{ முகநூல் கருத்துக்கள்}{ட்விட்டர் கருத்துக்கள்}

இறைத்தூதர் நபிகள் நாயகம் ஸல்லல்லாஹு அலைஹி வஸல்லம் அவர்களின் பிறந்த நாளை முன்னிட்டு, காயல்பட்டினம் மஹ்ழரத்துல் காதிரிய்யா சபையின் மீலாது விழாக்குழு சார்பில் ஆண்டுதோறும் மீலாத் விழா கொண்டாடப்பட்டு வருகிறது.

நடப்பாண்டு விழா இம்மாதம் 04ஆம் நாள் ஞாயிற்றுக்கிழமையன்று நடைபெற்றது. அன்று 07.00 மணியளவில், ஃபர்ஸன்ஜி மவ்லித் மஹ்ழரா வளாகத்தில் ஓதப்பட்டது.



அதே நேரத்தில், மஹ்ழரா குர்ஆன் மத்ரஸா மாணவர்களின் ஸலவாத் மஜ்லிஸும் நடைபெற்றது.

16.45 மணிக்கு மீலாது பெருவிழா சிறப்புக் கூட்டம் மஹ்ழராவுக்கு வெளியே - அம்பல மரைக்காயர் தெருவில் அமைக்கப்பட்டிருந்த மேடையில் நடைபெற்றது.



மஹ்ழரா குர்ஆன் மத்ரஸா ஆசிரியர் ஹாஃபிழ் சொளுக்கு முஹ்யித்தீன் அப்துல் காதிர் தவ்ஹீத் கிராஅத் ஓத, அதனைத் தொடர்ந்து ‘அஹ்மதுல்லாஹ்’ பைத் அனைவராலும் நின்று பாடப்பட்டது. மஹ்ழரா துணைத்தலைவர் வாவு எஸ்.காதிர் ஸாஹிப் வரவேற்புரையாற்றினார்.

கூட்டத்திற்குத் தலைமை தாங்கிய - மஹ்ழரா அரபிக்கல்லூரியின் ஆசிரியர் மவ்லவீ ஹாஃபிழ் எஸ்.செய்யித் அப்துர்ரஹ்மான் தங்ஙள் அஹ்ஸனீ ஃபாழில் பாக்கவீ தலைமையுரையாற்றினார். அத்துடன் மாலை அமர்வு நிறைவுற்றது.





இரவு அமர்வு, 18.50 மணிக்கு, மஹ்ழரா குர்ஆன் மத்ரஸா மாணவர்களின் கஸீதத்துல் முஹம்மதிய்யா உள்ளிட்ட சன்மார்க்கப் பாடல்களுடன் துவங்கியது. இவ்விழாவில் சிறப்பழைப்பாளராகக் கலந்துகொண்ட - வேலூர் பாக்கியாத்துஸ் ஸாலிஹாத் அரபிக்கல்லூரியின் பேராசிரியர் மவ்லவீ ஹாஃபிழ் எம்.அப்துல் ஹமீத் ஃபாழில் பாக்கவீ சிறப்புரையாற்றினார்.



இந்த மீலாத் விழாவை முன்னிட்டு, முந்தைய நாட்களில் நடைபெற்ற மகளிருக்கான பேச்சுப்போட்டி, மகளிருக்கான திருக்குர்ஆன் மனனப் போட்டி, மஹ்ழரா குர்ஆன் மத்ரஸா மாணவர்களுக்கான சன்மார்க்கப் போட்டி, மஹ்ழரா அரபிக்கல்லூரி மாணவர்களுக்கான பேச்சுப் போட்டி ஆகிய போட்டிகளில் வெற்றிபெற்ற மாணவர்களுக்கு, மஹ்ழரா மீலாதுர் ரஸூல் கமிட்டியின் சார்பில், அதன் தலைவர் ஏ.ஆர்.அப்துல் வதூத் பரிசுகளை வழங்கினார்.





மஹ்ழரா மீலாதுர்ரஸூல் கமிட்டியின் செயலாளர் வாவு கே.எஸ்.முஹம்மத் நாஸர் நன்றி கூற, மஹ்ழரா செயற்குழு உறுப்பினர் மவ்லவீ ஹாஃபிழ் கே.ஏ.அஹ்மத் அப்துல் காதிர் துஆவுடன் விழா நிகழ்ச்சிகள் யாவும் நிறைவுற்றன. நிகழ்ச்சிகள் அனைத்தையும், மஹ்ழரத்துல் காதிரிய்யா சபையின் செயற்குழு உறுப்பினர் எம்.ஏ.செய்யித் முஹம்மத் அலீ நெறிப்படுத்தினார்.



அனைத்து நிகழ்ச்சிகளிலும், நகரின் அனைத்துப் பகுதிகளைச் சேர்ந்த பொதுமக்கள் திரளாகக் கலந்துகொண்டனர். நிறைவில் அனைவருக்கும் ‘தபர்ருக்’ எனும் நேர்ச்சை வினியோகிக்கப்பட்டது.



மஹ்ழரா மீலாத் விழாவை முன்னிட்டு, நிகழ்வு நாளன்று - காயல்பட்டினம் மஹப்பத்திர் ரஸூல் மீலாத் குழுவினர் ஸெய்யிதினா பிலால் பள்ளியிலிருந்து மஹ்ழரா வரை பேரணியாகச் சென்று, பிரார்த்தனை செய்தனர்.



படங்கள்:
A.R.ஷேக் முஹம்மத்

மஹ்ழரா மீலாதுர் ரஸூல் கமிட்டி சார்பில் கடந்தாண்டு (ஹிஜ்ரீ 1435) நடத்தப்பட்ட மீலாத் விழா குறித்த தகவல்களடங்கிய செய்தியைக் காண இங்கே சொடுக்குக!