{ முகநூல் கருத்துக்கள்}{ட்விட்டர் கருத்துக்கள்}

ஒரு மொபைல் சேவை நிறுவனத்திலிருந்து மற்றொரு மொபைல் சேவை நிறுவனத்திற்கு மாறும் போது சந்தாதாரர் தங்கள் மொபைல் எண்ணை தக்கவைத்துக்கொள்ளும் வசதி (MOBILE NUMBER PORTABILITY) இந்தியா முழுவதும் நேற்று ஜனவரி 20 முதல் அறிமுகப்படுத்தப்பட்டது. நவம்பர் 25, 2010 அன்று ஹரியானா மாநிலம் ரோஹ்டக் நகரில் முதலாவதாக இது அறிமுகப்படுத்தப்பட்டிருந்தது.



இச்சேவையை நாடு முழுவதும் அறிமுகப்படுத்தும் நிகழ்ச்சி நேற்று டில்லியில் நடந்தது. இந்நிகழ்ச்சியில் பிரதமர் மன்மோகன் சிங், தொலைத்தொடர்பு துறை அமைச்சர் கபில் சிபல், தொலைத்தொடர்பு துறை இணை அமைச்சர் சச்சின் பைலட், தொலைத்தொடர்பு துறை செயலாளர் சந்திரசேகரன் ஆகியோர் கலந்து கொண்டனர். மாற்றம் செய்யப்பட முதல் எண்ணில் இருந்து பிரதமர் மன்மோகன் சிங், அமைச்சர் கபில் சிபலுக்கு அழைப்பு விதித்து இச்சேவையை துவக்கிவைத்தார்.



இத்திட்டம் செயல்படுத்தப்படும் முறையை இந்திய தொலைப்பேசி துறை கண்காணிப்பு அமைப்பு (TRAI) விளக்கியுள்ளது.

1) மாற்றம் செய்யும் சந்தாதாரர் குறைந்தது மூன்று மாதமாவது பழைய நிறுவனத்துடன் இருந்திருக்க வேண்டும்.

2) புதிய நிறுவனத்திற்கு மாற விரும்பும் சந்தாதாரர் - தற்போது இருக்கும் நிறுவன தொடர்பிலிருந்து 1900 என்ற எண்ணுக்கு SMS (Port xxxxx xxxxx [மொபைல் எண்] என்று) அனுப்ப வேண்டும். பதிலாக Unique Porting Code (UPC) எண் - SMS மூலமே வரும்.

3) புதிய நிறுவனத்தின் விண்ணப்பம் நிரப்பும் போது SMS மூலம் பெறப்பட்ட அந்த Unique Porting Code (UPC) எண்ணை குறிப்பிடவேண்டும்.

4) புதிய நிறுவனம் மாற்ற சேவைக்காக கூடியதாக ரூபாய் 19 வரை வசூலிக்கலாம்.

5) ஒவ்வொரு மாதமும் பில் பெரும் சந்தாதாரர்கள் (Post Paid Subscribers) சேவை மாற்றம் செய்யும்போது தங்களின் அனைத்து பாக்கியையும் கட்டியிருக்க வேண்டும்.

6) Pre Paid Subscribers உடைய எஞ்சிய தொகை (Balance) - புது நிறுவனத்திற்கு கொண்டு செல்லப்படாது.

7) விண்ணப்பம் அளித்த ஏழு நாட்களுக்குள் சேவை மாற்றம் செய்து கொடுக்கப்பட வேண்டும்.