{ முகநூல் கருத்துக்கள்}{ட்விட்டர் கருத்துக்கள்}

DCW தொழிற்சாலைக்கு எதிராக தொடரப்பட்ட வழக்கு, தேசிய பசுமை தீர்ப்பாயத்தில் ஜனவரி 29 அன்று மீண்டும் விசாரணைக்கு வந்தது. இதுகுறித்து, காயல்பட்டினம் சுற்றுச்சூழல் பாதுகாப்பு அமைப்பின் (KEPA) செய்தி தொடர்பாளர் எஸ்.கே.ஸாலிஹ் வெளியிட்டுள்ள அறிக்கை:-

DCW தொழிற்சாலையின் விரிவாக்கத் திட்டத்திற்கு வழங்கப்பட்ட அனுமதியை எதிர்த்து, காயல்பட்டினம் சுற்றுச்சூழல் பாதுகாப்பு அமைப்பு – KEPA சார்பில், தேசிய பசுமை தீர்ப்பாயத்தில் வழக்கு தொடரப்பட்டுள்ளது.

மே 26, 2014 அன்று தீர்ப்பாயத்தால் அனுமதிக்கப்பட்ட இந்த வழக்கு, தொடர்ந்து ஜூலை 10, 2014, ஆகஸ்ட் 28, 2014, நவம்பர் 13, 2014, டிசம்பர் 2, 2014 ஆகிய தேதிகளில் விசாரணைக்கு வந்தது.

ஆறு எதிர் மனுதாரர்களில், இது வரை - DCW நிறுவனம், தமிழ் நாடு மாசு கட்டுப்பாட்டு வாரியம் மற்றும் DCW தொழிற்சாலைக்கு ஆவணங்கள் தயார் செய்த இரு நிறுவனங்களில் ஒன்றான PURE ENVIRO ENGINEERING PRIVATE LIMITED ஆகியோர் பதில் தாக்கல் செய்துள்ளனர்.





ஜனவரி 29, 2015 அன்று மீண்டும் வழக்கு விசாரணைக்கு வந்தது. அப்போது, மத்திய சுற்றுச்சூழல் துறை அமைச்சக வழக்கறிஞர், பதிலை தாக்கல் செய்துவிட்டதாக தெரிவித்தார். தீர்ப்பாய அலுவலர்கள் - பதில் தாக்கல் ஆகவில்லை எனக்கூறவே, நீதிபதி - மனுதாரரான காயல்பட்டினம் சுற்றுச்சூழல் பாதுகாப்பு அமைப்புக்கு பதிலை வழங்கும்படி, மத்திய சுற்றுச்சூழல் துறை அமைச்சக வழக்கறிஞரிடம் கூறினார். [இது வரை வழக்கறிஞரால் பதில் மனு வழங்கப்படவில்லை என்பது குறிப்பிடத்தக்கது].

மாநில அரசின் சுற்றுச்சூழல் துறை வழக்கறிஞர் இத்தருணத்தில் - மத்திய அரசு துறையின் பதிலின் நகலினை கோரினார். அப்போது குறுக்கிட்ட நீதிபதி, ஒரு பிரதிவாதிக்கு மற்றொரு பிரதிவாதியின் பதில் வழங்குவது வழமை இல்லை என்றும், அவசியம் என்றால் விண்ணப்பம் செய்து பெற்றுக்கொள்ளும்படியும் கூறினார். மேலும் - மாநில அரசின் சுற்றுச்சூழல் துறை வழக்கறிஞர், தனது தரப்பு பதிலை தாக்கல் செய்ய, இரு வாரங்கள் கால அவகாசம் கேட்டார்.

DCW நிறுவனத்திற்கு ஆவணங்கள் தயாரித்த மற்றொரு நிறுவனமான CHOLAMANDALAM MS RISK SERVICES LTD நிறுவனத்தின் வழக்கறிஞர், தங்கள் தரப்பு பதில் தயார் என்றும், தவறுதலாக - பதிலை, தாளின் இரு பக்கங்களிலும் அச்சிட்டுவிட்டதாகவும், திருத்திட நேரம் வேண்டும் எனவும் கோரினார்.

இதனை தொடர்ந்து, வழக்கினை - பிப்ரவரி 25க்கு தீர்ப்பாயம் ஒத்திவைத்தது.

இவ்வழக்கில் காயல்பட்டினம் சுற்றுச்சூழல் பாதுகாப்பு அமைப்பு (KEPA) சார்பாக வழக்கறிஞர்கள் டி.நாகசைலா, டாக்டர் வி.சுரேஷ் மற்றும் பிரீஸ்ட்லி மோசஸ் ஆகியோர் ஆஜராகின்றனர்.

மத்திய அரசு சார்பாக வழக்கறிஞர் திருமதி சி.சங்கமித்திரை, DCW நிறுவனம் சார்பாக வழக்கறிஞர்கள் ஆர்.வெங்கட்டவதன் மற்றும் நிவேதிதா, தமிழ்நாடு மாசு கட்டுப்பாட்டு வாரியம் சார்பாக வழக்கறிஞர் திருமதி ரீதா சந்திரசேகர், தமிழக அரசு சார்பாக வழக்கறிஞர்கள் எம்.கே. சுப்ரமணியம் மற்றும் எம்.ஆர்.கோகுல் கிருஷ்ணன், PURE ENVIRO ENGINEERING PRIVATE LIMITED நிறுவன்ம் சார்பாக வழக்கறிஞர் வி.ஸ்ரீனிவாச பாபு, CHOLAMANDALAM MS RISK SERVICES LIMITED சார்பாக வழக்கறிஞர் பி.பிரேம்குமார் ஆகியோர் இவ்வழக்கில் ஆஜராகின்றனர்.