{ முகநூல் கருத்துக்கள்}{ட்விட்டர் கருத்துக்கள்}

மேல ஆத்தூரில் இருந்து தமிழ்நாடு குடிநீர் மற்றும் வடிகால் வாரியம் தினசரி சுமார் 20 லட்ச லிட்டர் அளவு தண்ணீர் - காயல்பட்டினத்திற்கு வழங்குகிறது. பாபநாசம் அணை - ஸ்ரீவைகுண்டம் அணைக்கட்டு வழியாக மேல ஆத்தூருக்கு நீர் வருகிறது.

மே இறுதி - ஜூன் முதல் வாரங்களில் பொதுவாக தென்மேற்கு பருவ மழை தென் தமிழகத்தில் துவங்கும். ஆனால் இவ்வாண்டு - பருவ மழை துவக்கத்தில் கால தாமதம் ஏற்பட்டுள்ளதால், அணைகளில் உள்ள தண்ணீர் மிக குறைவாக உள்ளது. 143 அடி உயரம் கொண்ட பாபநாசம் அணையில் - நேற்றைய (ஜூலை 10) அளவுபடி 35.45 அடி அளவுக்கே தண்ணீர் உள்ளது. கடந்த ஆண்டு இதே தினத்தில் 42.45 அடி அளவுக்கு தண்ணீர் இருந்தது.

காயல்பட்டினத்திற்கு தண்ணீர் வழங்கப்படுவது குறித்து - தமிழ்நாடு குடிநீர் மற்றும் வடிகால் வாரியத்தின் பொறியாளர் பாலசுப்ரமணியனிடம் காயல்பட்டணம்.காம் விசாரித்தது. அப்போது விளக்கம் அளித்த பொறியாளர் - தற்போது தினமும் காயல்பட்டினத்திற்கு 13 லட்சம் லிட்டர் அளவு தண்ணீர் வழங்கப்படுவதாகவும் (வழமையாக வழங்கப்படுவது 20 லட்சம் லிட்டர் தண்ணீர்), மழை பெய்ய துவங்கிவிட்டால் - கூடுதல் தண்ணீர் வழங்கப்படும் என்றும் தெரிவித்தார். குடிநீர் விநியோகம் சீரடையும் வரை - நகரில் லாரிகள் மூலம் குடிநீர் விநியோகம் மேற்கொள்ள பரிந்துரைக்கப்பட்டுள்ளதாக அவர் தெரிவித்தார். நேற்று (ஜூலை 10) பாபநாசம் அணையில் 10 மில்லிமீட்டர் அளவு மழை பெய்தது என்பது குறிப்பிடத்தக்கது.

மேலும் - காயல்பட்டினம் நகராட்சி, தமிழ்நாடு குடிநீர் மற்றும் வடிகால் வாரியத்திற்கு செலுத்தவேண்டிய தொகை தற்போது 60 லட்சம் ரூபாய் என உயர்ந்திருப்பதாகவும், இதில் 20 லட்சம் ரூபாய் கடந்த வாரம் செலுத்தப்பட்டதாகவும் அவர் தெரிவித்தார். ஒவ்வொரு மாதமும் - காயல்பட்டினம் நகராட்சி, தமிழ்நாடு குடிநீர் மற்றும் வடிகால் வாரியத்திற்கு செலுத்தவேண்டிய தொகை 2 லட்சம் முதல் 3.5 லட்சம் ரூபாய் வரை (வழங்கப்படும் குடிநீர் அளவை பொறுத்து) இருக்கும் என்றும், ஒவ்வொரு மாதமும் தொகையை செலுத்தாமல், காலம்தாழ்த்தியே - மொத்தமாக - காயல்பட்டினம் நகராட்சி தொகையை செலுத்தும் என்றும் பொறியாளர் பாலசுப்ரமணியம் தெரிவித்தார்.

சில தினங்களுக்கு முன்னர் - தமிழ்நாடு குடிநீர் மற்றும் வடிகால் வாரிய நிபுணர்கள் - காயல்பட்டினம் நகராட்சிக்கு வருகைதந்து, குடிநீர் விநியோகம் குறித்து ஆய்வு மேற்கொண்டனர். அப்போது - நகராட்சி அலுவலர்களிடம், குடிநீர் விநியோகம் குறித்த சில தகவல்களை கேட்டிருந்தனர். அந்த தகவலை கொண்டு - குடிநீர் விநியோகத்தை சீர்படுத்துவது குறித்து பரிந்துரை வழங்க தமிழ்நாடு குடிநீர் மற்றும் வடிகால் வாரிய பொறியாளர்கள் ஒப்புதல் அளித்திருந்தனர்.

அந்த தகவல் காயல்பட்டினம் நகராட்சியால் வழங்கப்பட்டதா என காயல்பட்டணம்.காம் - பொறியாளர் பாலசுப்ரமணியனிடம் வினவியது. அந்த தகவல் இதுவரை கிடைக்கப்பெறவில்லை என்றும், உள்ளூர் விநியோகத்தில் தான் பெரும் பிரச்சனை இருப்பதாக - காயல்பட்டினம் நகராட்சிக்கு வருகையின் போது, தங்கள் குழு உணர்ந்ததாகவும் அவர் மேலும் தெரிவித்தார்.