காயல்பட்டினம் அல்ஜாமிஉஸ் ஸகீர் - சிறிய குத்பா பள்ளியையடுத்து அமைந்துள்ளது மஹான் பேர் மஹ்மூத் மஜ்தூப் வலிய்யுல்லாஹ் தர்கா. மஹான் அவர்களின் 310ஆம் ஆண்டு கந்தூரி நிகழ்ச்சிகள், இம்மாதம் 16ஆம் தேதி நடைபெற்றது.

கந்தூரியை முன்னிட்டு, ரபீஉல் அவ்வல் பிறை 01 முதல் 13 வரை ஒவ்வொரு நாளும் ஃபஜ்ர் தொழுகைக்குப் பின் கத்முல் குர்ஆன் ஓதி ஈஸால் தவாப் செய்யப்பட்டது. பிறை 01 முதல் 14 வரை இஷா தொழுகைக்குப் பின் மார்க்க அறிஞர்களால் பல்வேறு தலைப்புகளில் உரை நிகழ்த்தப்பட்டது.

கந்தூரி நாளான 16ஆம் தேதியன்று மாலையில் மஹான் அவர்களின் புகழ் பாடும் மவ்லித் மஜ்லிஸ் நடைபெற்றது. மஃரிப் தொழுகைக்குப் பின் திக்ர் மஜ்லிஸும், இஷாவுக்குப் பின் மஹான் அவர்களின் வாழ்க்கைச் சரித சொற்பொழிவும் நடைபெற்றது. காயல்பட்டினம் அல்ஜாமிஉல் கபீர் - சிறிய குத்பா பள்ளியின் கத்தீப் மவ்லவீ எஸ்.எம்.முஹம்மத் ஃபாரூக் அல்ஃபாஸீ சொற்பொழிவாற்றினார்.









மறுநாள் 17ஆம் தேதி காலை ஃபஜ்ர் தொழுகைக்குப் பின் தபர்ருக் எனும் நேர்ச்சை வினியோகம் நடைபெற்றது.



அனைத்து நிகழ்ச்சிகளிலும், நகரின் பல்வேறு பகுதிகளைச் சேர்ந்த பொதுமக்கள் திரளாகக் கலந்துகொண்டனர்.

ஏற்பாடுகளை, வி.எம்.ஏ.முஹ்யித்தீன் அப்துல் காதிர், பி.எம்.ஏ.முஹ்யித்தீன் அப்துல் காதிர், ஹாஜி எஸ்.எச்.தைக்கா தம்பி, டி.எம்.கே.முஹம்மத் ஹஸன், ஹாஜி எஸ்.எம்.இத்ரீஸ், ஹாஜி எம்.எம்.முஹம்மத் ரஷீத், அரபி எம்.எம்.ஸூஃபீ ஷெய்கு அப்துல் காதிர் மற்றும் உறுப்பினர்கள் செய்திருந்தனர்.

தகவல் & படங்கள்:
K.M.T.சுலைமான்

பேர் மஹ்மூத் வலிய்யுல்லாஹ் அவர்களின் கடந்தாண்டு (309ஆம் ஆண்டு) கந்தூரி நிகழ்ச்சிகள் குறித்த செய்தியைக் காண இங்கே சொடுக்குக!