{ முகநூல் கருத்துக்கள்}{ட்விட்டர் கருத்துக்கள்}

பள்ளி மாணவர்களுக்கு கால்பந்து விளையாட்டின் மீதான ஆர்வத்தை அதிகரிக்கவும், அவர்களிடையே புதைந்திருக்கும் விளையாட்டுத் திறனை வெளிக்கொணரும் நோக்குடனும், காயல்பட்டினம் ஐக்கிய விளையாட்டு சங்கம் சார்பில், யுனைட்டெட் சூப்பர் கோப்பை கால்பந்து சுற்றுப் போட்டி இவ்வாண்டு அறிமுகப்படுத்தப்பட்டு, 09 முதல் 12ஆம் வகுப்பு வரை பயிலும் பள்ளி மேனிலை மாணவர்களுக்கான யுனைட்டெட் ஃபுட்பால் லீக் சீனியர் சுற்றுப்போட்டி இம்மாதம் 09ஆம் தேதியன்று இறுதிப்போட்டி நடத்தி முடிக்கப்பட்டுள்ளது.

அதனைத் தொடர்ந்து, 06 முதல் 08ஆம் வகுப்பு வரை பயிலும் பள்ளி இளநிலை மாணவர்களுக்கான யுனைட்டெட் ஃபுட்பால் லீக் - யு.எஃப்.எல். ஜூனியர் கால்பந்து சுற்றுப்போட்டி இம்மாதம் 28ஆம் தேதியன்று துவங்கி, அக்டோபர் 01ஆம் தேதி (நாளை) வரை நடைபெறுகிறது.

இச்சுற்றுப்போட்டியில், காலரி பேர்ட்ஸ், கே.பி.ஹார்ட் ராக்கர்ஸ், ஸ்பீட் ஸ்ட்ரைக்கர்ஸ், ஹார்டி பாய்ஸ் ஆகிய அணிகள் லீக் முறையில் பங்கேற்கின்றன.


காலரி பேர்ட்ஸ் அணி


ஹார்டி பாய்ஸ் அணி


கே.பி.ஹார்ட் ராக்கர்ஸ் அணி


ஸ்பீட் ஸ்ட்ரைக்கர்ஸ் அணி

இம்மாதம் 28, 29 மற்றும் 30 (இன்று) தேதிகளில், காயல்பட்டினம் ஐக்கிய விளையாட்டு சங்க மைதானத்தில் தினமும் காலை வேளையில் லீக் போட்டிகள் நடத்தி முடிக்கப்பட்டுள்ளது.

28ஆம் தேதியன்று நடைபெற்ற முதல் லீக் போட்டியில், ஹார்டி பாய்ஸ் அணியை எதிர்த்தாடிய கே.பி.ஹார்ட் ராக்கர்ஸ் அணி 2-0 என்ற கோல் கணக்கில் வென்றது.

அடுத்து நடைபெற்ற போட்டியில், காலரி பேர்ட்ஸ் அணியை எதிர்த்தாடிய ஸ்பீட் ஸ்ட்ரைக்கர்ஸ் அணி 2-1 என்ற கோல் கணக்கில் வென்றது.

29ஆம் தேதியன்று துவக்கமாக நடைபெற்ற மூன்றாவது லீக் போட்டியில், ஸ்பீட் ஸ்ட்ரைக்கர்ஸ் அணியும், கே.பி.ஹார்ட் ராக்கர்ஸ் அணியும் மோதின. இப்போட்டியில் ஈரணிகளும் கோல் எதுவும் அடிக்காமல் சமநிலையில் போட்டி நிறைவுற்றது.

அடுத்து நடைபெற்ற நான்காவது லீக் போட்டியில் காலரி பேர்ட்ஸ் அணியும், ஹார்டி பாய்ஸ் அணியும் களம் கண்டன. இப்போட்டியிலும், ஈரணிகளும் கோல் எதுவும் அடிக்காமல் சமநிலையில் நிறைவுற்றது.

30ஆம் தேதியன்று (இன்று) காலையில் நடைபெற்ற ஐந்தாவது லீக் போட்டியில், காலரி பேர்ட்ஸ் அணியை எதிர்த்தாடிய கே.பி.ஹார்ட் ராக்கர்ஸ் அணி 1-0 என்ற கோல் கணக்கில் வெற்றிபெற்றது.

அடுத்து நடைபெற்ற ஆறாவது லீக் ஆட்டத்தில் மோதிய ஸ்பீட் ஸ்ட்ரைக்கர்ஸ் - ஹார்டி பாய்ஸ் அணிகள், தலா ஒரு கோல் போட்ட நிலையில் ஆட்டம் சமனில் முடிவுற்றது.

இதனையடுத்து, அதிக புள்ளிகள் பெற்ற கே.பி.ஹார்ட் ராக்கர்ஸ் அணியும், ஸ்பீட் ஸ்ட்ரைக்கர்ஸ் அணியும் நாளை மாலையில் நடைபெறவுள்ள இறுதிப்போட்டியில் மோதவுள்ளன. மூன்றாம், நான்காம் இடத்திற்கான அணிகளைத் தேர்வு செய்யும் போட்டியும் நாளை நடைபெறவுள்ளது.

இறுதிப்போட்டியின் நிறைவில் நடைபெறவுள்ள பரிசளிப்பு விழாவில், இச்சுற்றுப்போட்டியில் பங்கேற்றுள்ள அனைத்தணிகளுக்கும் பரிசுகள் வழங்கப்படவுள்ளதாக போட்டி ஏற்பாட்டாளர்கள் தெரிவித்துள்ளனர்.

தகவல் & படங்கள்:
ஆசிரியர் S.B.B.புகாரீ