{ முகநூல் கருத்துக்கள்}{ட்விட்டர் கருத்துக்கள்}

மேல ஆத்தூரில் அமைந்துள்ள நீர் தேக்கத்தில் இருந்து காயல்பட்டினத்திற்கு தினமும் தண்ணீர் வழங்கப்படுகிறது. வழங்கப்படும் தண்ணீரில் 3 - 5 லட்சம் தண்ணீர் குறைவாகவே வருவதாகவே - காயல்பட்டினம் நகராட்சி ஊழியர்கள் தெரிவிக்கின்றனர். நீர் தேக்கத்தை பராமரிக்கும் தமிழ்நாடு குடிநீர் வடிகால் வாரியம் அலுவலர்கள் - குடிநீர் சரியான அளவில் வழங்கப்படுவதாகவும், வழங்கப்படும் அளவு நவீன மீட்டர் மூலம் பதியப்படுவதாகவும் தெரிவிக்கின்றனர்.

நகராட்சியில் ஆய்வுகள் மேற்கொண்ட தமிழ்நாடு குடிநீர் வடிகால் அலுவலர்கள் - தங்கள் பரிந்துரைகளை வழங்கியுள்ளனர். அதில் நகரில் முறையற்ற இணைப்புகள் உள்ளன என்றும், பம்பிங் மெய்ன் இணைப்பில் இருந்து சட்டவிரோதமாக பலருக்கு இணைப்புகள் வழங்கப்பட்டுள்ளதாகவும் என பல காரணங்களை தெரிவிக்கின்றனர்.

இதற்கிடையில் - ஞாயிறு முதல் - மேல ஆத்தூரில் இருந்து காயல்பட்டினத்திற்கு தண்ணீர் அனுப்பப்படும் நேரம் மாற்றப்பட்டுள்ளது. 23 லட்சம் லிட்டர் தண்ணீர் வழங்கும் காலங்களில் - இரவில் துவங்கி, மறு நாள் மதியம் வரை தண்ணீர் - தினமும் - காயல்பட்டினத்திற்கு அனுப்பப்படும். தற்போது தண்ணீர் தட்டுபாடு நிலவுவதால் - 13 லட்சம் லிட்டர் தண்ணீரே அனுப்பப்படுகிறது. ஆகவே - இரவு 8 மணிக்கு துவங்கி, அதிகாலை 6 மணி வரை தண்ணீர் அனுப்பப்பட்டு வந்தது.

மேல ஆத்தூரில் இருந்து அனுப்பப்படும் தண்ணீரின் வரத்தை முழுமையாக கண்காணிக்க பகல் நேரத்தில் தண்ணீரை அனுப்ப - நகர்மன்றத் தலைவர் ஐ. ஆபிதா சேக் கேட்டுக்கொண்டததற்கு இணங்க - அதிகாலை 4:30 மணி முதல் மாலை 3 மணி வரை தண்ணீர் இனி அனுப்பப்படும் என தமிழ்நாடு குடிநீர் வடிகால் வாரியம் துணை பொறியாளர் - பாலசுப்ரமணியம் - காயல்பட்டணம்.காம் இணையதளத்திடம் தெரிவித்தார். இதனை தொடர்ந்து - மேல ஆத்தூரில் இருந்து பிற ஊர்களுக்கு தண்ணீர் அனுப்பப்படும் நேரமும் மாற்றப்பட்டுள்ளதாக மேலும் அவர் தெரிவித்தார்.