{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினம் நகராட்சி மன்ற கூட்டரங்கில், 20.10.2012 அன்று (இன்று) நண்பகல் 12.00 மணியளவில், டெங்கு காய்ச்சல் விழிப்புணர்வு கருத்தரங்கம், நகர்மன்றத் தலைவர் ஐ.ஆபிதா ஷேக் தலைமையில் நடைபெற்றது.

காயல்பட்டினம் நகராட்சி சுகாதார ஆய்வாளர் எஸ்.பொன்வேல்ராஜ் இக்கருத்தரங்கில் கலந்துகொண்டு, டெங்கு காய்ச்சல் குறித்தும், அதனைப் பரப்பும் கொசுக்கள் உருவாகும் விதம் குறித்தும், தடுப்பு நடவடிக்கைகள் குறித்தும் விளக்கிப் பேசினார்.



*** டெங்கு, சிக்குன்குனியா காய்ச்சல்கள் குணப்படுத்தக் கூடியவையே... அச்சப்பட வேண்டியதில்லை...

*** நல்ல தண்ணீரில்தான் டெங்கு கொசுக்கள் முட்டையிட்டு உருவாகும். எனவே, வீடுகளில் சேகரிக்கும் தண்ணீரை எப்போதும் இறுக மூடி வைத்துக் கொள்ள வேண்டும்...

*** உறங்கும்போது கொசு கடிக்காமல் இருக்க கொசு வலையைப் பயன்படுத்துவதே சிறந்தது... எனினும், கொசு ஒழிப்பிற்காக பயன்படுத்தப்படும் மேட், திரவம் உள்ளிட்டவற்றை அளவோடு பயன்படுத்துவதில் தவறில்லை... கொசுவர்த்திச் சுருள் எனில் - இயன்றளவுக்கு அதன் புகையை சுவாசிக்க வாய்ப்பில்லாத வகையில் அமைத்துக்கொள்வது நல்லது...

*** பொதுமக்கள், தாம் குடிக்கும் நீரை நன்கு காய்ச்சி, ஆற வைத்து குடிக்க வேண்டும்...

*** கண்ட இடங்களிலும் நீரைத் தேங்க விடக்கூடாது... நீர் தேங்கும் வகையில் ஆங்காங்கே சிதறிக் கிடக்கும் டயர், சிரட்டை, உடைந்த பாத்திரங்கள், வளைந்த ஓடுகள் உள்ளிட்ட பொருட்களை உடனுக்குடன் அப்புறப்படுத்த வேண்டும்...

*** குளிர்சாதனப் பெட்டியின் அடியிலிருக்கும் கழிவு நீர் தட்டை குறைந்தபட்சம் வாரம் ஒருமுறையாவது கழுவி சுத்தம் செய்து மீண்டும் பொருத்த வேண்டும்...

*** 15 வயதுக்குக் கீழுள்ளவர்களுக்கே டெங்கு காய்ச்சல் பாதிப்புகள் அதிகளவில் ஏற்படுகிறது... அவர்களின் குருதியில் இருக்க வேண்டிய platelets எண்ணிக்கை குறைவாக இருப்பதே இதற்குக் காரணம்...

*** பொதுமக்களில் யாருக்கேனும் காய்ச்சல் ஏற்பட்டால், வெறுமனே மாத்திரை - மருந்துகளை உட்கொண்டுவிட்டு - சாதாரண காய்ச்சல்தான் என்ற நினைப்பில் இருந்துவிட வேண்டாம்... நாளை அதுவே உங்கள் உயிரைப் பறிக்கும் நோயாக இருக்கலாம்... எனவே, காய்ச்சல் கண்டவர்கள் உடனடியாக அரசு மருத்துவமனைகளுக்குச் சென்று மருத்துவ பரிசோதனை செய்துகொள்ள வேண்டும்...

*** வெளியூர்களிலிருந்து ஊருக்கு வருவோருக்கு காய்ச்சல் ஏற்பட்டால், அதை சாதாரணமாக எடுத்துக்கொள்ளாமல் உடனடியாக அரசு மருத்துவமனையில் சென்று சிகிச்சை பெற்றுக்கொள்ள வேண்டும்...

*** வட்டாரத்தின் எந்தப் பகுதியில் யாருக்கு டெங்கு காய்ச்சல் இருந்தாலும் அத்தகவலை ஆரம்ப சுகாதார நிலைய அலுவலர்களுக்கு உடனுக்குடன் தெரிவிக்க வேண்டும். அவர்களுக்கு சிகிச்சையளிக்கும் அரசு மற்றும் தனியார் மருத்துவமனைகளிலிருந்து ஆரம்ப சுகாதார நிலையத்திற்குத் தகவல் தரப்பட்டுவிடும்... அதனடிப்படையில், காய்ச்சல் பாதித்த பகுதி சுற்றுவட்டாரங்களில் தடுப்பு நடவடிக்கைகளை அலுவலர்கள் மேற்கொள்வர்...

*** வீடுகளில் கொசுக்கள் உற்பத்தியாகும் வகையில் தண்ணீர் தேக்கம் உள்ளதா என்பதைக் கண்டறிந்து களைந்திடும் பணிக்காக இல்லம் தேடி வரும் ஆரம்ப சுகாதார நிலைய அதிகாரிகள், அலுவலர்களுக்கு வீட்டிலிருப்போர் - குறிப்பாக பெண்கள் முழு ஒத்துழைப்பளிக்க வேண்டும்...

*** காயல்பட்டினத்தைச் சார்ந்த வீடுகளில் இதுபோன்று சுகாதாரப் பணிகளுக்காக வரும் அலுவலர்கள் நீண்ட நேரம் காக்க வைக்கப்படுவதால் அவர்களின் பணி பாதிக்கிறது... எனவே, வெளியிடங்களிலிருக்கும் அவர்களின் உறவினர்கள், பொதுநல ஆர்வலர்கள், பொதுநல அமைப்பினர் இது விஷயத்தில் அக்கறையெடுத்து, அம்மக்களுக்கு உணர்த்தி, அலுவலர்கள் விரைந்து தமது பணிகளை முடிக்க ஆவன செய்து தர வேண்டும்...

*** டெங்கு காய்ச்சலைப் பரப்பும் கொசுக்களை அதன் முட்டைப் பருவத்திலேயே அழித்து விட வேண்டும். அதனை வளர விட்டால், அதனால் பாதிப்பு நிச்சயம் ஏற்படும்...

*** வருமுன் காப்போம் என்ற அடிப்படையில் நாம் வாழ முற்பட்டால், வேண்டாத நோய்கள் நம்மை அண்டாமல் பாதுகாக்க இயலும்...

இவ்வாறு, காயல்பட்டினம் நகராட்சி சுகாதார ஆய்வாளர் எஸ்.பொன்வேல்ராஜ் உரையாற்றினார்.

இக்கூட்டத்தில், காயல்பட்டினம் நகர்மன்ற உறுப்பினர்கள், நகர பொதுநல அமைப்புகளின் பிரதிநிதிகள் மற்றும் பொதுமக்கள் திரளாகக் கலந்துகொண்டனர்.

டெங்கு காய்ச்சல் குறித்து பொதுமக்களுக்கு விழிப்புணர்வூட்டுவதற்காக காயல்பட்டினம் நகராட்சியின் சார்பில் வெளியிடப்பட்டுள்ள பிரசுரம் பின்வருமாறு:-