IP: 163.*.*.* Japan

மனித நேய மக்கள் கட்சி தேர்தல் ஆணையத்தில் தங்களை ஒரு அரசியல் கட்சியாக பதிவு செய்து சுமார் எட்டு ஆண்டுகள் கூட நிறையவில்லை. அதற்கிடையில் தலைவர் செயலாளர் சக்களத்தி சண்டை ஆரம்பித்து நீதி மன்றம் வரை சென்று இன்று தீர்ப்பு வந்துள்ளது.

தமீமுல் அன்சாரியா ஜவாஹிருல்லாவா என்பது அல்ல இங்கு பிரச்சினை நீயா நானா என்ற நிகழ்ச்சிக்கு ஒரு நொறுக்கு தீனி இது.

அது நபி தோழர் உமர் ரலியல்லாஹ் அன்ஹு அவர்கள் ஆட்சி காலம் என்று நினைக்கிறேன் . போர்ப்படை தளபதியாக காலித் இப்னு வலீத் தலைமை ஏற்று செல்கிறார்கள். காலித் இப்னு வலீத் தலைமை தாங்கினால் வெற்றி நிச்சயம் என்று மக்களிடையே ஒரு கருத்து நிலவியது. உண்மையும் அதுதான். ஆனால் அல்லாஹ் நாடியவர்களுக்கு வெற்றியை கொடுக்கிறான் அவன் நாடியவர்களுக்கு தோல்வியை அளிக்கிறான் என்ற இஸ்லாமிய நெறிமுறைக்கு மாறான எண்ண ஓட்டம் அது என்பதை உணர்ந்த கலீபா அவர்கள் காலித் இப்னு வலீத் அவர்களை திடீரென்று போர்க் களத்தின் தளபதி பதவியிலிருந்து பின்வாங்க வைத்து வேறொருவரை மிகவும் அறிமுகமில்லாத ஒருவரை தளபதியாக நியமிக்கிறார்கள். போரின் உக்கிரத்தை அறிந்தவர்கள் அதிர்ச்சி அடைந்தார்கள். ஆனால் ஒரு சலனமுமில்லாமல் கலீபா அவர்களின் ஆணைக்கு கட்டுப்பட்டு அந்த தலைமை பதவியை காலித் இப்னு வலீத் அவர்கள் வேறொருவருக்கு விட்டுக் கொடுத்த சரித்திரம் நம் எல்லோருக்கும் பரிச்சயமான செய்திதான். படிப்பதற்கு இலேசாக இருந்தாலும் தலைமை பதவியை விட்டுக் கொடுக்கும் பண்பு - தியாகம் - அந்த மனப் பான்மை சாதரணமான ஒன்றல்ல என்பதை நாம் இவர்கள் சண்டை மூலம் உணர முடிகிறது.

அப்படியானால் நூற்றாண்டுகளை கடந்து நிமிர்ந்து நிற்கும் முஸ்லிம் லீக் எவ்வளவு சோதனைகளை தாண்டி வந்திருக்கும் எவ்வளவு சவால்களை சமாளித்து வந்திருக்கும் எவ்வளவு தலைமை பிரச்சினைகளுக்கு முகம் கொடுத்து பொறுமையோடு வளர்ந்திருக்கும் என்பதை நினைத்துப் பார்க்கிறேன். அவர்களை மேடைதோறும் கொச்சைப் படுத்தி இவர்கள் பேசிய பேச்சுக்களையும் அசைபோட்டுப் பார்க்கிறேன்.

போர்க்குணம் இல்லாத கட்சி என்ற முத்திரை குத்தப்பட்டது இவர்களால். ஆனால் இவர்களது போர்க்குணம் இந்த சமுதாயத்துக்கு அதன் முன்னேற்றத்துக்கு பயன்படும் என்றெல்லாம் நாங்கள் ஆவலுடன் எதிர்பார்த்திருந்தோம். இப்போது தெரிகிறது தலைமை போராட்டம் அதற்காக அதன் தலைவர்கள் எவ்வளவு விலை கொடுக்க வேண்டியிருக்கிறது.

தலைமை போராட்டம் திராவிட முன்னேற்ற கழகத்திலும் இருக்கிறது காங்கிரஸ் கட்சியிலும் இருக்கிறது கம்யூனிஸ்ட் கட்சியிலும் இருக்கிறது. அது சகஜம் என்று எடுத்துக் கொள்ளலாம். ஆனால் அல்லாஹ்வின் பெயரால் நபிகள் நாயகத்தின் நெறிமுறையை வழி முறையை பின்பற்றுகிறோம் என்று புறப்பட்டவர்கள் - இஸ்லாத்தை அதன் தூய வடிவிலே மக்களுக்கு அளிக்கிறோம் என்று அறைகூவல் விட்டவர்கள் இப்படி பிரிந்து நிற்கிறார்களே என்பதை எண்ணும்போது வேதனையாக இருக்கிறது.

விட்டுக் கொடுப்பது ஒரு வழிப் பாதை அல்ல அது இரு வழிப்பாதைதான். இருந்தாலும் நபிகள் நாகயம் அதை தங்கள் இயல்பாகவே ஒரு வழிப் பாதையாக ஆக்கி கொண்டு குறைஷிகளுடன் ஒப்பந்தம் செய்து கொண்டார்களே ஹுதைபிய்யா உடன்படிக்கை அதை என்னவென்று சொல்வது. அல்லாஹு அக்பர்.

உங்கள் நபியிடம் உங்களுக்கு அழகிய முன்மாதிரி இருக்கிறது என்று அல்லாஹ் சொல்கிறானே, கொஞ்சம் சிந்தித்துப் பார்த்து உங்கள் செய்கையை மாற்றுங்கள். இல்லாவிட்டால் அல்லாஹ்வின் உதவி உங்களுக்கு வராது எதிர்வரும் தேர்தலில் நீங்கள் யாருடன் கூட்டு சேர்ந்தாலும் தோல்வியை தழுவுவது தவிர்க்க முடியாத ஒன்றாகிவிடும்.