{ முகநூல் கருத்துக்கள்}{ட்விட்டர் கருத்துக்கள்}

அமைவிடம்:

காயல்பட்டினம் கிழக்குப் பகுதியில், தீவுத்தெரு - ஸீ-கஸ்டம்ஸ் சாலை, முத்துவாப்பா தைக்கா தெரு, சொளுக்கார் தெரு ஆகியவற்றை அணைத்தாற்போல் அமைந்துள்ளது மஸ்ஜிதுல் உஸ்ஃபூர் எனும் குருவித்துறைப்பள்ளி.





நிர்வாகம்:

இப்பள்ளியின் தலைவராக சேவையாற்றிய மர்ஹூம் மவ்லவீ ஹாஃபிழ் எஸ்.கே.ஷெய்கு அப்துல்லாஹ் ஜுமானீ அவர்களின் மறைவுக்குப் பின், பள்ளியின் துணைத்தலைவர் ஹாஜி நஹ்வீ இ.எஸ்.செய்யித் முஹம்மத் புகாரீ ஆலிம் அப்பொறுப்பைத் தற்காலிகமாகக் கவனித்து வருகிறார்.

ஹாஜி எஸ்.எம்.கபீர் பள்ளியின் செயலாளராகவும், ஹாஜி எம்.எஸ்.பி.முஹம்மத் இஸ்மாஈல் (எஸ்.ஜே.எம்.மெடிக்கல்ஸ்), ஹாஃபிழ் எஸ்.ஏ.முஹம்மத் இஸ்மாஈல் (சுலைமானிய்யா கார்ப்பரேஷன்) ஆகியோர் இணைச் செயலாளர்களாகவும் சேவையாற்றி வருகின்றனர்.

புதிய நிர்வாகிகள் தேர்வு:

நடப்பாண்டு, ஈதுல் ஃபித்ர் - நோன்புப் பெருநாள் நிறைவுற்ற பின் பள்ளியின் பொதுக்குழு கூட்டப்பட்டு, புதிய நிர்வாகிகள் தேர்ந்தெடுக்கப்படவுள்ளனர்.

இமாம் - பிலால்:

காயல்பட்டினத்தைச் சேர்ந்தவர்களான அஃப்ஸலுல் உலமா மவ்லவீ ஹாஃபிழ் எம்.எல்.முஹம்மத் அலீ பள்ளியின் இமாமாகவும், சதக்கு இப்றாஹீம் பிலாலாகவும் பணியாற்றி வருகின்றனர்.

நடப்பாண்டு ரமழான் தராவீஹ் சிறப்புத் தொழுகையை, காயல்பட்டினம் கொச்சியார் தெருவைச் சேர்ந்த ஹாஜி எஸ்.எம்.எஸ்.முஹம்மத் நளீம் (ஹாங்காங்) என்பவரின் மகனும், ஹாமிதிய்யா திருக்குர்ஆன் ஹிஃப்ழு மத்ரஸாவில் அண்மையில் ‘ஹாஃபிழுல் குர்ஆன்’ பட்டம் பெற்றவருமான ஹாஃபிழ் எம்.என்.முஹம்மத் ஸாலிஹ் வழிநடத்துகிறார்.

வழமை செயல்பாடுகள்:

ரமழான் அல்லாத காலங்களில் நாள்தோறும் ஐவேளை தொழுகையும், ரபீஉல் அவ்வல் மாதம் முதல் 12 நாட்களில் ஸுப்ஹான மவ்லித் மஜ்லிஸும், ரபீஉல் ஆகிர் மாதம் முதல் 11 நாட்களில் முஹ்யித்தீன் மவ்லித் மஜ்லிஸும், ஷஃபான் மாதம் 15ஆவது இரவில், நிஸ்ஃபு ஷஃபான் சிறப்பு நிகழ்ச்சியும் நடத்தப்பட்டு வருகிறது.

ரமழானில், நோன்புக் கஞ்சி வினியோகம், இஃப்தார் - நோன்பு துறப்பு நிகழ்ச்சி, தராவீஹ் தொழுகை, வித்ரிய்யா மஜ்லிஸ் ஆகியன நடத்தப்பட்டு வருகிறது.

ரமழான் பிறைக் கணக்கை பொதுமக்கள் இலகுவாக அறிந்திடும் பொருட்டு, இப்பள்ளி வளாகத்திலுள்ள கரும்பலகையில் நாள்தோறும் அரபி எழுத்துக்களுடன் பிறைக் கணக்கு பதிவு செய்யப்பட்டு வருகிறது.



ரமழான் 29ஆம் நாளன்று (கடைசி நாளன்று) மஹல்லா வாசிகள் மொத்தமாகப் பங்கேற்கும் வகையில் பள்ளி வளாகத்திலோ அல்லது பள்ளி நிர்வாகத்தின் சார்பில் மஜ்லிஸுல் புகாரி ஷரீஃப் வளாகத்திலோ தமாம் சாப்பாடு என்ற பெயரில் விருந்துபசரிப்பு செய்யப்படுகிறது. இதில், காயல்பட்டினம் பாரம்பரிய களறி சாப்பாடு அனைவருக்கும் ஸஹர் உணவாகப் பரிமாறப்படும்.

இப்பள்ளி மஹல்லாவிற்குட்பட்ட இளைஞர் ஐக்கிய முன்னணி (YUF) சங்கத்தில், ரமழான் மாதம் முழுவதும் நள்ளிரவு 03.30 மணி முதல் ஸஹர் நேர முடிவு வரை நாள்தோறும் ஸஹர் நேர ஒளிபரப்பு நடத்தப்பட்டு வருகிறது. ரமழான் 27ஆம் நாளன்று இரவு 12.00 மணியளவில் ராத்திபத்துல் காதிரிய்யா திக்ர் மஜ்லிஸும், அதனைத் தொடர்ந்து மார்க்க சொற்பொழிவு நிகழ்ச்சியும் இங்கு வழமையாக நடத்தப்பட்டு வருகிறது.

கஞ்சி கமிட்டி:

பள்ளியின் நடப்பாண்டு கஞ்சி தயாரிப்பு உள்ளிட்ட ரமழான் சிறப்பேற்பாடுகளை,
ஹாஜி எஸ்.எம்.எஸ்.முஹம்மத் நூஹ் தலைவராகவும்,
எம்.கே.செய்யித் முஹம்மத் துணைத்தலைவராகவும்,

ஹாஜி எஸ்.எம்.ஸதக்கத்துல்லாஹ்,
கம்பல்பக்ஷ் ஹாஜி எஸ்.எச்.மொகுதூம் முஹம்மத்,
எஸ்.ஐ.அஹ்மத் முஸ்தஃபா,
ஹாஜி ஏ.எம்.நூர் முஹம்மத் ஜக்கரிய்யா,
ஹாஜி சொளுக்கு ஏ.ஜெ.முஹ்யித்தீன் அப்துல் காதிர்,

நஹ்வீ எம்.எம்.முத்துவாப்பா,
எஸ்.ஏ.காஜா,
எம்.ஏ.கே.ஜெய்னுல் ஆப்தீன்,
எம்.ஏ.கே.முஹம்மத் முஹ்யித்தீன் (மேக்)
ஆகியோர் உறுப்பினர்களாகவும் பொறுப்பேற்று செய்து வருகின்றனர்.





ஊற்றுக் கஞ்சி வினியோகம்:

இப்பள்ளியில் தினமும் நோன்புக் கஞ்சி தயாரிக்கப்பட்டு, மாலை 05.00 மணியளவில் இல்லங்களுக்கு ஊற்றுக்கஞ்சியாக வினியோகிக்கப்பட்டு வருகிறது. ஊற்றுக்கஞ்சியை, இப்பள்ளி மஹல்லாவைச் சேர்ந்த குடும்பத்தினர், நகரில் வணிக நிறுவனங்களை நடத்துவோர் என 100 முதல் 150 பேர் வரை வந்து பெற்றுச் செல்கின்றனர்.

பள்ளிக்கூட பாட நேரம் நிறைவுற்ற பின்னர் கஞ்சி வினியோகிக்கப்படுவதால், ஊற்றுக்கஞ்சியைப் பெற்றிட மாணவர்கள் அதிகளவில் வருவது குறிப்பிடத்தக்கது.

செலவு விபரம்:

நடப்பாண்டு ரமழானில், பெரும்பாலும் தினமும் கறிகஞ்சியும், அவ்வப்போது வெண்கஞ்சியும் தயாரிக்கப்படுகிறது. நாளொன்றுக்கு
கிடா கறி கஞ்சிக்கு ரூபாய் 17,000 தொகையும்,
கோழிக் கறி கஞ்சிக்கு ரூபாய் 15,500 தொகையும்,
காய்கறி கஞ்சிக்கு ரூபாய் 14,000 தொகையும்,
வெண்கஞ்சிக்கு ரூபாய் 10,000 தொகையும் உத்தேசமாக செலவிடப்படுகிறது.

இஃப்தார் துணை உணவுப் பொருட்கள், தராவீஹ் தொழுகை நிறைவுற்ற பின் அனைவருக்கும் வழங்கப்படும் தேனீர், வித்ரிய்யா மஜ்லிஸில் வழங்கப்படும் நார்ஷா உள்ளிட்ட அன்றைய ஒருநாள் ரமழான் சிறப்பு ஏற்பாடுகளுக்கான அனைத்து செலவினங்களும் இதில் உள்ளடக்கம்.

இஃப்தார் நிகழ்ச்சி:

தினமும் நடத்தப்படும் இஃப்தார் - நோன்பு துறப்பு நிகழ்ச்சியில் சுமார் 80 முதல் 100 பேர் வரை கலந்துகொள்கின்றனர். அவர்களுக்கு பேரீத்தம்பழம், தண்ணீர் பாக்கெட், வடை, கஞ்சி, அவ்வப்போது கடற்பாசி மற்றும் குளிர்பானமும் பரிமாறப்படுகிறது.

துஆ மஜ்லிஸ்:

இஃப்தார் நிகழ்ச்சியில் கலந்துகொள்வோர் வீண் பேச்சுக்களைத் தவிர்த்திடும் நோக்குடன் தினமும் சுமார் 20 நிமிடங்கள் துஆ - பிரார்த்தனை மஜ்லிஸ் நடைபெறுகிறது. ஹாஃபிழ் எஸ்.எல்.செய்யித் அஹ்மத் முத்துவாப்பா இந்த துஆ மஜ்லிஸை நடத்தி வருகிறார்.



இம்மாதம் 17ஆம் தேதியன்று மாலையில் நோன்புக் கஞ்சி வினியோகிக்கப்பட்டபோது பதிவு செய்யப்பட்ட காட்சிகள் வருமாறு:-







இம்மாதம் 16ஆம் தேதியன்று இப்பள்ளியில் நடைபெற்ற இஃப்தார் - நோன்பு துறப்பு நிகழ்ச்சியின்போது பதிவுசெய்யப்பட்ட காட்சிகள் வருமாறு:-















இப்பள்ளியில் கடந்த ஆண்டு நடைபெற்ற இஃப்தார் - நோன்பு துறப்பு நிகழ்ச்சி குறித்த செய்தியைக் காண இங்கே சொடுக்குக!

இப்பள்ளியின் வரலாற்றுத் தகவல்கள் உள்ளிட்ட விபரங்களடங்கிய செய்தியைக் காண இங்கே சொடுக்குக!

படங்கள்:
ஹிஜாஸ் மைந்தன்
செய்தியாளர், காயல்பட்டணம்.காம்.