{ முகநூல் கருத்துக்கள்}{ட்விட்டர் கருத்துக்கள்}

காயல்பட்டினம் நகர்மன்றத் தலைவர் ஐ.ஆபிதா - தலைமையில் நகர்மன்ற உறுப்பினர்கள் குழு ஏப்ரல் 1 அன்று காலை சென்னை வந்தடைந்தது. அன்று (ஞாயிறு) மதியம் தலைவர் மற்றும் உறுப்பினர்கள் - பிரசித்தி பெற்ற சுற்றுப்புற சூழல் தன்னார்வ தொண்டு நிறுவனம் EXNORA வின் நிறுவனர் M.B. நிர்மலை நேரில் சந்தித்தனர்.

ஏப்ரல் 2 (திங்கள்) அன்று - நகராட்சி நிர்வாகம் மற்றும் ஊரக வளர்ச்சித் துறை அமைச்சர் கே.பி.முனுசாமியை அவரது தலைமைச் செயலக அலுவலகத்தில் சந்தித்து - நகர்மன்ற உறுப்பினர்கள் அனைவரும் கையெழுத்திட்டிருந்த கோரிக்கை மனுவினை குழு சமர்ப்பித்தது.

அன்றே தொழிலாளர் நலத் துறை அமைச்சர் எஸ்.டி. செல்லப்பாண்டியனை அவரது தலைமைச் செயலக அலுவலகத்தில் குழுவினர் சந்தித்தனர். அமைச்சர் செல்லப்பாண்டியன் தூத்துக்குடி மாவட்டத்தினை சார்ந்தவர் ஆவார்.

ஏப்ரல் 3 (செவ்வாய்) அன்று - நகராட்சி நிர்வாகத்துறை ஆணையர் சந்திரகாந்த் பி.காம்ப்லே IAS யை சந்தித்து கோரிக்கை மனுவினை குழு சமர்ப்பித்தது. நகர்மன்றத் தலைவரின் பிரத்தியேக இணையதளம் KayalChairman.com மற்றும் நகர்மன்ற உறுப்பினர்களின் பிரத்தியேக இணையதளம் KayalCouncil.com ஆகியவற்றை நகராட்சி நிர்வாகத்துறை ஆணையர் சந்திரகாந்த் பி.காம்ப்லே IAS துவக்கிவைத்தார்.

நகராட்சி நிர்வாகத்துறையின் இணை இயக்குனர் (நிர்வாகம்) எஸ்.செபாஸ்டினையும் நகர்மன்றத் தலைவர் மற்றும் உறுப்பினர்கள் சந்தித்தனர். உறுப்பினர்களின் பல கேள்விகளுக்கு அவ்வேளையில் இணை இயக்குனர் விளக்கம் அளித்தார்.

அன்று மதியம் 12:30 மணி முதல் 1:00 மணி வரை தமிழக சட்டப்பேரவையின் பட்ஜெட் கூட்டத்தொடரை - நகர்மன்றத் தலைவர் மற்றும் உறுப்பினர்கள் நேரடியாக கண்டனர்.

தமிழக அரசின் கூடுதல் தலைமைச் செயலாளர் மற்றும் நகராட்சி நிர்வாகம் மற்றும் குடிநீர் விநியோகத் துறையின் முதன்மை செயலாளரான ஷீலா பாலகிருஷ்ணன் அலுவலகத்தில் - நகர்மன்றத் தலைவர் மற்றும் அனைத்து உறுப்பினர்களும் கையெழுத்திட்ட மனுவினை வழங்கினர்.

மேலும் காயல்பட்டினம் அரசு மருத்துவனைக்கு பெண் மருத்துவர் (DGO) தேவைக்குறித்த மனுவினையும் தமிழக அரசின் மக்கள் நல்வாழ்வுத்துறை அமைச்சர் டாக்டர் வி.எஸ்.விஜய் அலுவலகத்தில் வழங்கினர்.

உறுப்பினர்கள் விஜயத்திற்கான ஏற்பாடுகளை செய்ய நகர்மன்றத் தலைவர் கடந்த மாதம் 21 ம் தேதி சென்னை வந்திருந்தார். மூன்று நாட்கள் சென்னையில் இருந்த நகர்மன்றத் தலைவர் மற்றும் உறுப்பினர்கள் - சென்னை பாலவாக்கத்தில் உள்ள நகர்மன்றத் தலைவரின் கணவர் எம்.எம். சேக் அப்துல் காதரின் குடும்ப இல்லத்தில் தங்கியிருந்தனர்.

ஏப்ரல் 3 (செவ்வாய்) அன்று மாலை சென்னையில் இருந்து புறப்பட்டு ஏப்ரல் 4 (புதன்) அன்று காயல்பட்டினம் திரும்பினர்.