{ முகநூல் கருத்துக்கள்}{ட்விட்டர் கருத்துக்கள்}

DCW தொழிற்சாலைக்கு எதிராக தொடரப்பட்ட வழக்கு, தேசிய பசுமை தீர்ப்பாயத்தில் ஜனவரி 19 அன்று மீண்டும் விசாரணைக்கு வந்தது. இதுகுறித்து, காயல்பட்டினம் சுற்றுச்சூழல் பாதுகாப்பு அமைப்பின் (KEPA) செய்தி தொடர்பாளர் எஸ்.கே.ஸாலிஹ் வெளியிட்டுள்ள அறிக்கை:-

DCW தொழிற்சாலையின் விரிவாக்கத் திட்டத்திற்கு வழங்கப்பட்ட அனுமதியை எதிர்த்து, காயல்பட்டினம் சுற்றுச்சூழல் பாதுகாப்பு அமைப்பு – KEPA சார்பில், தேசிய பசுமை தீர்ப்பாயத்தில் வழக்கு தொடரப்பட்டுள்ளது.

மே 26, 2014 அன்று தீர்ப்பாயத்தால் அனுமதிக்கப்பட்ட இந்த வழக்கில், அனைத்து தரப்பின் எழுத்துப்பூர்வமான வாதங்கள் (PLEADINGS) சமர்ப்பிப்பு - செப்டம்பர் 3, 2015 அன்று நிறைவுற்றது.

இதனை தொடர்ந்து - இவ்வழக்கில் வாதங்கள் (SUBMISSIONS) - அக்டோபர் 5 அன்று துவங்கின.

அதன் பிறகு அக்டோபர் 10 மற்றும் நவம்பர் 2 ஆகிய தேதிகளிலும், காயல்பட்டினம் சுற்றுச்சூழல் பாதுகாப்பு அமைப்பு (KEPA) சார்பாக வழக்கறிஞர் டி.நாகசைலா - தனது வாதங்களை தொடர்ந்தார்.

நவம்பர் 16 அன்று விசாரணைக்கு வந்த வழக்கு - சென்னையில் பெய்து வரும் பருவ மழையின் காரணமாக, இவ்வழக்கின் வழக்கறிஞர்கள் தீர்ப்பாயம் வரமுடியாததால், டிசம்பர் 10 தேதிக்கும், பின்னர் ஜனவரி 19 தேதிக்கும் ஒத்திவைக்கப்பட்டது.



ஜனவரி 19 அன்று இவ்வழக்கு விசாரணைக்கு வந்தது. இவ்வழக்கை விசாரிக்கும் நீதிபதி திரு சொக்கலிங்கம் விடுமுறையில் இருப்பதால், நீதபதி திரு ஜோதிமணி மற்றும் நிபுணர் உறப்பினர் பி.எஸ்.ராவ் ஆகியோர் இவ்வழக்கினை விசாரித்தனர்.

மத்திய அரசின் வழக்கறிஞராக இதுவரை இருந்த திருமதி சி.சங்கமித்ரைக்கு பதிலாக, இனி வழக்கறிஞர் திரு ஜி.எம். செய்யது நூருல்லாஹ் ஷரீப் செயல் புரிவார் என வகாலத் தாக்கல் செய்யப்பட்டது.

காயல்பட்டினம் சுற்றுச்சூழல் பாதுகாப்பு அமைப்பு சார்பாக புதிய ஆவணங்கள் இவ்வழக்கில் தாக்கல் செய்யப்பட்டுள்ளது. தீர்ப்பாயத்தில் இது M.A. NO.5 OF 2016 (SZ) என்ற விண்ணப்பமாக பதிவு செய்யப்பட்டுள்ளது.

KEPA அமைப்பின் புதிய ஆவணத்திற்கு தங்கள் பதிலை, அவ்வமைப்பிடம் முன்னரே வழங்கி விட்டதாக DCW தொழிற்சாலையின் வழக்கறிஞர் தெரிவித்தார். மேலும் - அந்த ஆவணங்களை தீர்ப்பாயத்தில் இன்று முறையாக தாக்கல் செய்வதாகவும் அவர் கூறினார்.

DCW தொழிற்சாலைக்கு ஆவணங்கள் தயாரித்த இரு நிறுவனங்களின் ஒரு நிறுவனமான PURE ENVIRO நிறுவனத்தின் வழக்கறிஞர், தனது தரப்பு பதிலை - வழக்கு அடுத்து விசாரணைக்கு வரும்போது தாக்கல் செய்வதாக தெரிவித்தார்.

இதனை தொடர்ந்து, இவ்வழக்கின் வாதங்கள் ஜனவரி 28 அன்று தொடரும் என நீதிபதி ஜோதிமணி அறிவித்தார். அன்று காயல்பட்டினம் சுற்றுச்சூழல் பாதுகாப்பு அமைப்பு (KEPA) வழக்கறிஞர் தனது வாதங்களை தொடருவார்.



இவ்வழக்கில் காயல்பட்டினம் சுற்றுச்சூழல் பாதுகாப்பு அமைப்பு (KEPA) சார்பாக வழக்கறிஞர்கள் டி.நாகசைலா, டாக்டர் வி.சுரேஷ் மற்றும் பிரீஸ்ட்லி மோசஸ் ஆகியோர் ஆஜராகின்றனர்.

மத்திய அரசு சார்பாக வழக்கறிஞர் திருமதி சி.சங்கமித்திரை (இனி வழக்கறிஞர் ஜி.எம். செய்யது நூருல்லாஹ் ஷரீப்), DCW நிறுவனம் சார்பாக வழக்கறிஞர்கள் ஆர்.வெங்கட்டவதன் மற்றும் நிவேதிதா, தமிழ்நாடு மாசு கட்டுப்பாட்டு வாரியம் சார்பாக வழக்கறிஞர் திருமதி ரீதா சந்திரசேகர், தமிழக அரசு சார்பாக வழக்கறிஞர்கள் எம்.கே. சுப்ரமணியம் மற்றும் எம்.ஆர்.கோகுல் கிருஷ்ணன், PURE ENVIRO ENGINEERING PRIVATE LIMITED நிறுவன்ம் சார்பாக வழக்கறிஞர் வி.ஸ்ரீனிவாச பாபு, CHOLAMANDALAM MS RISK SERVICES LIMITED சார்பாக வழக்கறிஞர் பி.பிரேம்குமார் ஆகியோர் இவ்வழக்கில் ஆஜராகின்றனர்.