{ முகநூல் கருத்துக்கள்}{ட்விட்டர் கருத்துக்கள்}

மவ்லானா அபுல் கலாம் ஆஸாத் நினைவு சுழற்கோப்பைக்கான அகில இந்திய கால்பந்து சுற்றுப்போட்டியின் இன்றைய முதலாவது காலிறுதிப் போட்டியில், திருவனந்தபுரம் கோஸ்டல் கால்பந்துக் கழக அணி வெற்றி பெற்று, அரையிறுதிப் போட்டியில் விளையாடத் தகுதி பெற்றுள்ளது. விரிவான விபரம் வருமாறு:-

காயல்பட்டினம் ஐக்கிய விளையாட்டு சங்கத்தின் சார்பில், மவ்லானா அபுல்கலாம் ஆஸாத் நினைவு சுழற்கோப்பைக்கான - அகில இந்திய அளவிலான கால்பந்து சுற்றுப்போட்டிகள் ஆண்டுதோறும் நடத்தப்பட்டு வருகிறது. 49ஆம் ஆண்டு சுற்றுப்போட்டிகள் மே 08ஆம் நாளன்று துவங்கியது. இன்று (மே 10) முதலாவது காலிறுதிப் போட்டி நடைபெற்றது. நேற்று வெற்றிபெற்ற சென்னை சிட்டி பொலிஸ் அணியும், மே 08ஆம் நாளன்று நடைபெற்ற துவக்கப் போட்டியில் வெற்றி பெற்ற திருவனந்தபுரம் கோஸ்டல் கால்பந்துக் கழக அணியும் களம் கண்டன.







ஆட்டத்தின் துவக்கம் முதல் இறுதி வரை விறுவிறுப்புக்குப் பஞ்சமில்லை. ஈரணிகளும் சம பலத்துடன் விளையாடியபோதிலும், திருவனந்தபுரம் அணியினரிடம் கூடுதல் வேகமும், நேர்த்தியும் காணப்பட்டது.









திருவனந்தபுரம் அணியின் வீரர்களான தீபு, 11ஆவது நிமிடத்தில் ஒரு கோலும், அஜீ 14 மற்றும் 43ஆவது நிமிடத்தில் இரண்டு கோல்களும் அடித்து, முதல் பாதியிலேயே கோல் கணக்கை 3 ஆக்கினர்.





சென்னை அணி வீரர் தேவராஜ் முதல் பாதியில் 12ஆவது நிமிடத்தில் ஒரு கோல் அடித்தார். இரண்டாவது பாதியில், ஆட்டம் நிறைவடைய ஒரு சில நிமிடங்கள் மட்டுமே எஞ்சியிருந்த நிலையில், 79ஆவது நிமிடத்தில் அவ்வணியின் சிவா ஒரு கோல் அடிக்க, மொத்த கோல்களின் எண்ணிக்கை 2 ஆனது. எப்படியும் இன்னொரு கோல் அடிக்கலாம் என அவர்கள் முனைப்பு காட்டியபோது, நேரம் நிறைவடைவதாக நடுவர் அறிவிக்கவே, 3-2 என்ற கோல் கணக்கில் திருவனந்தபுரம் அணி வெற்றி பெற்றது.



இன்று நடைபெற்ற முதலாவது காலிறுதிப் போட்டியில் வெற்றி பெற்றதன் மூலம் அவ்வணி, இம்மாதம் 23ஆம் நாள் வெள்ளிக்கிழமையன்று நடைபெறவுள்ள முதலாவது அரையிறுதிப் போட்டியில் விளையாடத் தகுதி பெற்றுள்ளது.

இன்றைய போட்டியை, நகரின் அனைத்துப் பகுதிகளைச் சேர்ந்த கால்பந்து ஆர்வலர்கள் ஆர்வத்துடன் கண்டு களித்தனர்.





















நாளை (மே 11) நடைபெறும் முதல் சுற்றுப் போட்டியில், திருவனந்தபுரம் - கோவளம் கால்பந்துக் கழக அணியும், தூத்துக்குடி - ப்ரெஸிடென்ட் லெவன் அணியும் மோதவுள்ளன.

போட்டி நிரல் வருமாறு:-



மவ்லானா அபுல் கலாம் ஆஸாத் நினைவு சுழற்கோப்பைக்கான அகில இந்திய கால்பந்துப் போட்டி தொடர்பான முந்தைய செய்தியைக் காண இங்கே சொடுக்குக!

கடந்தாண்டு (2013) மவ்லானா அபுல் கலாம் ஆஸாத் நினைவு சுழற்கோப்பைக்கான அகில இந்திய கால்பந்து மூன்றாம் நாள் போட்டி குறித்த செய்தியைக் காண இங்கே சொடுக்குக!