{ முகநூல் கருத்துக்கள்}{ட்விட்டர் கருத்துக்கள்}

இயல்பான காலங்களில் தமிழ்நாடு குடிநீர் வடிகால் வாரியம் - மேல ஆத்தூரில் இருந்து - காயல்பட்டினம் நகராட்சிக்கு 20 லட்சம் லிட்டருக்கும் மேலான அளவில் குடிநீர் வழங்கி வந்தது. தற்போது நிலவும் தட்டுபாடு நிலையினால் - இது குறைக்கப்பட்டு, செப்டம்பர் 1 முதல் தினமும் 12 லட்சம் லிட்டர் என்ற அளவில் வழங்கப்பட்டு வருகிறது.

மூடப்பட்ட குழாய்மூலம் அனுப்பப்படும் இந்த தண்ணீர் குறைந்தளிவிலேயே வந்து சேருவதாக காயல்பட்டினம் நகராட்சி ஊழியர்கள் பல ஆண்டுகளாக கூறிவருகின்றனர். 21 லட்சம் லிட்டர் தண்ணீர் வழங்கப்பட்ட காலங்களில் - 16 லட்சம் லிட்டர் தண்ணீர் தான் வழங்கப்படுவதாக கூறிவந்தனர். தற்போது 11 லட்சம் லிட்டர் தண்ணீர் வழங்கப்படும் காலத்தில் - 6 லட்சம் லிட்டர் தண்ணீர் தான் வழங்கப்படுவதாக கூறினர்.

லட்ச கணக்கில், மாயமாக மறையும் காயல்பட்டினத்திற்கான குடிநீர்! என்ற தலைப்பில் ஆகஸ்ட் 31 அன்று காயல்பட்டணம்.காம் செய்தி வெளியிட்டிருந்தது. அதனை தொடர்ந்து இது குறித்து விசாரிக்க திருநெல்வேலியில் உள்ள நகராட்சித்துறை மண்டல அதிகாரிகள் - காயல்பட்டினம் நகராட்சிக்கு உத்தரவிட்டுள்ளதாக தெரிகிறது.

இருப்பினும் காயல்பட்டினம் நகராட்சி அலுவலர் - செப்டம்பர் 2 இரவு முதல் செப்டம்பர் 3 அதிகாலை வரை 9.1 லட்ச லிட்டர் தான் பெறப்பட்டது என கூறுகிறார். தமிழ்நாடு குடிநீர் வடிகால் வாரியம் தரப்பில் 12 லட்சம் லிட்டர் அனுப்பப்பட்டதாக தெரிவிக்கப்படுகிறது. 3 லட்ச லிட்டர் மாயம். செப்டம்பர் 3 இரவு முதல் செப்டம்பர் 4 அதிகாலை வரை 9.2 லட்ச லிட்டர் தான் பெறப்பட்டது என கூறுகிறார். தமிழ்நாடு குடிநீர் வடிகால் வாரியம் தரப்பில் 12 லட்சம் லிட்டர் அனுப்பப்பட்டதாக தெரிவிக்கப்படுகிறது. 2.8 லட்ச லிட்டர் மாயம்.

செப்டம்பர் 3 இரவில் செய்தியாளர்கள் - மேல ஆத்தூரில் உள்ள தமிழ்நாடு குடிநீர் வடிகால் வாரிய நீர்தேக்கத்திற்கு சென்றிருந்தனர். காயல்பட்டினதிற்கு குடிநீர் வழங்கப்படும் பம்பிங் துவக்கப்படும் நேரமான இரவு 8 மணி அளவில் அங்கிருந்த செய்தியாளர்கள் - நவீன மீட்டர் மூலம் ஒவ்வொரு வினாடியும் காயல்பட்டினம் நகராட்சிக்கு வழங்கப்படும் குடிநீர் அளவினை காண முடிந்தது.

மோட்டார் கருவி இயக்கப்பட்டவுடன் நிமிடத்திற்கு சுமார் 3500 லிட்டர் அளவில் பாய துவங்கிய தண்ணீர், படிப்படியாக நிமிடத்திற்கு 2300 லிட்டர் அளவில் காயல்பட்டினதிற்கு அங்கிருந்து அனுப்பப்பட்டது. அதிகாலை 6 மணி வரை தொடர்ந்து இந்த தண்ணீர் அனுப்பப்படும் என அங்கிருந்த அலுவலர்கள் தெரிவித்தனர்.







தினமும் அதிகாரிகளால் - பயன்படுத்தப்படும் மின்சார அளவும், வழங்கப்படும் குடிநீர் அளவும் - லாக் புத்தகத்தில் துல்லியமாக பதிவு செய்யப்படுகிறது என்பதனையும் அங்கு காண முடிந்தது.