{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினம் நகராட்சி எல்லைக்குள் இயங்கி வரும் DCW தொழிற்சாலையின் மாசு நிறைந்த அமிலக் கழிவுநீர் - அரசு சட்ட விதிகளுக்கு மாற்றமாக பன்னெடுங்காலமாக காயல்பட்டினம் கடற்பரப்பில் கலக்கப்பட்டு வருகிறது. நகரில் புற்றுநோயாளிகளின் எண்ணிக்கை நாளுக்கு நாள் அதிகரிப்பதற்கும், பலர் உயிரிழப்பதற்கும் இத்தொழிற்சாலையின் மாசுகளே முக்கிய காரணமாக இருக்கக் கூடும் என்று அஞ்சப்படுகிறது.

அரசின் மாசுக்கட்டுப்பாடு சட்ட விதிகளுக்கு மாற்றமாக செயல்பட்டு வரும் இத்தொழிற்சாலையின் சில பகுதிகளை மூடுமாறு, தூத்துக்குடி மாவட்ட மாசு கட்டுப்பாட்டு வாரியம் - தமிழ்நாடு மாசு கட்டுப்பாட்டு வாரியத்திற்கு பரிந்துரை செய்தும், இதுவரை அதன் மீது நடவடிக்கை எடுக்கப்படாததைக் கண்டித்தும், அரசின் மாசு கட்டுப்பாடு சட்ட விதிகளுக்கு மாற்றமாக செயல்பட்டு வரும் இத்தொழிற்சாலையைக் கண்டித்தும், அதன் மீது தகுந்த நடவடிக்கை எடுப்பது குறித்து மத்திய - மாநில அரசுகளின் கவனத்தை ஈர்க்கும் வகையிலும், நகரின் அனைத்து ஜமாஅத்துகள் - பொதுநல அமைப்புகள் - புறநகர் ஊர் நலக் கமிட்டியினர் ஆதரவுடன்,

29.11.2012 வியாழக்கிழமையன்று (நேற்று), காயல்பட்டினத்தில் ஒருநாள் அடையாள முழு கடையடைப்பு நடத்திடவும், காயல்பட்டினம் வள்ளல் சீதக்காதி திடலில் அன்று மாலை 04.30 மணிக்கு கண்டன ஆர்ப்பாட்டமும், இரவு 07.00 மணிக்கு பொதுக்கூட்டமும் நடத்திட தீர்மானிக்கப்பட்டிருந்தது. அதனடிப்படையில், அன்று காலை 06.00 மணி முதல் மாலை 06.00 மணி வரை காயல்பட்டினத்தில் முழு கடையடைப்பும், அதனைத் தொடர்ந்து, அன்று மாலை 04.30 மணியளவில் காயல்பட்டினம் வள்ளல் சீதக்காதி திடலில் கண்டன ஆர்ப்பாட்டமும், அன்று மாலை 06.00 மணியவில் செய்தியாளர் சந்திப்பு நிகழ்ச்சியும், அன்றிரவு 07.00 மணியளவில், காயல்பட்டினம் வள்ளல் சீதக்காதி திடலில் விழிப்புணர்வு பொதுக்கூட்டமும் நடைபெற்றது.

அதனைத் தொடர்ந்து, அடுத்தகட்ட நடவடிக்கைகள் குறித்து கலந்தாலோசிப்பதற்கான KEPAவின் பொதுக்குழுக் கூட்டம் 02.12.2012 அன்று நடைபெற்றது. கூட்ட நிகழ்வுகள் குறித்து KEPA சார்பில் வெளியிடப்பட்டுள்ள அறிக்கை பின்வருமாறு:-

காயல்பட்டினம் சுற்றுச்சூழல் பாதுகாப்பு அமைப்பு - KEPAவின் பொதுக்குழுக் கூட்டம், 02.12.2012 ஞாயிற்றுக்கிழமை இரவு 08.00 மணியளவில், காயல்பட்டினம் புதுக்கடைத் தெருவிலுள்ள ஆயிஷா மன்ஸிலில் நடைபெற்றது.

KEPA துணைத்தலைவர் ஹாஜி டி.ஏ.எஸ்.முஹம்மத் அபூபக்கர் தலைமையில் நடைபெற்ற இக்கூட்டத்தில், அமைப்பின் செயலாளர் பல்லாக் அப்துல் காதிர் நெய்னா அறிமுக உரையாற்றினார்.



பின்னர், DCWவின் விதிமீறல்களுக்கெதிராக நடத்தி முடிக்கப்பட்ட போராட்டங்கள் குறித்தும், அடுத்தகட்ட நடவடிக்கை குறித்தும் கலந்தாலோசிக்கப்பட்டது. நீண்ட கருத்துப் பரிமாற்றங்களுக்குப் பின், பின்வருமாறு தீர்மானங்கள் ஏகமனதாக நிறைவேற்றப்பட்டன:-

தீர்மானம் 1 - புதிய தலைவர் தேர்வு:
KEPAவின் தலைவராக இருந்து வரும் ஹாஜி ஜெஸ்மின் ஏ.கே.கலீல் அவர்கள் - தனது சொந்த அலுவல்கள் காரணமாக தொடர்ந்து பொறுப்பிலிருக்க வாய்ப்பில்லை என்று தெரிவித்துள்ளதால், அமைப்பின் புதிய தலைவராக ஹாஜி எஸ்.எம்.எம்.ஸதக்கத்துல்லாஹ் என்ற ஹாஜி காக்கா அவர்களை இக்கூட்டம் ஒருமனதாகத் தேர்ந்தெடுக்கிறது. அத்துடன், செயற்குழுவிலும் சில மாற்றங்கள் செய்யப்பட்டது.

தீர்மானம் 2 - போராட்டத்தை ஆதரித்தோருக்கு நன்றி:
KEPA ஒருங்கிணைப்பில் கடந்த 29.11.2012 வியாழக்கிழமையன்று காயல்பட்டினத்தில் நடத்தி முடிக்கப்பட்டுள்ள முழு கடையடைப்பு, கண்டன ஆர்ப்பாட்டம் மற்றும் விழிப்புணர்வு பொதுக்கூட்ட நிகழ்ச்சிகள் அனைத்தும் இறையருளால் வெற்றிகரமாக நடைபெற்று முடிந்துள்ளது. இந்நிகழ்ச்சிகளுக்கு ஆதரவு தெரிவித்த மற்றும் ஒத்துழைப்பளித்த நகரின் அனைத்து ஜமாஅத்துகள், பொதுநல அமைப்புகள், புறநகர் வட்டார நலக் கமிட்டியினர், அரசியல் சர்வகட்சியினர், வணிகர் சங்கத்தினர், நகர்மன்ற அங்கத்தினர், வேன் - கார் - ஆட்டோ ஓட்டுநர் சங்கத்தினர், அமைப்பு சாரா வணிக நிறுவனத்தினர், அமைப்பு சாரா ஓட்டுநர்கள், உள்ளூர் கேபிள் டி.வி நிறுவனத்தினர், உள்ளூர் இணையதளத்தினர் உள்ளிட்ட அனைவருக்கும் இக்கூட்டம் மனமார்ந்த நன்றியைத் தெரிவித்துக்கொள்கிறது.

தீர்மானம் 3 - வரவு-செலவு கணக்கறிக்கை:
KEPA துவக்கப்பட்டது முதல் இன்று வரையிலான வரவு - செலவு கணக்குகள் கூட்டத்தில் சமர்ப்பிக்கப்பட்டது. அதற்கு கூட்டம் ஒருமனதாக ஒப்புதல் அளித்தது.

தீர்மானம் 4 - மாவட்ட ஆட்சியர், மாசு கட்டுப்பாட்டு வாரியத்திடமும் தீர்மானம் சமர்ப்பிப்பு:
29.11.2012 அன்று காயல்பட்டினத்தில் நடைபெற்ற விழிப்புணர்வு பொதுக்கூட்டத்தில் நிறைவேற்றப்பட்ட தீர்மானங்களை, தூத்துக்குடி மாவட்ட ஆட்சியர் அவர்களிடமும், மாவட்ட மாசு கட்டுப்பாட்டு வாரியத்திடமும், 05.12.2012 அன்று நேரில் சமர்ப்பிப்பதென இக்கூட்டம் தீர்மானிக்கிறது.

தீர்மானம் 5 - நகர்மன்ற அங்கத்தினருடன் சந்திப்பு:
29.11.2012 அன்று இரவு காயல்பட்டினம் வள்ளல் சீதக்காதி திடலில் நடத்தப்பட்ட விழிப்புணர்வு பொதுக்கூட்டத்தில் தீர்மானிக்கப்பட்ட படி, DCW தொழிற்சாலை தொடர்பாக காயல்பட்டினம் நகர்மன்றம் செய்ய வேண்டிய பணிகள் குறித்து தெரிவிக்கும் பொருட்டு, நகர்மன்றத் தலைவர் - துணைத்தலைவர் - உறுப்பினர்கள் அடங்கிய நகர்மன்ற அங்கத்தினரை KEPA குழுவினர் விரைவில் சந்தித்துப் பேசுவதென இக்கூட்டம் தீர்மானிக்கிறது.

தீர்மானம் 6 - சென்னை பயண ஏற்பாடு:
DCW ஆலையின் விதிமீறல்கள் மீது நடவடிக்கை கோரியும், அதன் விரிவாக்கத் திட்டத்திற்கு அனுமதியளிக்கக் கூடாது என்று வலியுறுத்தியும், சென்னை வாழ் காயலர்களையும், இதர காயலர்களையும் ஒன்று திரட்டி சென்னை - கிண்டியிலுள்ள தமிழ்நாடு மாசு கட்டுப்பாட்டு வாரிய அலுவலகத்திற்கு நேரில் சென்று மனு அளிப்பதென ஏற்கனவே தீர்மானிக்கப்பட்டதன் அடிப்படையில், காயல்பட்டினத்திலிருந்து சென்னை செல்வோருக்கான பயண ஏற்பாடுகளைக் கவனிக்கும் பொறுப்பை அமைப்பின் துணைச் செயலாளர் ஹாஃபிழ் எம்.எம்.முஜாஹித் அலீ மற்றும் ஏ.எஸ்.புகாரீ ஆகியோரிடம் இக்கூட்டம் ஒப்படைக்கிறது.

இவ்வாறு, காயல்பட்டினம் சுற்றுச்சூழல் பாதுகாப்பு அமைப்பு - KEPA சார்பில் வெளியிடப்பட்டுள்ள அறிக்கையில் தெரிவிக்கப்பட்டுள்ளது.