காயல்பட்டினம் முத்துவாப்பா தைக்கா தெருவில் அமைந்துள்ளது மஹான் அஸ்ஸெய்யித் அஹ்மத் ஸாஹிப் பெரிய முத்துவாப்பா வலிய்யுல்லாஹ் அவர்களின் அடக்கஸ்தலம்.





ஆண்டுதோறும் முஹர்ரம் முதல் நாள் முதல் 14ஆம் நாள் வரை இம்மஹான் அவர்களின் நினைவு நாள் நிகழ்ச்சிகள் நடத்தப்படுவது வழமை.

அன்னாரின் 144ஆவது ஆண்டு நினைவு நாள் நிகழ்ச்சி 15.10.2015 அன்று துவங்கி, 27.10.2015 அன்று நிறைவுற்றது.



அந்நாட்களில் தினமும் அதிகாலையில் கத்முல் குர்ஆன் ஓதி மஹான் அவர்களின் பெயரில் ஈஸால் தவாப் செய்யப்பட்டது.

நிறைவு நாள் நிகழ்ச்சிகள் முஹர்ரம் 13, 14ஆம் நாட்களில் நடைபெற்றது. முஹர்ரம் 13ஆம் நாளான 26.10.2015 திங்கட்கிழமையன்று 16.30 மணியளவில், இமாம் ஹஸன் - ஹுஸைன் ரழியல்லாஹு அன்ஹுமா மீதான மவ்லித் மஜ்லிஸும், 19.00 மணியளவில் ராத்திபத்துல் காதிரிய்யா திக்ர் மஜ்லிஸும் நடைபெற்றன.

திக்ர் மஜ்லிஸைத் தொடர்ந்து, இமாம் ஹஸன் - ஹுஸைன் ரழியல்லாஹு அன்ஹுமா நினைவு சொற்பொழிவு நிகழ்ச்சி நடைபெற்றது. மவ்லவீ ஹாஃபிழ் எம்.ஏ.ஹபீபுர்ரஹ்மான் மஹ்ழரீ இந்த சொற்பொழிவை நிகழ்த்தினார். துஆவுடன் நிகழ்ச்சி நிறைவுற்றது.

முஹர்ரம் 14ஆம் நாளான 27.10.2015 செவ்வாய்க்கிழமையன்று 16.30 மணியளவில், மஹான் பெரிய முத்துவாப்பா வலிய்யுல்லாஹ் அவர்கள் மீதான மவ்லித் மஜ்லிஸ் நடைபெற்றது. 19.00 மணியளவில் ராத்திபத்துல் அஹ்மதிய்யா திக்ர் மஜ்லிஸ் நடைபெற்றது.



மாணவர் எம்.எஸ்.முஹம்மத் நூஹ் கிராஅத் ஓத. மஹான் பெரிய முத்துவாப்பா வலிய்யுல்லாஹ், பூவாறு நூஹ் வலிய்யுல்லாஹ் ஆகியோரின் வாழ்க்கை வரலாற்று சுருக்க உரையை, ஐக்கிய சமாதானப் பேரவை தலைவர் மவ்லவீ ஹாஃபிழ் என்.ஹாமித் பக்ரீ மன்பஈ நிகழ்த்தினார்.





கம்பல்பக்ஷ் எஸ்.எச்.மொகுதூம் முஹம்மத் நன்றி கூற, காயல்பட்டினம் மஸ்ஜிதுல் ஆமிர் - மரைக்கார் பள்ளியின் இமாம் டீ.எம்.கே.முத்து செய்யித் அஹ்மத் துஆ இறைஞ்ச, அத்துடன் நிகழ்ச்சிகள் நிறைவுற்றன.



இந்நிகழ்ச்சியின் நிறைவில் அனைவருக்கும் நேர்ச்சை வழங்கப்பட்டது. நிகழ்ச்சிகள் அனைத்திலும் நகரின் பல்வேறு பகுதிகளிலிருந்தும் பொதுமக்கள் திரளாகக் கலந்துகொண்டனர். பெண்களுக்கு தனி இடவசதி செய்யப்பட்டிருந்தது.







அனைத்து நிகழ்ச்சிகளுக்கான ஏற்பாடுகளையும், மஹான் பெரிய முத்துவாப்பா வலிய்யுல்லாஹ் கந்தூரி கமிட்டி தலைவர் டீ.எம்.கே.ஷெய்கு அப்துல்லாஹ் பேஷ்இமாம், செயலாளர் கம்பல்பக்ஷ் எஸ்.எச்.பாக்கர் ஸாஹிப், துணைச் செயலாளர் எஸ்.ஐ.அஹ்மத் முஸ்தஃபா ஆகியோர் ஒருங்கிணைப்பில் குழுவினர் செய்திருந்தனர்.

பெரிய முத்துவாப்பா வலிய்யுல்லாஹ் அவர்களின் 143ஆவது நினைவு நாள் கந்தூரி குறித்த செய்தியைக் காண இங்கே சொடுக்குக!