{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினம் ஐக்கிய விளையாட்டு சங்க நிர்வாகத்தின் சார்பில், ஆண்டுதோறும் மே மாதத்தில், “மவ்லானா அபுல்கலாம் ஆஸாத் நினைவு சுழற்கோப்பை”க்கான அகில இந்திய கால்பந்து போட்டி என்ற பெயரில் கால்பந்து சுற்றுப்போட்டிகள் நடத்தப்பட்டு வருகிறது. நடப்பாண்டு போட்டிகள் மே மாதம் 09ஆம் தேதியன்று துவங்கி, 27ஆம் தேதி நிறைவுறுகிறது.

22.05.2012 அன்று (இன்று) நடைபெற்ற போட்டியில், சென்னை டான் பாஸ்கோ ரெக்ரியேஷன் க்ளப் அணியும், கோழிக்கோடு யுனிவெர்ஸல் கால்பந்துக் கழக அணியும் மோதின.





இரு அணிகளும் சிறப்புற ஆடியபோதிலும், கோழிக்கோடு அணியின் ப்ரசாந்த் என்ற வீரர் ஆட்டத்தின் 23ஆவது நிமிடத்திலும், உபைத் என்ற வீரர் 68ஆவது நிமிடத்திலும், தமக்குக் கிடைத்த வாய்ப்பைப் பயன்படுத்தி அற்புதமாக கோல் அடித்தனர். மறுபுறம் சென்னை அணி கோல் எதுவும் அடிக்காததால், 2-0 என்ற கோல் கணக்கில் கோழிக்கோடு யுனிவெர்ஸல் கால்பந்துக் கழக அணி வெற்றி பெற்று, காலிறுதிப் போட்டியில் விளையாட தகுதி பெற்றுள்ளது. இந்த அணி, நாளை நடைபெறும் போட்டியில், சென்னை சாய் கால்பந்து அணியுடன் காலிறுதிப் போட்டியில் களம் காணவுள்ளது.

இன்று நடைபெற்ற போட்டியே இச்சுற்றுப்போட்டியின் கடைசி லீக் போட்டி என்பது குறிப்பிடத்தக்கது. இன்றைய போட்டி, நேர்முக வர்ணனையுடன் அசைபட நேரலை செய்யப்பட்டது. காயல்பட்டணம்.காம் வலைதளத்தில் ஐக்கிய விளையாட்டு சங்கத்தின் - மவ்லானா அபுல்கலாம் ஆஸாத் நினைவு சுழற்கோப்பை கால்பந்துப் போட்டிக்கான சிறப்புப் பக்கத்தில் உள்ள “நேரடி ஒளிபரப்பு” என்ற இணைப்பில் இந்நேரலையைக் காண ஏற்பாடுகள் செய்யப்பட்டிருந்தது. எம்.டி.ஹபீப் ஒளிப்பதிவாளராக செயல்பட்டார். ஹாஃபிழ் எம்.எம்.முஜாஹித் அலீ, ஹாஃபிழ் பி.ஏ.உக்காஷா ஆகியோர் இப்போட்டியை நேர்முக வர்ணனை செய்தனர்.



இப்போட்டியை, நகரின் அனைத்துப் பகுதிகளைச் சார்ந்த கால்பந்து ரசிகர்கள் ஆவலுடன் கண்டுகளித்தனர்.