம் மற்றும் வெள்ளி நூல்கள் பயன்படுத்தப்படுகின்றன. ஒன்றாக இணைப்பதற்கு முன் 47 அங்கங்களாக கிஸ்வா துணி இருக்கும். ஒவ்வொரு துணியும் 14 மீட்டர் நீளமும், 95 சென்டிமீட்டர் அகலம் கொண்டதாகவும் இருக்கும். இணைத்தப்பின் கிஸ்வா துணி 658 சதுர மீட்டர் அளவு இருக்கும். கிஸ்வா துணியை தயாரிக்க ஆகும் செலவு - சுமார் 20 கோடி ரூபாயாகும்.



புதிய கிஸ்வா மாற்றப்படும் போது பழைய கிஸ்வா - கீழ்வழியாக உருவப்படும். பழைய கிஸ்வா துண்டு துண்டாக வெட்டப்பட்டு முக்கியஸ்தர்களுக்கும், பிற நாடுகளுக்கும் சவுதி அரசின் அன்பளிப்பாக வழங்கப்படும்.

கிஸ்வா தயாரிப்பதற்கு என்றே தொழிற்சாலை ஒன்று மக்கா அருகில் 1927 ஆம் ஆண்டு முதல் இயங்கி வருகிறது. அக்காலங்களில் இங்கு பணிபுரிந்த கைத்தறி வல்லுனர்கள் பலர் இந்தியாவிலிருந்து சென்றவர்கள் என்பது குறிப்பிடத்தக்கது.

புகைப்படம்:
www.arabnews.com