{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினம் ஐக்கியப் பேரவை - ஹாங்காங் அமைப்பிற்கு புதிய செயற்குழு 30.06.2018 அன்று நடைபெற்ற அமைப்பின் பொதுக்குழுக் கூட்டத்தில் முறைப்படி தேர்ந்தெடுக்கப்பட்டது. அப்புதிய செயற்குழுவின் முதல் கூட்ட நிகழ்வுகள் குறித்து, அவ்வமைப்பின் செயலாளர் பிரபு ஷுஅய்ப் வெளியிட்டுள்ள அறிக்கை:-

இறையருளால் எமது காயல்பட்டினம் ஐக்கியப் பேரவை - ஹாங்காங் அமைப்பின் புதிய செயற்குழுவின் முதலாவது கூட்டம் 28.09.2018 வெள்ளிக்கிழமையன்று, அமைப்பின் புதிய தலைவர் எஸ்.எம்.கே. முஹம்மது இஸ்மாயில் இல்லத்தில் நடைபெற்றது.





வரவேற்புரை:

ஹாஃபிழ். ஏ.எல்.முஹம்மது இர்ஷாத் அலி கிராஅத் ஓதி கூட்ட நிகழ்வுகளைத் துவக்கி வைத்தார். கூட்டத்திற்குத் தலைமை தாங்கிய பேரவைத் தலைவர் எஸ்.எம்.கே. முஹம்மது இஸ்மாயில் வரவேற்புரையாற்றினார். பேரவையின் புதிய செயற்குழுவின் அங்கத்தினரை வரவேற்றுப் பேசிய அவர், நகர் மற்றும் சமுதாய நலனுக்காக அனைவரும் இணைந்து பணியாற்ற வேண்டுமெனக் கேட்டுக்கொண்டார்.

கடந்த கூட்ட நிகழ்வறிக்கை:

அடுத்து, செயற்குழு உறுப்பினர் பி.எம்.ஐ.சவூத் கடந்த செயற்குழுக் கூட்ட நிகழ்வறிக்கை மற்றும் 30.06.2018 அன்று நடைபெற்ற பேரவையின் பொதுக்குழுக் கூட்ட நிகழ்வறிக்கையையும் வாசித்தார்.

வரவு - செலவு கணக்கறிக்கை:

பின்னர், பேரவையின் இதுநாள் வரையிலான வரவு-செலவு கணக்கறிக்கையை பொருளாளர் எல்.ஏ.கே. புஹாரி சமர்ப்பித்தார்.

தீர்மானங்கள்:

அடுத்து, நகர்நலன் குறித்த உறுப்பினர்கள் கருத்துப் பரிமாற்றத்திற்குப் பின், பின்வரும் தீர்மானங்கள் ஒருமனதாக நிறைவேற்றப்பட்டன:-

1. பேரவையின் ஆலோசனைக் குழுவினராக அனுபவமிக்க மூத்த உறுப்பினர்கள் ஐவர் தேர்வு செய்யப்பட்டனர்.

2. 2018-19 வருடத்திற்கான தமது உறுப்பினர் பதிவை (Membership) புதுப்பித்துக்கொள்ளாத உறுபினர்களை தொடர்பு கொண்டு அவர்களை அமைப்பின் உறுப்பினர்களாக விரைவில் புதுப்பிக்கச் செய்வது என தீர்மானிக்கப்பட்டது.

3. மருத்துவ உதவி கூட்டமைப்பான ஷிஃபா அமைப்பிற்கு வருடாந்திர நிர்வாகச் செலவினங்களுக்கு ரூபாய் 20 ஆயிரம் ஒதுக்கப்பட்டது. ஷிஃபா மருத்துவ விண்ணப்பங்களுக்கு உதவ ரூபாய் 40 ஆயிரம் நிதி ஒதுக்கப்பட்டது.

4. நமதூர் மக்களுக்காக கல்வி பணியாற்றி வரும் இக்ராஃ கல்வி சங்கத்திற்கு வருடாந்திர நிர்வாகச் செலவினங்களுக்கு ரூபாய் 30 ஆயிரம் ஒதுக்கப்பட்டது. இக்ராஃ கல்விச் சங்கத்தின் 2018-19 ஆண்டுக்கான கல்வி உதவித்தொகையாக ரூபாய் 50 ஆயிரம் ஒதுக்கப்பட்டது.

5. காயல்பட்டினத்தைச் சேர்ந்த பொருளாதாரத்தில் நலிவுற்றுள்ள பயனாளிகளுக்கு சிறுதொழில் உதவி உபகரணங்கள் வழங்குவதற்காக ரூபாய் 1.25 லட்சம் நிதி ஒதுக்கப்பட்டது.

6. பேரவையின் தையல் தொழில் அமைப்பு KUF HONG KONG GARMENTS & TAILORINGயின் நிர்வாக செயற்பாடுகளை மேற்பார்வையிட துணைக்குழு அமைக்கப்பட்டது.

இவ்வாறு தீர்மானங்கள் நிறைவேற்றப்பட்டன. செயலாளர் பிரபு ஷுஅய்ப் நன்றி கூற, ஹாஃபிழ். எம். எம். சுல்தான் துஆவுடன் கூட்டம் நிறைவுற்றது. இக்கூட்டத்தில், பேரவையின் செயற்குழுவினர் மற்றும் சிறப்பழைப்பாளர்கள் கலந்துகொண்டனர்.



பங்கேற்ற அனைவருக்கும் கூட்டம் ஆரம்பிக்கும் முன் சுவையான சிற்றுண்டியும், கூட்டத்திற்குப் பின் இரவு உணவும் எஸ்.எம்.கே. முஹம்மது இஸ்மாயில் அவர்கள் குடும்பத்தினரால் வழங்கி உபசரிக்கப்பட்டது. குழுப்படம் பதிவு செய்த பின் அனைவரும் கலைந்து சென்றனர்.









இவ்வாறு அந்த அறிக்கையில் தெரிவிக்கப்பட்டுள்ளது.