{ முகநூல் கருத்துக்கள்}{ட்விட்டர் கருத்துக்கள்}

பிப்ரவரி மாதம் 27 ஆம் தேதி அன்று காயல்பட்டினத்தில் பெரிய நெசவு தெருவில் ஒரு கட்டிடமும், எல்.கே.லெப்பை தம்பி சாலையில் ஒரு கட்டிடமும் - நகராட்சி சாலையினை ஆக்கிரமித்து கட்டப்பட்டுள்ளன எனக் கூறி - போலீஸ் மற்றும் அரசு அதிகாரிகள் முன்னிலையில் இடிக்கப்பட்டன. மேலும் - எல்.கே. லெப்பை தம்பி சாலையில் வேறு சில கட்டிடங்களுக்கும் - காயல்பட்டினம் நகராட்சி மூலம் - இது குறித்து நோட்டீஸ் - பிப்ரவரி 1 அன்று அனுப்பப்பட்டுள்ளதாக தெரிகிறது. அதில் - கடிதம் கிடைக்கப்பெற்ற 7 நாட்களில் - ஆக்கிரமிப்பு அகற்றப்படவேண்டும் என தெரிவிக்கப்பட்டுள்ளது.

அவ்வாறு கடிதம் பெற்ற கட்டிடங்களில் ஒன்றின் உரிமையாளர் எம்.எம். நூர்ஜஹான். அவருக்கு சொந்தமான எஸ்.எம். காம்ப்ளெக்ஸ் - ஆக்கிரமிப்பு பகுதியில் கட்டப்பட்டுள்ளதாக நகராட்சி மூலம் நோட்டீஸ் அனுப்பப்பட்டுள்ளது. பிப்ரவரி 27 அன்று அவரின் கட்டிடம் இடிக்கப்படவில்லை.



இருப்பினும் - அவர் கட்டிடத்திற்கு வழங்கப்பட்ட மின்சாரம் துண்டிக்கப்பட்டதாக கட்டிட உரிமையாளரின் மகன் ஜாகிர் ஹுசைன் குற்றம்சாட்டியுள்ளார். இது குறித்து அவர் காயல்பட்டணம்.காம் - இணையதளத்திற்கு தெரிவிக்கையில்:-

தற்போது ஆக்கிரமிப்பு என நகராட்சியால் கூறப்படும் இடம் - காயல்பட்டினம் பேரூராட்சியின் 30.4.82 அன்றைய தீர்மானம் எண் 19 மூலம் - இந்த இடத்தை நாங்கள் பயன்படுத்த ஆட்சேபனை இல்லை என அறிவிக்கப்பட்ட இடம். இந்த இடத்திற்கு பட்டா பெற, மாவட்ட ஆட்சியரிடம் விண்ணப்பித்து பல ஆண்டுகளாக காத்திருக்கிறோம்.

இதற்கிடையில் பிப்ரவரி 1 அன்று நகராட்சி பெயரில் அனுப்பப்பட்ட கடிதத்தினை தொடர்ந்து - நாங்கள் சென்னை உயர்நீதிமன்றத்தின் மதுரை கிளையினை அணுகினோம். பிப்ரவரி 20 அன்று உத்தரவு பிறப்பித்த நீதிபதிகள் - மாவட்ட ஆட்சியர், எங்கள் பட்டா விண்ணப்பம் குறித்து - இரு வாரங்களுக்குள் முடிவினை கூறவேண்டும் என உத்தரவிட்டுள்ளனர். மேலும் - மாவட்ட ஆட்சியர் தனது முடிவினை அறிவிக்கும் வரை, எங்கள் கட்டிடம் குறித்து எந்த நடவடிக்கையும் எடுக்கக்கூடாது (Status Quo) எனவும் நீதிபதிகள் தெரிவித்துள்ளனர்.

இருப்பினும் - பிப்ரவரி 27 அன்று எங்கள கட்டிடத்திற்கான மின்சாரம் துண்டிக்கப்பட்டுள்ளது. இது நீதிமன்ற ஆணையினை அவமதித்த செயலாகும்.







இவ்வாறு கட்டிட உரிமையாளரின் மகன் ஜாகிர் ஹுசைன் தெரிவித்துள்ளார்.