இறைத்தூதர் முஹம்மத் ஸல்லல்லாஹு அலைஹி வஸல்லம் அவர்கள் இறையழைப்பை ஏற்று விண்ணுலகப் பயணம் மேற்கொண்டதை நினைவுகூரும் வகையில் ஆண்டுதோறும் ரஜப் மாதம் 27ஆம் நாளில் காயல்பட்டினத்தில் பல்வேறு நிகழ்ச்சிகள் நடத்தப்படுவது வழமை.

அந்த அடிப்படையில், காயல்பட்டினம் புதுப்பள்ளி சதுக்கையில் அமைந்துள்ள ரிஸ்வான் சங்கம் சார்பில், பாளையம் மஹ்மூத் சுலைமான் லெப்பை ஆலிம் திடலில் வழமை போல - மிஃராஜ் தின சிறப்பு நிகழ்ச்சி, 06.06.2013 அன்று நடைபெற்றது. அன்று மாலையில், மவ்லித் மஜ்லிஸ், பாளையம் பி.எம்.எஸ்.நஈம் உதுமான் தலைமையில் நடைபெற்றது.





அதனைத் தொடர்ந்து, இரவு 08.30 மணியளவில், மிஃராஜ் சிறப்புரை நடைபெற்றது. இந்நிகழ்ச்சியில், ”வேந்தர் நபியின் விண்ணுலகப் பயணம்” என்ற தலைப்பில், காயல்பட்டினம் முஹ்யித்தீன் பள்ளியின் இமாம் மவ்லவீ ஏ.கே.அபூ மன்ஸூர் மஹ்ழரீ சிறப்புரையாற்றினார்.

அதனைத் தொடர்ந்து, புதுப்பள்ளி இமாம் மற்றும் பிலால் ஆகியோருக்கு பள்ளி நிர்வாகத்தின் சார்பில், அதன் துணைத்தலைவர் ஹாஜி எஸ்.எஸ்.எம்.புகாரீ சால்வை அணிவித்து கண்ணியப்படுத்தினார்.

புதுப்பள்ளியின் இமாம் ஹாஃபிழ் செய்யித் நூஹ் துஆவுடன் நிகழ்ச்சி நிறைவுற்றது. இந்நிகழ்ச்சியில் நகரின் பல பகுதிகளைச் சார்ந்த பொதுமக்கள் திரளாகக் கலந்துகொண்டனர். அனைவருக்கும் நேர்ச்சை வினியோகிக்கப்பட்டது.

நிகழ்ச்சி ஏற்பாடுகளை ரிஸ்வான் சங்க அங்கத்தினர் செய்திருந்தனர்.