{ முகநூல் கருத்துக்கள்}{ட்விட்டர் கருத்துக்கள்}

குடியிருப்புகள் விஷயத்தில் காயல்பட்டினம் நகர மக்களின் தேர்தல் புறக்கணிப்பு என்பது தி.மு.க. வேட்பாளர் அனிதா ராதாகிருஷ்ணனையே பாதிக்கும் என்பது அனைவரும் அறிந்ததே. காயல்பட்டினத்தில் தனது பிரச்சாரத்தைத் துவக்கிய அனிதாவுக்கு அவர் சென்ற சங்கங்களில் இருந்தும், அவர் சந்தித்த பிரமுகர்களிடமும் இருந்தும் நல்ல வரவேற்பு கிடைத்ததாக தெரிகிறது.



இதனைக் காணும்போது தேர்தலைப் புறக்கணித்து, அனிதாவின் வெற்றிவாய்ப்பைப் பாதிக்கும்படி செய்ய பலர் ஆயத்தமாக இல்லை என்றே தெரிகிறது. மேலும் பெயர் சொல்லவிரும்பாத ஐக்கிய பேரவை நிர்வாகி ஒருவர் கூறுகையில் - குடியிருப்பு பிரச்சனையில் - நீதிமன்றத்தில் இடைக்கால கட்டுமான தடை பெற அனிதா உதவியாக இருந்தார் என்று கூறினார்.

தூத்துக்குடி நீதிமன்றத்தில் பிப்ரவரி 21 அன்று விசாரணைக்கு வந்த குடியிருப்பு குறித்த வழக்கில் நீதிபதி இடைக்காலத் தடை விதித்திருந்தார். சட்ட ரீதியான இம்முடிவுக்கு அனிதா எவ்வாறு உதவி இருப்பார் என்பது தெரியவில்லை.

தூத்துக்குடி நீதிமன்ற வழக்கறிஞர் ஒருவர் கூறுகையில், அவ்வழக்கு விசாரணைக்கு வந்தபோது அரசு தரப்பு வழக்கறிஞர் இடைக்காலத் தடை கோரிக்கையை தீவிரமாக எதிர்க்கவில்லை என்று கூறினார். அரசு தீவிரம் காட்டாததற்கு காரணம் - தற்போது ஐக்கிய பேரவை நிர்வாகி கூறுவதுபோல் - அனிதாவின் தலையீடாகக் கூட இருந்திருக்கலாம். அது உண்மை எனில், இது தற்காலிக நிலையே என்பதை மனதிற்கொள்ள வேண்டும். தேர்தல் முடியும் வரை பிரச்சனை தள்ளிப்போடப் பட்டுள்ளதாகவே தெரிகிறது.

(பாகம் - 1)

[தொடரும்]