{ முகநூல் கருத்துக்கள்}{ட்விட்டர் கருத்துக்கள்}

அதிராம்பட்டினத்தில் நடைபெற்ற மாநில கால்பந்து போட்டியில் காயல்பட்டினம் காயல் ஸ்போட்டிங் கிளப் - KSC அணி கோப்பையை வென்றுள்ளது. இதுகுறித்த செய்தியறிக்கை:-

அதிரை SSMG குல் முஹம்மது நினைவு 17ஆம் ஆண்டு & அதிரை இளைஞர் கால்பந்து கழகம் 23ஆவது ஆண்டாக நடத்தும் மாநில எழுவர் கால்பந்து போட்டிகள் கடந்த ஜூன் மாதம் 26 முதல் அதிரை கடற்கரைத் தெரு ITI மைதானத்தில் துவங்கி ஜூலை 25ஆம் நாள் வரை சுமார் ஒரு மாத காலமாக நடைபெற்றது.

இப்போட்டியில் அதிரை AFFA, WFC, AYFA அணிகள், சென்னை, திருச்சி, கோவை, நாகை, தஞ்சை, காரைக்கால், காரைக்குடி, புதுக்கோட்டை, திண்டுக்கல் ஆகிய அணிகளுடன் காயல்பட்டினம் காயல் ஸ்போர்ட்டிங் க்ளப் (KSC) அணியும் பங்கேற்றது.



நாக் அவுட் முறையில் நடைபெற்ற இப்போட்டித் தொடரின் அரையிறுதி ஆட்டத்தில், திண்டுக்கல் அணி தஞ்சை நெப்போலியன் அணியை 4-1 என்ற கோல் கணக்கிலும், KSC அணியினர் தஞ்சை நேத்தாஜி அணியை 2-1 என்ற கோல் கணக்கிலும் வெற்றி பெற்று இறுதி போட்டிக்கு முன்னேறின.

KSC மற்றும் தஞ்சை திண்டுக்கல் அணிகளுக்கு இடையேயான இறுதி போட்டி ஜூலை 25ஆம் நாள் செவ்வாய் கிழமை மாலை 5 மணியளவில் நடைபெற்றது. அதில் KSC அணி திண்டுக்கல் அணியை 3 - 0 என்ற கோல் கணக்கில் வெற்றி பெற்று கோப்பையை வென்றது. முஹம்மது அலி முற்பாதி ஆட்டத்தில் ஒரு கோலும் ஹனிபா பிற்பாதி ஆட்டத்தில் இரண்டு கோலும் அடித்து வெற்றிக்கு வித்திட்டனர்.

பின்னர் நடைபெற்ற பரிசளிப்பு விழாவில் வெற்றி பெற்ற KSC அணிக்கு சுழற்கோப்பையும், ரூபாய் 30 ஆயிரம் பணப்பரிசும் வழங்கப்பட்டன.



வெற்றிக்கு முனைந்த திண்டுக்கல் அணிக்கு கோப்பையும், ரூபாய் 20 ஆயிரம் பணப்பரிசும் வழங்கப்பட்டன. இறுதிப்போட்டியில் பங்கேற்ற வீரர்கள் அனைவருக்கும் தனிப் பரிசுகளும் அளிக்கப்பட்டன.



இப்போட்டித் தொடரின் சிறந்த வீரராக KSC அணியின் முஹம்மத் ஹனீஃபா, சிறந்த கோல் கீப்பராக அதே அணியின் எம்.டீ.முஹம்மத் அப்துல் காதிர் ஆகியோர் தேர்வு செய்யப்பட்டு, அவர்கள் சிறப்புப் பரிசு வழங்கப்பட்டு கண்ணியப்படுத்தப்பட்டனர்.



தமிழகத்தின் பல்வேறு பகுதிகளில் வசிக்கும் காயலர்கள், அதிராம்பட்டினம் & சுற்றுவட்டாரத்தினர் உட்பட திரளான விளையாட்டு ஆர்வலர்கள் இப்போட்டியைக் கண்டுகளித்தனர்.





காயல்பட்டினம் KSC அணியின் பயிற்சியாளர் செய்யித் முஹ்யித்தீனின் பயிற்சியின் கீழ், அவ்வணி இவ்வாண்டில் பெறும் 5ஆவது கோப்பை இது என்பது குறிப்பிடத்தக்கது.



தகவல் & படங்கள்:
K.K.S.முஹம்மத் ஸாலிஹ் & முத்து இப்றாஹீம்

[செய்தி திருத்தப்பட்டது @ 09:15 / 26.07.2017.]