{ முகநூல் கருத்துக்கள்}{ட்விட்டர் கருத்துக்கள்}

இயற்கை விஞ்ஞானி கோ.நம்மாழ்வார் நேற்றிரவு (டிசம்பர் 30) 10.30 மணியளவில் காலமானார். அவருக்கு வயது 75. அவரின் மறைவுக்கு தமிழக முதல்வர் ஜெ. ஜெயலலிதா இரங்கல் தெரிவித்துள்ளார். இது குறித்து வெளியிடப்பட்டுள்ள செய்திக்குறிப்பு வருமாறு:

தமிழ்நாட்டைச் சேர்ந்த பிரபல இயற்கை வேளாண் விஞ்ஞானி திரு. நம்மாழ்வார் அவர்கள் திடீர் மூச்சுத் திணறல் ஏற்பட்டதன் காரணமாக 30.12.2013 அன்று இயற்கை எய்தினார் என்ற செய்தியறிந்து ஆற்றொணாத் துயரமும், மிகுந்த மன வேதனையும் அடைந்தேன்.

வேளாண் துறையில் பணிபுரிந்து வந்த திரு. நம்மாழ்வார் அவர்கள், ரசாயன உரங்கள் பயன்படுத்தப்பட வேண்டும் என்ற மத்திய அரசின் கொள்கைக்கு எதிர்ப்பு தெரிவித்து அரசுப் பணியையே துறந்தவர். இதனைத் தொடர்ந்து, கரூர் மாவட்டம், கடவூர் ஒன்றியத்திற்குட்பட்ட சுருமாரன்பட்டி என்ற இடத்தில் 35 ஏக்கர் நிலத்தை வாங்கி, “வானகம்” என்ற அமைப்பை அங்கு ஏற்படுத்தி, தனது கடுமையான உழைப்பின் காரணமாக “இங்கு விளையாத பயிரும் உண்டோ” என்று மற்றவர் கேட்கும் அளவுக்கு அந்த இடத்தில் பசுமையான சூழ்நிலையை உருவாக்கிய பெருமை இயற்கை விஞ்ஞானி திரு. நம்மாழ்வார் அவர்களையே சாரும். இயற்கை விவசாயத்தை ஊக்குவிப்பதற்காக தன் வாழ்நாளையே அர்ப்பணித்தவர் திரு. நம்மாழ்வார் அவர்கள். எந்தச் சூழலிலும் அலோபதி மருந்துகளை உண்ணக்கூடாது என்பதில் உறுதியாக இருந்தவர் திரு. நம்மாழ்வார் அவர்கள்.

இயற்கையை காக்க இடிமுரசு போல் முழங்கிக் கொண்டிருந்த இயற்கை விஞ்ஞானி நம்மாழ்வார் அவர்கள் இயற்கை எய்தியது ஈடுசெய்ய முடியாத இழப்பு ஆகும். இவருடைய இடத்தை இனி யாராலும் நிரப்ப முடியாது. திரு. நம்மாழ்வார் அவர்களை இழந்து வாடும் அவரது குடும்பத்தினருக்கும், அவரது தொண்டர்களுக்கும், நண்பர்களுக்கும், இயற்கை ஆர்வலர்களுக்கும் எனது ஆழ்ந்த இரங்கலையும், அனுதாபத்தினையும் தெரிவித்துக் கொள்வதோடு, அன்னாரது ஆன்மா இறைவன் திருவடி நிழலில் இளைப்பாற எல்லாம் வல்ல இறைவனை இறைஞ்சுகிறேன்.

ஜெ ஜெயலலிதா
தமிழ்நாடு முதலமைச்சர்

இவ்வாறு அவ்வறிக்கையில் தெரிவிக்கப்பட்டுள்ளது.