காயல்பட்டினம் கற்புடையார் பள்ளி வட்டம் கடற்கரை முஹ்யித்தீன் பள்ளியில், மஹான் முஹ்யித்தீன் அப்துல் காதிர் ஜீலானீ ரஹ்மத்துல்லாஹி அலைஹி அவர்களின் நினைவு நாள் நிகழ்ச்சிகள் 25.03.2012 அன்று நடைபெற்றது.
முன்னதாக, ரபீஉல் ஆகிர் மாத முதல் தேதியில் கொடியேற்றத்துடன் நிகழ்ச்சிகள் துவங்கின. 23.03.2012 முதல் 25.03.2012 வரை தினமும் அதிகாலை கத்முல் குர்ஆன் ஓதி தமாம் செய்யப்பட்டது. இரவு 08.00 மணிக்கு மார்க்க அறிஞர்களால் சொற்பொழிவு நிகழ்த்தப்பட்டது.
23.03.2012 அன்று, காயல்பட்டினம் மஹ்ழரா அரபிக்கல்லூரியின் பேராசிரியர் மவ்லவீ ஹாஃபிழ் எஸ்.செய்யித் அப்துர்ரஹ்மான் தங்ஙள் அஹ்ஸனீ ஃபாழில் பாக்கவீ உரை நிகழ்த்தினார்.
24.03.2012 அன்று அல்ஜாமிஉஸ் ஸகீர் - சிறிய குத்பா பள்ளியின் கத்தீபும், ஜாவியா அரபிக்கல்லூரியின் முதல்வருமான மவ்லவீ எஸ்.எம்.முஹம்மத் ஃபாரூக் அல்ஃபாஸீ உரை நிகழ்த்தினார்.
25.03.2012 அன்று மாலையில் மவ்லித் மஜ்லிஸும், இரவு 07.00 மணிக்கு ராத்திப் மஜ்லிஸும் நடைபெற்றன. அதனைத் தொடர்ந்து, இரவு 08.00 மணிக்கு, காயல்பட்டினம் அல்ஜாமிஉல் கபீர் - பெரிய குத்பா பள்ளியின் கத்தீபும், முஅஸ்கர் மகளிர் அரபிக்கல்லூரியின் நிறுவனருமான மவ்லவீ ஹாஃபிழ் எச்.ஏ.அஹ்மத் அப்துல் காதிர் மஹ்ழரீ உரை நிகழ்த்தினார்.
கடற்கரை முஹ்யித்தீன் பள்ளியின் இமாம் அரபி அமானுல்லாஹ் துஆவுடன் நிகழ்ச்சிகள் யாவும் நிறைவுற்றன.
அதனைத் தொடர்ந்து, இன்று அதிகாலை 06.00 மணியளவில் பொதுமக்களுக்கு நேர்ச்சை வினியோகம் செய்யப்பட்டது. பொதுநல ஆர்வலர் ஹாஜி ஸ்டார் எம்.எஸ்.அப்துல் காதிர் நேர்ச்சை வினியோகத்தைத் துவக்கி வைத்தார். 09.00 மணியளவில் நேர்ச்சை வினியோகம் நிறைவுற்றது.
நிகழ்ச்சிகளனைத்திலும் நகரின் பல பகுதிகளிலிருந்தும் பொதுமக்கள் திரளாகக் கலந்துகொண்டனர். பெண்களுக்கு தனியிட வசதி செய்யப்பட்டிருந்தது.
நிகழ்ச்சி ஏற்பாடுகளை, கடற்கரை முஹ்யித்தீன் பள்ளியின் தலைவர் ஜுவெல் ஜங்ஷன் கே.அப்துர்ரஹ்மான் தலைமையில், செயலாளர் ‘முத்துச்சுடர்‘ ஹாஜி என்.டி.இஸ்ஹாக் லெப்பை, பொருளாளர் கோமான் மீரான் மற்றும் நிர்வாகிகள் செய்திருந்தனர்.
[செய்தி திருத்தப்பட்டது @ 23:08/26.03.2012] |
