{ முகநூல் கருத்துக்கள்}{ட்விட்டர் கருத்துக்கள்}

விவசாய வடிகால் நிலத்தில், டி.சி.டபிள்யு. ஆலையின் ஆக்கிரமிப்பை அகற்றாவிட்டால், மாவட்ட ஆட்சியரிடம் நிலப் பட்டாக்களை ஒப்படைக்கப் போவதாக, காயல்பட்டினத்தையடுத்துள்ள ஆறுமுகநேரியில் நடைபெற்ற விவசாயிகள் கூட்டத்தில் தீர்மானிக்கப்பட்டுள்ளது. விபரம் வருமாறு:-

ஆறுமுகநேரியில், தாமிரபரணி தென்கால் நல்லூர் கீழக்குளம் நீரினை பயன்படுத்துவோர் விவசாயிகள் சங்கக் கூட்டம், அமைப்பின் தலைவர் அ.கல்யாணசுந்தரம் தலைமையில் நடைபெற்றது. செயலாளர் ஆர்.ரவிச்சந்திரன் முன்னிலை வகித்தார். பொருளாளர் எஸ்.ஜெயக்குமார் நிர்வாக குழு உறுப்பினர் எம்.தூசிமுத்து உள்பட பலர் கூட்டத்தில் கலந்துகொண்டனர்.

கூட்டத்தில் நிறைவேற்றப்பட்ட தீர்மானம் வருமாறு:-

ஆறுமுகநேரி எட்டுக்கண் பாலத்தில் தொடங்கி காயல்பட்டினம் கடற்கரை வரையில் தாமிரபரணி ஆற்று விவசாயத்தின் வடிகால் 400 ஏக்கரில் உள்ளது. இதில் 200 ஏக்கர் வடிகால் பாதையில் அனல்மின் நிலைய சாம்பல் கழிவுகள் மற்றும் அமிலக்கழிவுகளை கொட்டி டி.சி.டபிள்யூ தொழிற்சாலை நிர்வாகத்தினர் ஆக்கிரமித்துள்ளனர்.

அணைக்கட்டு போல் அமைந்துள்ள மீதி 200 ஏக்கரில் அமிலக்கழிவுகள் 5 அடி உயரத்திற்கு தேங்கி படிந்துள்ளது. இந்நிலையில் வடிகால் முகத்துவாரத்தில் தடுப்பு அமைத்து எஞ்சிய நீர் கடலுக்குள் செல்லவிடாமல் தடுக்கப்பட்டுள்ளது. இந்த ஆக்கிரமிப்புகளை உடனடியாக அகற்றாவிட்டால் ஆறுமுகநேரி பகுதியில் விவசாயம் செய்ய வாய்ப்பில்லாமல் ஆகிவிடும்.

இது சம்பந்தமாக மாவட்ட ஆட்சித்தலைவர் கடந்த மாதம் நேரில் வந்து ஆய்வு செய்த பிறகும் எவ்வித நடவடிக்கையும் எடுக்கப்படவில்லை. ஆகவே வரும் 27ஆம் தேதிக்குள் விவசாயிகளின் வாழ்வாதாரத்தைக் காக்க டி.சி.டபிள்யு. தொழிற்சாலை நிர்வாகம் உரிய நடவடிக்கையை எடுக்காவிட்டால் மறு தேதியில் எங்கள் விவசாய நில பட்டாக்களை மாவட்ட ஆட்சியாளரிடம் ஒப்படைத்துவிட முடிவு செய்கிறோம்.

இவ்வாறு கூட்டத்தில் தீர்மானிக்கப்பட்டுள்ளது.