{ முகநூல் கருத்துக்கள்}{ட்விட்டர் கருத்துக்கள்}

வி-யுனைட்டெட் ஸ்போர்ட்ஸ் க்ளப் நடத்தும் - ப்ளாஸம் கோப்பைக்கான 6ஆம் ஆண்டு காயல் ப்ரீமியர் லீக் கால்பந்து சுற்றுப்போட்டி இம்மாதம் 03ஆம் நாளன்று துவங்கியுள்ளது.

பிரிவுக்கு 6 அணிகள் வீதம் 12 அணிகளும் 2 பிரிவுகளாகப் பிரிக்கப்பட்டுள்ளன. போட்டிகள் அனைத்தும் காயல்பட்டினம் ஐக்கிய விளையாட்டு சங்க மைதானத்தில் நடைபெற்று வருகின்றன.

லீக் சுற்று முடிவுகள்:

லீக் சுற்றுகளின் முடிவில் அதிக புள்ளிகளைப் பெற்ற Blossoms மற்றும் Bongkok Ball Busters அணிகள் நேரடியாக அரையிறுதிக்குத் தகுதி பெற்றிருந்தன. இரண்டு பிரிவுகளிலும் இரண்டாம் மற்றும் மூன்றாம் இடங்களை பிடித்திருந்த அணிகள் காலிறுதிப் போட்டியில் பங்கேற்றன. அப்போட்டிகளில், New York Rangers மற்றும் PHM அணிகள் வெற்றிபெற்று அரையிறுதிப் போட்டிகளில் விளையாடத் தகுதிபெற்றன.

அரையிறுதிப் போட்டி முடிவுகள்:

நேற்று (ஜூன் 16இல்) நடைபெற்ற முதலாவது அரையிறுதிப் போட்டியில், PHM அணியும், Blossoms அணியும் மோதின. போட்டி சமனில் முடிவுற்றதால், சமனுடைப்பு முறையில் PHM அணி வெற்றிபெற்றது.

தொடர்ந்து நடைபெற்ற இரண்டாவது அரையிறுதிப் போட்டியில் Bangkok Ball Busters அணியும், New York Rangers அணியும் மோதின. இப்போட்டியும் சமனில் முடிவுற்றதால், சமனுடைப்பில் Bangkok Ball Busters அணி வெற்றிபெற்றது.

இன்று இறுதிப்போட்டி:

இன்று (ஜூன் 17) 17.00 மணிக்கு நடைபெறும் இறுதிப்போட்டியில், PHM அணியும், Bangkok Ball Busters அணியும் மோதுகின்றன. போட்டி நிறைவுற்றதும் பரிசளிப்பு விழா நடைபெறவுள்ளது.

சிறப்பு விருந்தினர்கள்:

இறுதிப்போட்டியில், வேலூர் பாராளுமன்றத் தொகுதி முன்னாள் உறுப்பினர் எம்.அப்துல் ரஹ்மான், இராமநாதபுரம் சட்டமன்றத் தொகுதி உறுப்பினர் பேராசிரியர் எம்.எச்.ஜவாஹிருல்லாஹ் ஆகியோர் சிறப்பு விருந்தினர்களாகக் கலந்துகொண்டு, வாழ்த்துரைகள் வழங்குவதோடு, வெற்றி பெறும் மற்றும் சிறப்பிடங்களைப் பெறும் அணிகளுக்கு பரிசுகளையும் வழங்கவுள்ளனர்.

பரிசு வகைகள்:

இறுதிப்போட்டியில் வெற்றிபெறும் அணிக்கு ரூபாய் 15 ஆயிரம் பணப்பரிசு, சென்னை தி.நகர் எல்.கே.எஸ். கோல்டு ஹவுஸ் நிறுவனத்தின் சார்பிலும், இரண்டாமிடம் பெறும் அணிக்கு ரூபாய் 10 ஆயிரம் பணப்பரிசு V-United Exports நிறுவனத்தின் சார்பிலும் வழங்கப்படவுள்ளது.

அரையிறுதி வரை முன்னேறிய அணிகளுக்கு தலா ரூபாய் 3 ஆயிரம் பணப்பரிசு Blossoms நிறுவனத்தின் சார்பிலும், காலிறுதிப் போட்டி வரை முன்னேறிய அணிகளுக்கு தலா ரூபாய் 2 ஆயிரம் பணப்பரிசு V.M.S.Jewellers நிறுவனத்தின் சார்பிலும் வழங்கப்படவுள்ளது.

முதலிடம், இரண்டாமிடம் பெறும் அணிகள், அரையிறுதி வரை முன்னேறிய அணிகளின் வீரர்களுக்கான தனிப்பரிசுகளை, Blossoms, மாஷாஅல்லாஹ் தாவூத் ரியல் எஸ்டேட், Pure Silver நிறுவனத்தினர் வழங்கவுள்ளனர்.

தகவல் & படங்கள்:
M.ஜஹாங்கீர்

வி-யுனைட்டெட் ஸ்போர்ட்ஸ் க்ளப் தொடர்பான முந்தைய செய்தியைக் காண இங்கே சொடுக்குக!