{ முகநூல் கருத்துக்கள்}{ட்விட்டர் கருத்துக்கள்}

ஐக்கிய அரபு அமீரகம் - துபை காயல் நல மன்றத்தின் பொதுக்குழுக் கூட்டம் மற்றும் காயலர் தின நிகழ்ச்சிகள், இம்மாதம் 14ஆம் நாளன்று நடைபெறவுள்ளதாகவும், ஏற்பாட்டுப் பணிகளுக்கு தன்னார்வலர்கள் தேவைப்படுவதாகவும் தெரிவிக்கப்பட்டுள்ளது.

கூட்டத்திற்கு அழைப்பு விடுத்து, அம்மன்றத்தின் தலைவர் ஆடிட்டர் ஜெ.எஸ்.ஏ.புகாரீ வெளியிட்டுள்ள அறிக்கை:-

அன்புள்ளம் கொண்ட துபை காயல் நல மன்றத்தின் பொதுக்குழு உறுப்பினர்களுக்கும், அமீரகம் வாழ் காயலர்களுக்கும், அஸ்ஸலாமு அலைக்கும் (வரஹ்)

இறையருளால் நமது துபை காயல் நல மன்றத்தின் பொதுக்குழுக் கூட்டம் மற்றும் காயலர் தின நிகழ்ச்சி, இன்ஷாஅல்லாஹ் இம்மாதம் 14ஆம் நாள் வெள்ளிக்கிழமையன்று துபை ஸத்வாவில் அமைந்துள்ள அல்ஸஃபா பூங்காவில், காலை 10.00 மணி முதல் நடத்தப்படவுள்ளது என்பதை பெருமகிழ்ச்சியுடன் அறியத் தருகிறோம்.

நம் மன்றம் இதுவரை ஆற்றியுள்ள நகர்நலப் பணிகள், வருங்கால செயல்திட்டங்கள், மன்றச் செயல்பாடுகளில் இளைய சமூகத்தின் பங்களிப்பு உள்ளிட்டவை குறித்து இக்கூட்டத்தில் கலந்துரையாடல் நடைபெறும்.

மன்றப் பணிகள் தொய்வின்றித் தொடரவும், ஊக்கத்துடன் இன்னும் பல நகர்நலப் பணிகளாற்றிடவும், உங்கள் யாவரின் மேலான ஒத்துழைப்புகள் என்றும் அவசியமாகிறது. எனவே, குறித்த நேரத்தில் உங்கள் நண்பர்களுடன் நிகழ்விடத்திற்கு வருகை தந்து, நல்ல பல ஆலோசனைகளை வழங்கிட அன்புடன் அழைக்கின்றோம்.

கூட்டத்தில் தங்களது வருகையை முற்கூட்டியே திட்டமிடும் பொருட்டு, இவ்வறிவிப்பை முன்னரே அறியத் தந்துள்ளோம்.

நிகழ்விடத்திற்கு முற்கூட்டியே வருகை தருவோரை ஊக்குவிப்பதற்காக - நிகழ்வு நாளன்று காலை 11.00 மணிக்குள் வருவோருள், சிறப்புக் குலுக்கல் முறையில் பரிசுக்குரியோர் தேர்ந்தெடுக்கப்பட்டு, பரிசுகள் வழங்கப்படவுள்ளனர். நேரமின்மை காரணமாக, சிறுவர் விளையாட்டுப் போட்டிகள் குறைந்த அளவிலேயே நடத்திட திட்டமிடப்பட்டுள்ளது.

வருவோரை வரவேற்கவும், உணவு ஏற்பாடுகளை முறையாகச் செய்திடவும், விளையாட்டு நிகழ்ச்சிகளை சிறப்புற நடத்திடவும் தேவையான ஏற்பாடுகளைச் செய்திட பொறுப்பாளர்கள் தேவைப்படுவதால், தன்னார்வம் கொண்டுள்ள சகோதரர்கள், இதற்கான பொறுப்பாளரான சகோதரர் ஈஸா அவர்களை 055-4063711 என்ற எண்ணில் தொடர்புகொண்டு, பெயர் பதிவு செய்துகொள்ள அன்புடன் கேட்டுக்கொள்கிறோம்.

அனைவரின் வருகையையும் ஆவலுடன் எதிர்பார்க்கிறோம். நிகழ்வு நாளன்று நாம் யாவரும் இன்ஷாஅல்லாஹ் நேரில் சந்திப்போம்...

இவ்வாறு அந்த அறிக்கையில் தெரிவிக்கப்பட்டுள்ளது.

தகவல்:
சாளை ஸலீம்
துணைத்தலைவர் - துபை காயல் நல மன்றம்

துபை காயல் நல மன்றத்தின் முந்தைய பொதுக்குழுக் கூட்டம் குறித்த செய்தியைக் காண இங்கே சொடுக்குக!

துபை காயல் நல மன்றம் தொடர்பான முந்தைய செய்தியைக் காண இங்கே சொடுக்குக!