{ முகநூல் கருத்துக்கள்}{ட்விட்டர் கருத்துக்கள்}

உலக காயல் நல மன்றங்களின் கல்வித்துறைக் கூட்டமைப்பான காயல்பட்டினம் இக்ராஃ கல்விச் சங்கம் மற்றும் தி காயல் ஃபர்ஸ்ட் ட்ரஸ்ட் அமைப்புகள் சார்பில், “சந்தியுங்கள் மாநிலத்தின் முதன்மாணவரை - 2011” நிகழ்ச்சி இன்று மாலை 04.30 மணிக்கு காயல்பட்டினம் ஐக்கிய விளையாட்டு சங்க மைதானத்தில் நடத்தப்படுகிறது.

இவ்விழாவிற்கு வாழ்த்து தெரிவித்து சிங்கப்பூர் காயல் நல மன்றம் சார்பில் அதன் நிறுவனரும், ஆலோசகருமான ஹாஜி பாளையம் முஹம்மத் ஹஸன், தலைவர் எம்.ஆர்.ரஷீத் ஜமான் இணைந்து வெளியிட்டுள்ள அறிக்கை பின்வருமாறு:-

உலக காயல் நல மன்றங்களின் கல்வித்துறைக் கூட்டமைப்பான காயல்பட்டினம் இக்ராஃ கல்விச் சங்கம் மற்றும் தி காயல் ஃபர்ஸ்ட் ட்ரஸ்ட் அமைப்புகள் சார்பில், இன்று மாலை 04.30 மணிக்கு காயல்பட்டினம் ஐக்கிய விளையாட்டு சங்க மைதானத்தில் நடைபெறவுள்ள “சந்தியுங்கள் மாநிலத்தின் முதன்மாணவரை - 2011” நிகழ்ச்சி,

நாளை (25.06.2011) காலை 10.00 மணிக்கு காயல்பட்டினம் எல்.கே.மெட்ரிகுலேஷன் மேனிலைப்பள்ளி வளாகத்தில் நடைபெறவுள்ள, “மாநில சாதனை மாணவியுடன் நகர பள்ளி மாணவ-மாணவியர் கலந்துரையாடல்” நிகழ்ச்சி ஆகிய இவ்வரிய நிகழ்ச்சிகள் இறையருளால் முழு வெற்றி பெற்றிடவும், அதன்மூலம் நம் நகரின் மாணவ சமுதாயத்திற்கு சிறந்த வழிகாட்டுதல் கிடைத்திடவும், அதன் பயனாக வரும் ஆண்டில் காயல்பட்டினத்தைச் சார்ந்த மாணவர் மாநில அளவில் முதலிடம் பெற்றிடவும் எமது சிங்கப்பூர் காயல் நல மன்றம் சார்பில் மனதார வாழ்த்திப் பிரார்த்திக்கிறோம்.

எங்கள் உடல்தான் இங்கு உள்ளதே தவிர, உள்ளம் முழுதும் இன்று ஊரைச் சுற்றியே உள்ளது... இந்த அருமையான நிகழ்ச்சியில் இன்று எங்களுக்கு கலந்துகொள்ளவியலாமல் போனாலும், எங்கள் மன்ற செயலாளர் இளவல் மொகுதூம் முஹம்மத் எங்கள் மன்றத்தார் அனைவர் சார்பாகவும் இவ்விழாவில் முன்னிலை வகிக்கவிருப்பதறிந்து மட்டற்ற மகிழ்ச்சியடைகிறோம். அவர் கலந்துகொள்வதை, நாங்களனைவரும் கலந்துகொண்டதாக மனதிற்கொள்கிறோம்.

வல்ல அல்லாஹ் நம் யாவரின் தன்னலமற்ற நகர்நலச் சேவைகளை அங்கீகரித்து, ஈருலக நற்பேறுகளை நிறைவாகத் தந்தருள்வானாக, ஆமீன்.

இவ்வாறு அந்த அறிக்கையில் தெரிவிக்கப்பட்டுள்ளது.