Kayal on the Web

செய்திகள்

செய்தி எண் (ID #) 18037

#KOTW18037

ஞாயிறு, ஜுலை 3, 2016

பைக் மோதியதில் முதியவர் மரணம்! மகுதூம் ஜும்ஆ பள்ளியில் நல்லடக்கம் செய்யப்பட்டது!!

செய்தி: எஸ்.கே.எஸ். (தாருத்திப்யான் நெட்வர்க்)
இந்த பக்கம் 3125 முறை பார்க்கப்பட்டுள்ளது | வாசகர் கருத்துக்கள் காண (10) <> கருத்து பதிவு செய்ய

(ஒப்புதலுக்காக காத்திருக்கும் கருத்துக்கள் - 0; நிராகரிக்கப்பட்ட கருத்துக்கள் - 1)

click here to post your comment using facebook

{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினம் எல்.எஃப். வீதியில், பைக் மோதி விபத்துக்குள்ளானதையடுத்து முதியவர் காலமானார். விபரம் வருமாறு:-

காயல்பட்டினம் எல்.எஃப். வீதியில், ‘கேப்டன்’ தர்வேஷ் முஹம்மத் என்பவர், தன் மனைவி, இரண்டு பெண் மக்களுடன் வசித்து வந்தார். திருப்பாலைக்குடியைச் சொந்த ஊராகக் கொண்ட இவர், இலங்கை வரக்காப்பொல நகரில் நீண்ட காலம் வசித்த நிலையில், 1990ஆம் ஆண்டு முதல் காயல்பட்டினத்தில் வசித்து வந்தார்.

நேற்று (02.07.2016. சனிக்கிழமை) 20.00 மணியளவில், அருகிலிருக்கும் தப்லீக் மர்கஸ் பள்ளிவாசலில் ரமழான் சிறப்புத் தொழுகையில் கலந்துகொள்வதற்காக அவர் தன் வீட்டிலிருந்து சாலையைக் கடக்க முயன்றபோது, 18 வயது கூட நிறையாத இளைஞர் ஒருவர் வேகமாக ஓட்டி வந்த மோட்டார் இரு சக்கர வாகனம், சுமார் 72 வயதாகும் அவர் மீது மோதவே, அவர் உடலிலிருந்து இரத்தம் அதிகளவில் வழிந்தோடி, நிகழ்விடத்திலேயே மயங்கி விழுந்துள்ளார்.

பின்னர், திருச்செந்தூரிலுள்ள தனியார் மருத்துவமனையில் அவசர சிகிச்சைப் பிரிவில் சேர்க்கப்பட்ட அவர், சிகிச்சை பலனின்றி மரணமானார்.

இன்று காலையில் அவரது உடல் மருத்துவ பரிசோதனை செய்யப்பட்டு குடும்பத்தாரிடம் ஒப்படைக்கப்பட்டது. அங்கேயே இறுதிச் சடங்குகள் நிறைவேற்றப்பட்ட பின், தமிழ்நாடு முஸ்லிம் முன்னேற்றக் கழக ஆம்புலன்ஸ் வாகனத்தில் அவரது உடல், எல்.எஃப். வீதியிலுள்ள அவரது இல்லத்திற்குக் கொண்டு வரப்பட்டது.

அங்கு பொதுமக்கள் பார்வையிட்டதையடுத்து, 14.30 மணியளவில் - மகுதூம் ஜும்ஆ பள்ளியில் ஜனாஸா தொழுகை நடத்தப்பட்டு, அங்குள்ள மையவாடியில் அவரது உடல் நல்லடக்கம் செய்யப்பட்டது. இந்நல்லடக்கத்தில் காயல்பட்டினத்தில் பல்வேறு பகுதிகளைச் சேர்ந்த பொதுமக்கள் திரளாகக் கலந்துகொண்டனர்.

இவ்விபத்தில், மோட்டார் வாகனத்தை ஓட்டிச் சென்றவருக்கும் காயம் ஏற்பட்டு, சிகிச்சை பெற்று வருவதாக தகவல்கள் தெரிவிக்கின்றன. அவர் குறித்த உறுதி செய்யப்பட்ட தகவல்கள் இதுவரை கிடைக்கப்பெறவில்லை. ஆறுமுகநேரி காவல்துறையினர் இதுகுறித்து விசாரித்து வருகின்றனர்.

நிகழும் ரமழான் மாதத்தில், 18 வயது கூட நிரம்பாத இளைஞர்கள் மோட்டார் இரு சக்கர வாகனங்களில் இரண்டு, மூன்று, நான்கு பேர்களாக அமர்ந்துகொண்டு, சாலையோரங்களில் செல்வோரின் பாதுகாப்பு குறித்தோ, தமது பாதுகாப்பு குறித்தோ சிறிதும் கவலைப்படாமல் மிக வேகமாக ஓட்டிச் செல்வது வாடிக்கையாகிவிட்ட தற்காலச் சூழலில், இவ்விபத்து பொதுமக்களிடையே பெரும் கோபத்தை ஏற்படுத்தியுள்ளமை குறிப்பிடத்தக்கது.

{TAGS} wafat death obit obituary accident bike accident l.f.road captain tharwesh mohamed

இச்செய்தி குறித்த உங்கள் கருத்தை பதிவு செய்ய இங்கு சொடுக்கவும் >>
இறுதி கருத்துக்கு செல்ல இங்கு சொடுக்கவும் >>

1. பிள்ளைகளை நேர்மையின்பாலே வளர்ப்பார்கள்
posted by N.S.E.மஹ்மூது (காயல்பட்டணம்) [04 July 2016]
IP: 103.*.*.* | Comment Reference Number: 44198

அஸ்ஸலாமு அலைக்கும் (வரஹ்).

பைக் மோதியதில் முதியவர் மரணம் (இன்னாலில்லாஹி வஇன்னாஇலைஹி ராஜியூன்) செய்தியை அறிந்து மனம் மிகவும் வேதனை அடைகிறது. வல்ல அல்லாஹ்! மர்ஹூம் அவர்களின் பிழைகளை பொறுத்து மேலான சுவன பதியை கொடுத்தருள்வானாக ஆமீன்.

----------------------------

இரு சக்கர வாகனம் ஓட்டுகிறவர்கள் பெரும்பாலும் விமானம் ஓட்டுகிறதாகத்தான் நினைப்பு – விமானம் ஓட்டுகிறவர்கள் கூட அவரவர் வான் எல்லைக்குள்தான் ஓட்டுவார்கள் – ஆனால் இருசக்கர ஓட்டிகளோ! எல்லையே இல்லாத நினைப்பில்தான் ஓட்டுகிறார்கள். பலரும் பலமுறை எச்சரித்து இருக்கிறோம் அடங்குவதாக தெரியவில்லை – அவர்கள் உயிர் அடங்கும் வரை, அவர்களை அடக்கும் வரை, அவர்களுக்கு அடக்கம் என்பது வராது என்பதாகவே தெரிகிறது.

--------------------------

பைக் கீழே விழுந்தால் அதை தூக்கக்கூட சக்தியில்லாத 10, 11 வயதே உடைய பையன்கள் பைக் ஓட்டுகிறார்கள் அவர்களுக்கு பின்னால் அவர்களுடைய பொறுப்பற்ற தாயோ! சகோதரியோ! ஏதோ ஒரு பெண் உட்கார்ந்து கொண்டு போகிறாள்.

பைக் ஓட்ட அனுமதிக்கப்படாதவர்கள், தாறுமாறாக, திமிராக ஓட்டுபவர்கள் விபத்துக்குள்ளாகி செத்தாலோ! காயமேற்பட்டாலோ! யாரும் அதிகம் கவலை கொள்ளப்போவதில்லை. ஆனால் அப்பாவி பாதசாரிகளை கொல்லுவதும், காயமேற்படுத்துவதும் மேலும் துன்பத்திற்குள்ளாக்குவதும்தான் கவலையை தருகிறது.

----------------------------

இன்று ஒருவர் கொல்லப்பட்டிருக்கிறார் இதன் மூலம் ஏதேனும் இந்த மக்களுக்கு பாடம் ஏற்படுமா? என்றால் ஏற்படாது. அட! நிரந்தரப்பாடம் வேண்டாம் ஏதோ! 4 நாளைக்காவது கொஞ்சம் அமைதியாக, வேகமில்லாமல் ஓட்டுவார்களா? இல்லை, சிறு பையன்களாவது ஓட்டாமல் இருப்பார்களா? என்றால் இருக்காது.

ஏன், காரணம் என்ன, பெரும்பாலானவர்களிடம் நேர்மையான பணம் இல்லை. நேர்மையாக சம்பாதித்த பணமாக இருந்தால் – இது உயிருக்கு ஆபத்து என்பதை மனதில் நிறுத்தி சிறுவர்களுக்கு நிச்சயமாக பைக் வாங்கி கொடுக்க மாட்டார்கள் – சிறுவர்களை பைக் ஓட்டவும் அனுமதிக்க மாட்டார்கள்.

----------------------------

சிறுவர்கள் பைக் ஓட்டுவதற்கு முதல் காரணம் பெற்றோர்களே! எந்த பெற்றோர்களிடம் நேர்மையான பணம் இருக்கிறதோ! அவர்கள் தங்கள் பிள்ளைகளை நேர்மையின்பாலே வளர்ப்பார்கள்!!.

தன்னிடம் கோடிக்கணக்கில் பணம் இருக்கிறது, தான் யாரையும் ஏமாற்றாமல் தொழில் செய்து சம்பாதித்தது என்றாலும் அந்த பணம் ஹலாலாக ஆகிவிடாது – அந்த பணத்திற்கான ஜக்காத் (ஏழை வரியை) கொடுத்திருந்தால்தான் அது நேர்மையான (ஹலாலான) பணம் ஆகும்.

------------------------------

வேண்டுகோள்!

பெரியவர்கள் பைக்கை தாறுமாராக ஓட்டி நாசமாக போகிறது ஒருபக்கமிருக்கட்டும் – தயவு செய்து சிறுவர்களுக்கு பைக் ஓட்டகொடுக்காதீர்கள் – இந்த சோக நிகழ்வு நடந்த பிறகும் உங்கள் சிறுவர்களை பைக் ஓட்ட அனுமதித்தீர்களானால் , அந்த சிறுவர்களை கொலையாளியாகவே! மாற்றுகிறீர்கள் என்று அர்த்தமாகும் – இதன் மூலம் அவர்கள் மட்டுமல்ல, நீங்களும் நரகம் செல்ல நாடுகிறீர்கள் என்பது திண்ணமாகும்.

எனவே! கண்டிப்பாக சிறுவர்களை பைக் ஓட்ட அனுமதிக்காதீர்கள் அதன் மூலம் உங்கள் பிள்ளைகளையும் , பாதசாரிகளையும் கொல்லாதீர்கள்.

வஸ்ஸலாம்.