காயல்பட்டினம் சதுக்கைத் தெரு, அர்ரஹீம் மீலாது குழுவின் சார்பில், நபிகள் நாயகம் அவர்களின் பிறந்த நாள் விழா, அர்ரஹீம் மீலாதுர்ரஸூல் குழுவின் 28ஆம் ஆண்டு துவக்க விழா, மக்தப் முஹ்யித்தீன் மத்ரஸாவின் 3ஆம் ஆண்டு துவக்க விழா ஆகிய முப்பெரும் விழாக்கள், இம்மாதம் 09ஆம் நாள் திங்கட்கிழமையன்று நடைபெற்றது.

அன்று 06.15 மணிக்கு, ஜன்னத்துல் காதிரிய்யா பெண்கள் தைக்காவில், முஹ்யித்தீன் பள்ளியின் இமாம் நஹ்வீ எம்.எம்.முத்துவாப்பா தலைமையில் கத்முல் குர்ஆன் மஜ்லிஸும், 09.30 மணிக்கு, பெரிய குத்பா பள்ளியின் இமாம் ஹாஃபிழ் எஸ்.கே.ஏ.நத்ஹர் ஸாஹிப் தலைமையில் மவ்லித் மஜ்லிஸும் நடைபெற்றன.

16.30 மணிக்கு, மவ்லவீ எஸ்.எஸ்.இ.காழி அலாவுத்தீன் தலைமையில் மீலாது விழா பேரணியும், மக்தப் மாணவர்களின் தஃப்ஸ் நிகழ்ச்சியும் நடைபெற்றன.



மஃரிப் தொழுகைக்குப் பின் 18.50 மணிக்கு, காதிரிய்யா கொடிமர சிறுநெய்னார் பள்ளியின் இமாம் மவ்லவீ எம்.இசட்.முஹம்மத் அப்துல் காதிர் மஸ்லஹீ தலைமையில் காதிரிய்யா திக்ர் மஜ்லிஸ் நடைபெற்றது.

இஷா தொழுகைக்குப் பின் 20.15 மணியளவில், பிரபு எஸ்.எம்.ஜெப்ரூத் மவ்லானா கிராஅத் ஓத, பெரிய குத்பா பள்ளியின் கத்தீபும் - முஅஸ்கர் மகளிர் அரபிக்கல்லூரிகளின் நிறுவனருமான மவ்லவீ ஹாஃபிழ் எச்.ஏ.அஹ்மத் அப்துல் காதிர் மஹ்ழரீ சன்மார்க்க சொற்பொழிவாற்றினார்.





ஆசிரியர் இசட்.ஏ.ஷெய்கு அப்துல் காதிர் நன்றி கூற, மவ்லவீ எம்.கே.ஹபீப் முஹம்மத் ஃகைரீ துஆவுடன் விழா நிகழ்ச்சிகள் நிறைவுற்றன. நஹ்வீ எம்.எம்.முத்துவாப்பா நிகழ்ச்சிகளை நெறிப்படுத்தினார்.

விழா நிகழ்ச்சிகளில், நகரின் பல பகுதிகளைச் சேர்ந்தோர் கலந்துகொண்டனர். நிறைவில் அனைவருக்கும் தபர்ருக் எனும் நேர்ச்சை வழங்கப்பட்டது. நிகழ்ச்சி ஏற்பாடுகளை, அர்ரஹீம் மீலாதுர்ரஸூல் குழுவினர் செய்திருந்தனர்.

தகவல் & படங்கள்:
JMAR காதிரீ

அர்ரஹீம் மீலாதுர்ரஸூல் குழுவின் சார்பில் கடந்தாண்டு (ஹிஜ்ரீ 1435) நடத்தப்பட்ட இருபெரும் விழா குறித்த செய்தியைக் காண இங்கே சொடுக்குக!