{ முகநூல் கருத்துக்கள்}{ட்விட்டர் கருத்துக்கள்}

இந்தியாவில் கல்வி காவிமயமாக்கப்படுவதையும், கட்டாய மதமாற்றம் செய்யப்படுவதையும், தமிழகத்தில் மின் கட்டண உயர்வையும் கண்டித்து, இந்திய யூனியன் முஸ்லிம் லீக் சார்பில் இம்மாதம் 30ஆம் நாளன்று பொதுக்கூட்டம் நடத்தப்படவுள்ளதாகவும், மலேஷிய நாட்டிலுள்ள இஸ்லாமிய பல்கலைக் கழக மாணவர் பேரவை முன்னாள் இயக்குநரும், இந்திய சமய நல்லிணக்கப் பேரவையின் தலைவரும், கல்வியாளருமான பானக்காடு செய்யித் முனவ்வர் அலீ ஷிஹாப் தங்ஙள் அக்கூட்டத்தில் சிறப்புரையாற்றவுள்ளதாகவும், அக்கட்சியின் காயல்பட்டினம் நகர பொதுக்குழுவில் அறிவிக்கப்பட்டுள்ளது.

கூட்ட நிகழ்வுகள் குறித்து, இந்திய யூனியன் முஸ்லிம் லீக் தூத்துக்குடி மாவட்ட செய்தி தொடர்பாளர் எஸ்.கே.ஸாலிஹ் வெளியிட்டுள்ள அறிக்கை:-

இந்திய யூனியன் முஸ்லிம் லீக் காயல்பட்டினம் நகர கிளை பொதுக்குழுக் கூட்டம், இம்மாதம் 14ஆம் நாள் ஞாயிற்றுக்கிழமையன்று 19.30 மணிக்கு, காயல்பட்டினம் சதுக்கைத் தெருவிலுள்ள - கட்சியின் நகர கிளை அலுவலகமான தியாகி பி.எச்.எம்.முஹம்மத் அப்துல் காதிர் மன்ஸிலில் நடைபெற்றது.





கட்சியின் நகர தலைவர் வாவு கே.எஸ்.முஹம்மத் நாஸர் கூட்டத்திற்குத் தலைமை தாங்கினார். மூத்த தலைவர் வாவு எஸ்.அப்துல் கஃப்பார், நகர பொருளாளர் எம்.ஏ.முஹம்மத் ஹஸன் ஆகியோர் முன்னிலை வகித்தனர்.

துணைத்தலைவர் எம்.கே.முஹம்மத் அலீ என்ற ஹாஜி காக்கா கிராஅத் ஓதி கூட்டத்தைத் துவக்கி வைத்தார். நகர செயலாளர் ஏ.எல்.எஸ்.அபூஸாலிஹ் அனைவரையும் வரவேற்றுப் பேசினார். மாநில துணைச் செயலாளர் எஸ்.ஏ.இப்றாஹீம் மக்கீ, தூத்துக்குடி மாவட்ட துணைத்தலைவர் மன்னர் பாதுல் அஸ்ஹப் ஆகியோர் கருத்துரையாற்றினர். நகர துணைச் செயலாளர் எம்.எச்.அப்துல் வாஹித் நன்றி கூற, கட்சியின் கவுரவ ஆலோசகர் மவ்லவீ எஸ்.எஸ்.இ.காழி அலாவுத்தீன் ஆலிம் துஆவுடன் கூட்டம் நிறைவுற்றது.

இக்கூட்டத்தில் நிறைவேற்றப்பட்ட தீர்மானங்கள் வருமாறு:-

தீர்மானம் 1 - டிச.30 அன்று பொதுக்கூட்டம்:

இந்தியாவில் கல்வி காவிமயமாக்கப்படுவதையும், கட்டாய மதமாற்றம் செய்யப்படுவதையும், தமிழகத்தில் மின் கட்டண உயர்வையும் கண்டித்து, இந்திய யூனியன் முஸ்லிம் லீக் சார்பில் இம்மாதம் 30ஆம் நாளன்று பொதுக்கூட்டம் நடத்திட இக்கூட்டம் தீர்மானிக்கிறது.

தீர்மானம் 2 - முஸ்லிம் லீக் கேரள மாநில தலைவர் வருகை:

டிசம்பர் 30 அன்று நடத்தப்படவுள்ள பொதுக்கூட்டத்தில், இந்திய யூனியன் முஸ்லிம் லீக் கேரள மாநில முன்னாள் தலைவர் மறைந்த பானக்காடு ஷிஹாப் தங்ஙள் அவர்களின் புதல்வரும், மலேஷிய நாட்டிலுள்ள இஸ்லாமிய பல்கலைக் கழக மாணவர் பேரவை முன்னாள் இயக்குநரும், இந்திய சமய நல்லிணக்கப் பேரவையின் தலைவரும், கல்வியாளருமான - பானக்காடு செய்யித் முனவ்வர் அலீ ஷிஹாப் தங்ஙள் அவர்களை சிறப்பழைப்பாளராகக் கலந்துகொண்டு சிறப்புரையாற்றச் செய்வதென்றும்,

கட்சியின் தமிழ்நாடு மாநில பொதுச் செயலாளர் கே.ஏ.எம்.முஹம்மத் அபூபக்கர், மாநில கொள்கை பரப்புச் செயலாளர் காயல் மகபூப் ஆகியோரையும் இக்கூட்டத்தில் பங்கேற்று உரையாற்ற அழைப்பது என்றும் தீர்மானிக்கப்படுகிறது.

தீர்மானம் 3 - நிதிக்குழு:

டிசம்பர் 30 அன்று நடத்தப்படவுள்ள பொதுக்கூட்டத்திற்கான செலவினங்களுக்கு நிதி திரட்டுவதற்காக, வாவு கே.எஸ்.முஹம்மத் நாஸர், எம்.ஏ.முஹம்மத் ஹஸன், எம்.கே.முஹம்மத் அலீ என்ற ஹாஜி காக்கா, பீ.எம்.எஸ்.அமானுல்லாஹ் ஆகியோரை நிதிக்குழுவினராக நியமித்து இக்கூட்டம் தீர்மானிக்கிறது.

தீர்மானம் 4 - பொதுக்கூட்ட ஒருங்கிணைப்புக் குழு:

டிசம்பர் 30 அன்று நடத்தப்படவுள்ள பொதுக்கூட்டத்திற்கான ஏற்பாட்டுப் பணிகளை ஒருங்கிணைப்பதற்காக, ஏ.எல்.எஸ்.அபூஸாலிஹ், மன்னர் பாதுல் அஸ்ஹப், எஸ்.ஏ.இப்றாஹீம் மக்கீ, எம்.எச்.அப்துல் வாஹித், எம்.இசட்.ஸித்தீக் ஆகியோரை ஒருங்கிணைப்புக் குழுவினராக நியமித்து இக்கூட்டம் தீர்மானிக்கிறது.

தீர்மானம் 5 - சிறப்பு விருந்தினருக்கு வரவேற்பு:

காயல்பட்டினத்தில் டிசம்பர் 30 அன்று நடைபெறவிருக்கும் பொதுக்கூட்டத்தில் சிறப்பு விருந்தினராகக் கலந்துகொள்ளவிருக்கும் பானக்காடு செய்யித் முனவ்வர் அலீ ஷிஹாப் தங்ஙள் அவர்கள் முதன்முறையாக நகருக்கு வருகை தருவதால், ஊர் மக்கள் பெருந்திரளாகச் சென்று அவருக்கு பைத் பாடி வரவேற்பளிக்க ஏற்பாடுகளைச் செய்வது என்றும், அதற்காக நகரின் அனைத்து ஜமாஅத்துக்களுக்கும் சென்று தகவல் தெரிவித்து அழைப்பு விடுப்பதற்காக, அரபி ஷாஹுல் ஹமீத், என்.டீ.அஹ்மத் ஸலாஹுத்தீன், எலக்ட்ரீஷியன் பஷீர் ஆகியோரடங்கிய ஜமாஅத் சந்திப்புக் குழுவை நியமித்து இக்கூட்டம் தீர்மானிக்கிறது.

இவ்வாறு தீர்மானங்கள் ஒருமனதாக நிறைவேற்றப்பட்டன.

தகவல் & படங்கள்:
S.A.இப்றாஹீம் மக்கீ

கூடுதல் படங்கள்:
A.R.ஷேக் முஹம்மத்

இந்திய யூனியன் முஸ்லிம் லீக் தொடர்பான முந்தைய செய்தியைக் காண இங்கே சொடுக்குக!

[சிறு திருத்தம் செய்யப்பட்டது @ 10:55 / 18.12.2014]