{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினம் ஐக்கிய விளையாட்டு சங்க நிர்வாகத்தின் சார்பில், ஆண்டுதோறும் மே மாதத்தில், “மவ்லானா அபுல்கலாம் ஆஸாத் நினைவு சுழற்கோப்பை”க்கான அகில இந்திய கால்பந்து போட்டி என்ற பெயரில் கால்பந்து சுற்றுப்போட்டிகள் நடத்தப்பட்டு வருகிறது. நடப்பாண்டு போட்டிகள் மே மாதம் 09ஆம் தேதியன்று துவங்கி, 27ஆம் தேதி நிறைவுறுகிறது.

21.05.2012 அன்று (இன்று) நடைபெற்ற போட்டியில், திருச்சி மாவட்ட கால்பந்துக் கழக அணியும், சென்னை டான் பாஸ்கோ ரெக்ரியேஷன் க்ளப் அணியும் மோதின.

ஆட்டத்தின் துவக்கத்தில் இரு அணிகளும் சம பலத்துடன் விளையாடி தலா ஒரு கோல் அடித்தன. ஆட்டத்தின் இரண்டாவது நிமிடத்தில், திருச்சி அணியின் ப்ரசாத் என்ற வீரர் ஒரு கோல் அடித்தார். அதன் பிறகு அந்த அணி கோல் எதுவும் அடிக்கவில்லை என்பதோடு மந்த நிலையிலேயே ஆடியது.

ஆனால், மறுமுனையில் சென்னை அணி உற்சாகத்துடன் விளையாடியது. அந்த அணியின் மோகன் என்ற வீரர், ஆட்டத்தின் 09, 35, 36, 45 ஆகிய நிமிடங்களில் அடுத்தடுத்து நான்கு கோல்களை அடித்தார். பின்னர் ஆட்டம் நிறைவடையும் வரை இரு அணிகளும் கோல் எதுவும் அடிக்காததால், சென்னை டான் பாஸ்கோ ரெக்ரியேஷன் க்ளப் அணி 4-1 என்ற கோல் கணக்கில் திருச்சி மாவட்ட கால்பந்துக் கழக அணியை வென்றது.





ஆட்டத்தின் 23ஆவது நிமிடத்தில், திருச்சி அணியின் கோல் கீப்பர் ராஜசேகர் - கோல் அடிக்க வந்த எதிரணி வீரரை நேரடியாகத் தாக்கியதால், நடுவரால் சிவப்பு அட்டை காண்பிக்கப்பட்டு, போட்டியிலிருந்து வெளியேற்றப்பட்டார்.

இன்றைய போட்டியில், பஹ்ரைன் - இடிஏ சிமெண்ட்ஸ் நிறுவனத்தின் முன்னாள் இயக்குநரும், நகரப் பிரமுகருமான லேண்ட்மார்க் ஹாஜி ராவன்னா அபுல்ஹஸன் சிறப்பு விருந்தினராகக் கலந்துகொண்டார். அவருக்கு சுற்றுப்போட்டிக் குழுவின் சார்பில் சால்வை அணிவித்து கவுரவிக்கப்பட்டதுடன், ஆட்ட வீரர்கள் அறிமுகம் செய்து வைக்கப்பட்டனர்.





இன்றைய போட்டி, நேர்முக வர்ணனையுடன் அசைபட நேரலை செய்யப்பட்டது. காயல்பட்டணம்.காம் வலைதளத்தில் ஐக்கிய விளையாட்டு சங்கத்தின் - மவ்லானா அபுல்கலாம் ஆஸாத் நினைவு சுழற்கோப்பை கால்பந்துப் போட்டிக்கான சிறப்புப் பக்கத்தில் உள்ள “நேரடி ஒளிபரப்பு” என்ற இணைப்பில் இந்நேரலையைக் காண ஏற்பாடுகள் செய்யப்பட்டிருந்தது. ஐக்கிய விளையாட்டு சங்கத்தின் சார்பில் யூனுஸ் முஸ்தஃபா கணினியை இயக்க, எம்.டி.ஹபீப் ஒளிப்பதிவாளராக செயல்பட்டார். ஹாஃபிழ் எம்.எம்.முஜாஹித் அலீ, ஹாஃபிழ் பி.ஏ.உக்காஷா ஆகியோர் இப்போட்டியை நேர்முக வர்ணனை செய்தனர்.



இப்போட்டியை, நகரின் அனைத்துப் பகுதிகளைச் சார்ந்த கால்பந்து ரசிகர்கள் ஆவலுடன் கண்டுகளித்தனர்.



















நாளை மாலை நடைபெறும் லீக் ஆட்டத்தில், இன்று வெற்றி பெற்ற சென்னை டான் பாஸ்கோ அணி, கோழிக்கோடு யுனிவெர்ஸல் கால்பந்துக் கழக அணியை எதிர்த்து விளையாடவுள்ளது.