{ முகநூல் கருத்துக்கள்}{ட்விட்டர் கருத்துக்கள்}

DCW தொழிற்சாலைக்கு எதிராக தொடரப்பட்ட வழக்கில் தேசிய பசுமைத் தீர்ப்பாயத்திலிருந்து உத்தரவு பெறப்பட்டுள்ளது. இதுகுறித்து, காயல்பட்டினம் சுற்றுச்சூழல் பாதுகாப்பு அமைப்பின் (KEPA) செய்தி தொடர்பாளர் எஸ்.கே.ஸாலிஹ் வெளியிட்டுள்ள அறிக்கை:-

DCW தொழிற்சாலையின் விரிவாக்கத் திட்டத்திற்கு வழங்கப்பட்ட அனுமதியை எதிர்த்து, காயல்பட்டினம் சுற்றுச்சூழல் பாதுகாப்பு அமைப்பு – KEPA சார்பில், தேசிய பசுமை தீர்ப்பாணையத்தில் வழக்கு தொடரப்பட்டுள்ளது.

அவ்வழக்கு (APPEAL NO.37/2014 [SZ]) மே 26 அன்று அனுமதிக்காக - நீதிபதி எம்.சொக்கலிங்கம் மற்றும் நிபுணர் உறுப்பினர் பேராசிரியர் டாக்டர் ஆர்.நாகேந்திரன் ஆகியோர் முன்னிலையில் விசாரணைக்கு வந்தது. வழக்கை விசாரித்த தீர்ப்பாணையம், வழக்கை அனுமதித்து, எதிர்மனுதாரர்களுக்கு நோட்டீஸ் அனுப்ப உத்தரவிட்டு, வழக்கை ஜூலை 10, 2014 தேதிக்கு ஒத்திவைத்தது.





இவ்வழக்கு ஜூலை 10 அன்று மீண்டும் விசாரணைக்கு வந்தது. இவ்வழக்கில் எதிர்மனுதாரர்களாகிய ஆறு தரப்புகளில், CHOLAMANDALAM MS RISK SERVICES LIMITED நிறுவனம் ஆஜராகவில்லை. அந்நிறுவனத்திற்கு மீண்டும் நோட்டீஸ் அனுப்ப நீதிபதி எம்.சொக்கலிங்கம் உத்தரவிட்டார்.

எஞ்சிய ஐந்து எதிர் மனுதாரர்களாகிய மத்திய அரசு (அதன் சுற்றுச்சூழல் மற்றும் வனத்துறை அமைச்சக செயலாளர்), தமிழக அரசு (அதன் சுற்றுச்சூழல் அமைச்சக செயலாளர்), DCW தொழிற்சாலை (அதன் நிர்வாக இயக்குனர்), தமிழ்நாடு மாசு கட்டுப்பாட்டு வாரியம் (அதன் உறுப்பினர் - செயலாளர்), இத்திட்டத்திற்கு - DCW தொழிற்சாலை சார்பில் ஆவணங்கள் தயாரித்த PURE ENVIRO ENGINEERING PRIVATE LIMITED ஆகிய்வர்கள் சார்பாக அவர்களின் வழக்கறிஞர்கள், பதில்கள் சமர்ப்பிக்க கூடுதல் கால அவகாசம் கேட்டனர். அதனை ஏற்றுக்கொண்ட நீதிமன்றம் - வழக்கினை ஆகஸ்ட் 28, 2014 க்கு ஒத்திவைத்தது.

இத்தருணத்தில் காயல்பட்டினம் சுற்றுச்சூழல் பாதுகாப்பு அமைப்பு தரப்பு வழக்கறிஞர் திருமதி டி.நாகசாய்லா - மத்திய அரசின் சுற்றுச்சூழல் அமைச்சகம் வழங்கியுள்ள ஒப்புதலுக்கு (ENVIRONMENTAL CLEARANCE - EC) இடைக்கால தடை விதிக்க கோரினார்.

இடைக்கால தடை வழங்க மறுத்த நீதிமன்றம், DCW நிறுவனம் சுற்றுச்சூழல் ஒப்புதல் அடிப்படையில் கட்டுமான அனுமதி (CONSENT TO ESTABLISH - CTE) மட்டுமே பெற்றுள்ளது என்றும், உற்பத்தியை துவக்க (CONSENT TO OPERATE) அனுமதி பெறவில்லை என்றும் கூறியது. கட்டுமானம் நடப்பதால் மனுதாரருக்கு எந்தவித பாதிப்பும் இல்லை என நீதிமன்றம் கூறியது.

பல தருணங்களில் இறுதி தீர்ப்பு நிறுவனத்திற்கு எதிராக இருந்தாலும், அவர்கள் கட்டுமானத்திற்கு செலவு செய்துள்ள பெரும் தொகையை மேற்கோள்காட்டி நீதிமன்றங்கள், அபராதம் மட்டும் கட்ட சொல்லி நிறுவனங்களை தொடர்ந்து இயங்க அனுமதித்துள்ளதை KEPA வழக்கறிஞர் திருமதி டி.நாகசாய்லா நினைவு கூர்ந்தார்.

அதற்கு பதில் கூறிய நீதிபதி எம். சொக்கலிங்கம் மற்றும் நிபுணர் உறுப்பினர் பேராசிரியர் நாகேந்திரன் ஆகியோர் - பல வழக்குகளில், நிறுவனங்கள் கட்டுமானத்திற்கு பல கோடி செலவு செய்திருந்தாலும், இறுதி தீர்ப்பில் அந்நிறுவனங்களை மூடிட கூறியுள்ளதாக தெரிவித்தனர். மேலும் - DCW நிறுவனம் தற்போது கட்டுமானப் பணிகளை செய்தாலும், இறுதி தீர்ப்பை எவ்வகையிலும் அது தாக்கம் செய்யாது எனக்கூறினர்.

DCW நிறுவன வழக்கறிஞர், கட்டுமான பணிக்கு அனுமதி பெற்றிருந்தாலும், தீர்ப்பாயத்தின் - சுற்றுச்சூழல் அனுமதி குறித்த இறுதி தீர்ப்பை ஏற்று நடப்பதாக கூறினார். இந்த உததரவாதத்தை நீதிமன்றம் பதிவு செய்தது.

மத்திய அரசு சார்பாக வழக்கறிஞர் திருமதி சி.சங்கமித்திரை, DCW நிறுவனம் சார்பாக வழக்கறிஞர்கள் ஆர்.வெங்கட்டவதன் மற்றும் நிவேதிதா, தமிழ்நாடு மாசு கட்டுப்பாட்டு வாரியம் சார்பாக வழக்கறிஞர் திருமதி ரீதா சந்திரசேகர், தமிழக அரசு சார்பாக வழக்கறிஞர்கள் எம்.கே. சுப்ரமணியம் மற்றும் எம்.ஆர்.கோகுல் கிருஷ்ணன், PURE ENVIRO ENGINEERING PRIVATE LIMITED நிறுவன்ம் சார்பாக வழக்கறிஞர் வி.ஸ்ரீனிவாச பாபு ஆகியோர் இவ்வழக்கில் ஆஜராகின்றனர்.