{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினம் குத்துக்கல் தெருவில் இயங்கி வரும் ரஹ்மத்துன் லில் ஆலமீன் மீலாது பேரியம் சார்பில் நடத்தப்பட்ட மீலாத் விழாவில், போட்டிகள் பல நடத்தப்பட்டு, வென்றோருக்கு பரிசுகளும் வழங்கப்பட்டுள்ளன. விரிவான விபரம் வருமாறு:-

காயல்பட்டினம் குத்துக்கல் தெருவில், முஹ்யித்தீன் பள்ளியருகில் கடந்த 31 ஆண்டுகளாக மேலாக இயங்கி வருகிறது ரஹ்மத்துன் லில் ஆலமீன் மீலாது பேரியம். இதன் சார்பில் ஆண்டுதோறும் மீலாத் விழாக்கள் நடத்தப்பட்டு, சன்மார்க்கப் போட்டிகள் நடத்தி - பரிசுகளும் வழங்கப்படுவது வழமை.

நடப்பாண்டு மீலாத் விழா மற்றும் அமைப்பின் 32ஆம் ஆண்டு துவக்க விழா நிகழ்ச்சிகள், ஹிஜ்ரீ 1437 - ரபீஉல் அவ்வல் 28, 29 ஆகிய நாட்களில், (2016 ஜனவரி மாதம் 09, 10 சனி, ஞாயிறு நாட்களில்) நடைபெற்றன.

09.01.2016. சனிக்கிழமையன்று நடைபெற்ற முதல் நாள் நிகழ்ச்சியில், நகரின் பல்வேறு பகுதிகளைச் சேர்ந்த 7 சிறுவர்களை பைத் பாடி நகர்வலமாக அழைத்துச் சென்று, சுன்னத் செய்யும் வைபவம் நடத்தப்பட்டது.





காலை அமர்வு:

09.30 மணிக்கு, நபிகள் நாயகம் புகழ்பாடும் மவ்லித் மஜ்லிஸ் நடைபெற்றது. ஹாஃபிழ் ஜெ.எஸ்.அல்தாஃப் அஹ்மத் கிராஅத் ஓதி துவக்கி வைத்தார்.

மாலை அமர்வு:

16.30 மணிக்கு, நெல்லை (பொட்டல்புதூர்) ரிஃபாய் ஜமா பக்கீர், பாஞ்ச்பீர் எம்.செய்யித் முஹம்மத் முஹ்யித்தீன் குழுவினரின் - நபிகளார் புகழ்பாடும் தஃப்ஸ் நிகழ்ச்சி, எம்.எம்.முஹம்மத் முஹ்யித்தீன் முன்னிலையில் நடைபெற்றது.



இரவு அமர்வு:

18.30 மணியளவில், பேராசிரியர் கே.எம்.எஸ்.சதக்கு தம்பி, எஸ்.எச்.ரஹ்மத்துல்லாஹ் ஆகியோர் முன்னிலையில் துவங்கிய அமர்வை, முஹ்யித்தீன் பள்ளியின் இமாம் நஹ்வீ எம்.எம்.முத்துவாப்பா நெறிப்படுத்தினார். ஹாஃபிழ் பீ.ஒய்.எஸ்.ஹாரிஸ் ஹல்லாஜ் கிராஅத் ஓதி துவக்கி வைத்தார். காயல் எஸ்.இ.அமானுல்லாஹ் வரவேற்புரையாற்றினார்.

இவ்வமர்விற்குத் தலைமை தாங்கிய - பெரிய குத்பா பள்ளியின் கத்தீபும், முஅஸ்கர் மகளிர் அரபிக்கல்லூரிகளின் நிறுவனருமான மவ்லவீ ஹாஃபிழ் எச்.ஏ.அஹ்மத் அப்துல் காதிர் மஹ்ழரீ தலைமையுரையாற்றினார்.

தொடர்ந்து, உத்தமபாளையம் ஹாஜி கருத்த ராவுத்தர் கவ்திய்யா கல்லூரியின் தமிழ்த்துறை பேராசிரியர் முனைவர் மு.அப்துஸ் ஸமத் தலைமையில் நபிகளார் புகழ் கூறும் தமிழ் சொல்லரங்கமும், “எம்பெருமானார் ஸல்லல்லாஹு அலைஹி வஸல்லம் அவர்கள் வாழ்ந்த வழியில், இனிய இல்லறம் அமைய பெரிதும் விட்டுக் கொடுக்க வேண்டியது ஆண்களா, பெண்களா?” எனும் தலைப்பில் பட்டிமண்டபமும் நடைபெற்றன.

உடுமலைப் பேட்டை ஃபிர்தவ்ஸிய்யா பள்ளியின் இமாம் மவ்லவீ எஸ்.முஹம்மத் யூஸுஃப் ஸிராஜீ, மதுரை வக்ஃப் வாரியக் கல்லூரியின் தமிழ்த்துறைத் தலைவர் முனைவர் கே.ஷாஹுல் ஹமீத் ஆகியோர் “ஆண்களே!” எனும் அணியிலும், கோயமுத்தூர் மஸ்ஜிதுல் ஜன்னா பள்ளியின் இமாம் எம்.அப்துல் மாலிக் ஸிராஜீ, இளையாங்குடி டாக்டர் ஜாஹிர் ஹுஸைன் கல்லூரியின் பேராசிரியர் கே.அப்துர்ரஹீம் ஆகியோர் “பெண்களே!” எனும் அணியிலும் பங்கேற்று உரையாற்றினர்.

சட்னி எஸ்.ஏ.கே.செய்யித் மீரான் நன்றி கூற, ஃபாத்திஹா – துஆவுடன் முதல்நாள் நிகழ்ச்சிகள் நிறைவுற்றன.



இரண்டாம் நாள் காலை அமர்வு:

அருள்மறை குர்ஆனை அகத்திலேந்திய ஹாஃபிழ்களுக்கான - திருக்குர்ஆன் மனனப் போட்டி, ஜெஸ்மின் ஏ.கே.கலீலுர்ரஹ்மான் முன்னிலையில் நடைபெற்றது. ஹாஃபிழ் எம்.எச்.முத்துவாப்பா கிராஅத் ஓதி துவக்கி வைத்தார்.





மாலை அமர்வு:

16.30 மணிக்கு, “சிறுவர்களை நேசித்த செம்மல் நபி ஸல்லல்லாஹு அலைஹி வஸல்லம் அவர்கள்” எனும் தலைப்பில், 15 வயதுக்குட்பட்டோருக்கான பேச்சுப்போட்டி நடைபெற்றது. ஏராளமான மாணவர்கள் பங்கேற்ற இப்போட்டியின் நிறைவில், ஹாமிதிய்யா மார்க்கக் கல்வி நிறுவனத்தைச் சேர்ந்த 3 மாணவர்கள் முதல் மூன்றிடங்களைப் பெற்றனர்.



இரவு அமர்வு:

சோல்ஜர் அப்துல்லாஹ் ஸாஹிப், கே.எல்.டீ.அஹ்மத் முஹ்யித்தீன் ஆகியோர் முன்னிலையில் துவங்கிய இரவு அமர்வை, மஸ்ஜித் மீக்காஈல் பள்ளியின் இமாம் ஹாஃபிழ் இசட்.எம்.முஹம்மத் முஹ்யித்தீன் கிராஅத் ஓதி துவக்கி வைத்தார். என்.எம்.எச்.முஹம்மத் முஹ்யித்தீன் அனைவரையும் வரவேற்றுப் பேசினார்.

இவ்வமர்விற்குத் தலைமை தாங்கிய - சிறிய குத்பா பள்ளியின் கத்தீப் மவ்லவீ ஹாஃபிழ் நஹ்வீ எஸ்.ஏ.கே.முஹம்மத் முஹ்யித்தீன் மஹ்ழரீ, தலைமையுரையாற்றினார்.



அண்ணலார் புகழ்பாடும் நஅத் மஜ்லிஸ் மற்றும் தஃப்ஸ் நிகழ்ச்சியை, ஆசிரியர் இசட்.ஏ.ஷெய்கு அப்துல் காதிர் தலைமையில் குழுவினர் நடத்தினர்.





விழாவில் சிறப்பு விருந்தினராகக் கலந்துகொண்ட - திருவிதாங்கோடு ஜாமிஉல் அன்வர் அரபிக் கல்லூரியின் முதல்வர் மவ்லவீ எம்.தாஜுத்தீன் அஹ்ஸனீ, “நபிகள் நாயகம் ஸல்லல்லாஹு அலைஹி வஸல்லம் அவர்களின் பேரன்பில் பேரின்பம்” எனும் தலைப்பில் சிறப்புரையாற்றினார்.



இக்ராஃ மூலம் ரூ. 30 ஆயிரம் கல்வி உதவித்தொகை:

இக்ராஃ கல்விச் சங்கத்தின் கல்வி உதவித்தொகை வழங்கும் திட்டத்தின் கீழ், நடப்பாண்டு கல்வி உதவித்தொகைக்காக 30 ஆயிரம் ரூபாய் வழங்கப்படுவதாக விழாவில் அறிவிக்கப்பட்டது.

பரிசளிப்பு:

தொடர்ந்து பரிசளிப்பு நிகழ்ச்சி நடைபெற்றது. ஹிஃப்ழுப் போட்டியில் சிறப்பிடங்களைப் பெற்ற முதல் மூவருக்கு முறையே ரூபாய் 2000, 1500, 1000 பணப்பரிசுகளும், பேச்சுப்போட்டியில் சிறப்பிடங்களைப் பெற்ற முதல் மூவருக்கு முறையே ருபாய் 1500, 1250, 1000 பணப்பரிசுகளும் வழங்கப்பட்டன. ஹிஃப்ழுப் போட்டியில் பங்கேற்ற அனைத்து பங்கேற்பாளர்களுக்கும் 300 ரூபாயும், பேச்சுப்போட்டியில் கலந்துகொண்ட அனைத்து பங்கேற்பாளர்களுக்கும் 250 ரூபாயும் ஆறுதல் பரிசாக வழங்கப்பட்டன. பரிசுகளை, மேடையில் அங்கம் வகித்தோர் மாணவர்களுக்கு வழங்கினர்.

அனைத்து நிகழ்ச்சிகளிலும், நகரின் பல்வேறு பகுதிகளைச் சேர்ந்த பொதுமக்கள் திரளாகக் கலந்துகொண்டனர்.

தகவல் & படங்கள்:
சட்னி S.A.K.செய்யித் மீரான்

ரஹ்மத்துன் லில் ஆலமீன் மீலாது பேரியத்தால் கடந்தாண்டு (ஹிஜ்ரீ 1436) நடத்தப்பட்ட மீலாத் விழா தொடர்பான முந்தைய செய்தியைக் காண இங்கே சொடுக்குக!

ரஹ்மத்துன் லில் ஆலமீன் மீலாது பேரியம் தொடர்பான முந்தைய செய்தியைக் காண இங்கே சொடுக்குக!

[கூடுதல் தகவல்களுடன் செய்தி திருத்தப்பட்டு, கூடுதல் படங்கள் இணைக்கப்பட்டன @ 16:03 / 18.01.2016.]