{ முகநூல் கருத்துக்கள்}{ட்விட்டர் கருத்துக்கள்}

தமிழ்நாடு மெர்கண்டைல் வங்கியின் புதிய ஏ.டி.எம். சேவையை காயல்பட்டினம் நகர்மன்றத் தலைவர் துவக்கி வைக்க, நகராட்சி ஆணையர் இயந்திரத்தை இயக்கி வைத்தார். விபரம் வருமாறு:-

தமிழ்நாடு மெர்கண்டைல் வங்கியின் சார்பில், காயல்பட்டினம் பிரதான வீதி - பெரிய தெரு முனையில் புதிதாக ஏ.டி.எம். சேவை இன்று வியாழக்கிழமையன்று 17.00 மணிக்கு துவக்கி வைக்கப்பட்டது.



காயல்பட்டினம் நகர்மன்றத் தலைவர் ஐ.ஆபிதா ஷேக் சிறப்பு விருந்தினராகக் கலந்துகொண்டு, ஏ.டி.எம். சேவையைத் துவக்கி வைத்து, பொதுமக்களுக்கு அர்ப்பணித்தார்.



காயல்பட்டினம் நகராட்சி ஆணையர் எம்.காந்திராஜ் முதல் ஏ.டி.எம். அட்டையை வங்கி மேலாளரிடம் பெற்று, இயந்திரத்தை இயக்கி வைத்தார்.



வாவு வஜீஹா வனிதையர் கல்லூரியின் முதல்வர் முனைவர் ஒய்.சசிகலா குத்துவிளக்கேற்றி வைத்தார்.



முன்னிலை வகித்த - வங்கியின் தூத்துக்குடி மண்டல மேலாளர் அனைவரையும் வரவேற்றுப் பேசினார்.



ஆறுமுகநேரியிலுள்ள தமது வங்கியில், கிழிந்த ரூபாய் நோட்டுக்களை மாற்றிக்கொள்ளும் முகாம் நடைபெற்று வருவதாகவும், இன்றும் சில நாட்களுக்கு தொடர்ந்து நடைபெறவுள்ள இம்முகாமை, காயல்பட்டினம் மக்களும் பயன்படுத்திக்கொள்ளுமாறும் அவர் கேட்டுக்கொண்டார்.

காயல்பட்டினத்தில் இன்னுமோர் இடத்தில் ஏ.டி.எம். சேவையைத் துவக்கும் திட்டமுள்ளதாகவும், அதற்கான இடம் தேடப்பட்டு வருவதாகவும் அவர் மேலும் கூறினார்.

அவரைத் தொடர்ந்து, காயல்பட்டினம் நகர்மன்றத் தலைவர் ஐ.ஆபிதா ஷேக் வாழ்த்துரை வழங்கினார். கூடுதல் ஏ.டி.எம். சேவைக்கு - காயல்பட்டினம் பேருந்து நிலைய வளாகத்தில், நகராட்சிக்குப் பாத்தியப்பட்ட இடமொன்றைத் தருவதற்கு, ஆவன செய்து தருவதாகக் கூறினார்.



பின்னர், காயல்பட்டினம் நகராட்சி ஆணையர் எம்.காந்திராஜ், வாவு வஜீஹா வனிதையர் கல்லூரியின் முதல்வர் முனைவர் வி.சசிகலா ஆகியோர் வாழ்த்துரை வழங்கினர்.





விழா மேடையில் அங்கம் வகித்த அனைவருக்கும் வங்கி நிர்வாகத்தின் சார்பில் சால்வை அளித்து, நினைவுப் பரிசும் வழங்கப்பட்டது.



வங்கியின் ஆறுமுகநேரி கிளை மேலாளர் ஆர்.ரமேஷ் பென்சிலால் நன்றி கூற, நாட்டுப்பண்ணுடன் விழா நிறைவுற்றது.



இவ்விழாவில், வங்கியின் நிர்வாக அதிகாரி பழனி குமார், ஆறுமுகநேரி பூபாலா ஆடையக அதிபர் பூபால் ராஜன், மகேஷ் கார்மெண்ட்ஸ் அதிபர் மகேஸ், விக்னேஷ் ஜுவல்லர்ஸ் அதிபர் பொன்னையா, காயல்பட்டினம் ஜெஸ்மின் பாரடைஸ் அதிபர் ஹாஜி ஜெஸ்மின் ஏ.கே.கலீல், தொழிலதிபர் சண்முக வெங்கடேஷ், காயல்பட்டினம் நகர்மன்ற உறுப்பினர்களான எம்.ஜஹாங்கீர், எஸ்.ஏ.சாமு ஷிஹாபுத்தீன் உட்பட பல பிரமுகர்களும், பொதுமக்களும் கலந்துகொண்டனர்.





களத்தொகுப்பு & படங்கள்:
‘தமிழன்’ முத்து இஸ்மாஈல்

படங்களில் உதவி:
M.ஜஹாங்கீர்