{ முகநூல் கருத்துக்கள்}{ட்விட்டர் கருத்துக்கள்}

தமிழ்நாடு சட்டமன்றத் தேர்தல் இம்மாதம் 13ஆம் தேதி நடைபெறவிருக்கிறது.

இத்தேர்தலையொட்டி இன்று (வெள்ளிக்கிழமை) முதல் வாக்குப்பதிவு முடிவடையும் தேதி (13.04.2011) வரை இரவு நேரங்களில் மின்வெட்டு செய்யக்கூடாது என தேர்தல் ஆணையம் உத்தரவிட்டுள்ளது.

தமிழகத்தில் நிலவி வரும் மின்சார பற்றாக்குறை காரணமாக, சென்னையைத் தவிர்த்து மாநிலத்தின் அனைத்து மாவட்டங்களிலும் மின்வெட்டு நடைமுறையில் உள்ளது. மின்சாரத் தேவையை சமாளிக்க ஒவ்வொரு நாளும் இரண்டு மணி நேரம் மின்வெட்டு செய்யப்படுகிறது. இந்த மின்வெட்டு முறை கடந்த சில ஆண்டுகளாக நடைமுறையில் இருந்து வருகிறது.

நாடாளுமன்றத் தேர்தல் நடைபெற்றபோது இரவு நேரங்களில் தமிழகத்தின் பல்வேறு பகுதிகளில் மின்சாரம் நிறுத்தப்பட்டது. வாக்காளர்களுக்கு இருளில் பணம் வினியோகம் செய்வதற்காகவே மின்சாரம் நிறுத்தப்பட்டதாக பல்வேறு கட்சிகளும் புகார் எழுப்பின.

அந்தச் சூழ்நிலையில் மின்வெட்டு குறித்து தேர்தல் ஆணையம் கேள்வி எழுப்பியது. மின்சார வாரியத்திடம் விளக்கம் கேட்டது. அதைத் தடுப்பதற்கு போதுமான நடவடிக்கையை எடுக்க முடியாத நிலை ஏற்பட்டது.

நாடாளுமன்றத் தேர்தலில் கிடைத்த அனுபவங்களை வைத்து சட்டப்பேரவைத் தேர்தலில் பல்வேறு கடும் நடவடிக்கைகளை தேர்தல் ஆணையம் எடுத்து வருகிறது. அதன் ஒரு பகுதியே, தமிழகத்தில் இரவு மின்வெட்டு செய்யக்கூடாது என்பதாகும்.

இது தொடர்பாக, தேர்தல் ஆணைய அதிகாரிகள் கூறுகையில், “வாக்குப்பதிவு நடைபெறவுள்ள நாளுக்கு சில தினங்களுக்கு முன்னதாக வாக்காளர்களுக்கு பணம் கொடுக்கும் சம்பவங்கள் நடைபெறலாம்.

குறிப்பாக, இரவு நேரங்களில் மின்சாரம் நிறுத்தப்பட்டு பணம் அளிக்கப்படக் கூடும் என தகவல்கள் வந்துள்ளன. எனவே, வாக்குப்பதிவு தினத்துக்கு ஐந்து நாட்களுக்கு முன்னதாக - அதாவது, வரும் வெள்ளிக்கிழமை (இன்று) முதல் இரவில் மின்சாரம் தடைபடக் கூடாது என மின்சார வாரியம் அறிவுறுத்தப்பட்டுள்ளது” என தெரிவித்தனர்.

தேர்தல் ஆணையத்தின் உத்தரவு குறித்து, மின்வாரிய அதிகாரிகள் கூறியது: தமிழகத்தில் தேர்வு நேரம் என்பதால் இரவு நேரத்தில் மின்சாரத்தை நிறுத்தக் கூடாது என்று கூறியுள்ளோம்...

சென்னையைத் தவிர்த்து மற்ற மாவட்டங்களில் பகல் நேரத்தில் இரண்டு மணி நேரம் மட்டுமே மின்சாரத்தை நிறுத்த வேண்டும் என அதிகாரிகளுக்கு ஏற்கனவே உத்தரவு பிறப்பிக்கப்பட்டுள்ளது. தேர்தல் ஆணையமும் இப்போது உத்தரவை வெளியிட்டுள்ளது. வேறு ஏதாவது அசம்பாவிதம் ஏற்பட்டு இரவு நேரத்தில் மின்சாரம் தடைபட்டால் உடனடியாக அதை சரிசெய்ய வேண்டும் என ஊழியர்கள் அறிவுறுத்தப்பட்டுள்ளனர்” என்று தெரிவித்துள்ளனர்.

நன்றி:
தினமணி நாளிதழ் (நெல்லை பதிப்பு - நாள்: 07.04.2011)