{ முகநூல் கருத்துக்கள்}{ட்விட்டர் கருத்துக்கள்}

ஹஜ் பெருநாளையொட்டி பெருநாளன்றும், அதற்கடுத்த - அய்யாமுத் தஷ்ரீக் என்றழைக்கப்படும் மூன்று நாட்களிலும், ஆடு, மாடு, ஒட்டகம் உள்ளிட்டவற்றை அறுத்துப்பலியிடுவது இஸ்லாம் வலியுறுத்திய ஒரு கிரியையாகும்.

ஆட்டுக்கு ஒருவரும், மாடு மற்றும் ஒட்டகத்திற்கு ஏழு பேரும் பங்குதாரர்களாக இருக்கலாம். அறுக்கப்படும் அப்பிராணிகளின் இறைச்சியை குடும்பத் தேவைக்கு எடுத்துக்கொண்டது போக, உற்றார் - உறவினருக்கும், ஏழை - எளியோருக்கும் அன்பளிப்பாக வழங்கப்படுவது வழமை.

அந்த அடிப்படையில், காயல்பட்டினம் நகரின் பள்ளிவாசல்கள் மற்றும் பொதுநல அமைப்புகள் சார்பாக, கூட்டு முறையில் உள்ஹிய்யா கொடுப்பதற்கான ஏற்பாடுகள் நடைபெற்று வருகிறது.

அதன் ஒரு பகுதியாக, காயல்பட்டினம் இத்திஹாதுல் இக்வானில் முஸ்லிமீன் - இஸ்லாமிய சகோதரத்துவ இணையம் (ஐ.ஐ.எம்.) சார்பாக கூட்டு முறையில் உள்ஹிய்யா கொடுக்க ஏற்பாடுகள் செய்யப்பட்டு வருகிறது.

இதற்கான ஆலோசனைக் கூட்டம் 02.10.2011 அன்று இரவு 08.00 மணிக்கு ஐ.ஐ.எம். வளாகத்தில், ஐ.ஐ.எம். குழும நிறுவனங்களின் தலைவர் எஸ்.ஓ.அபுல் ஹஸன் கலாமீ தலைமையில் நடைபெற்றது. ஹிஜ்ரீ 1432ஆம் ஆண்டில் செய்து முடிக்கப்பட்டுள்ள செயல்திட்டங்களான ரமழான் குர்ஆன் வகுப்பு, ரமழான் கஞ்சி ஏற்பாடுகள், ஃபித்ரா அரிசி உள்ளிட்டவற்றுக்கான வரவு-செலவு கணக்கறிக்கை தாக்கல் செய்யப்பட்டு, கூட்டத்தின் ஒருமனதான ஒப்புதல் பெறப்பட்டது.



அத்துடன், ஐ.ஐ.எம். சார்பில் நடத்தப்படும் உள்ஹிய்யா திட்டத்தின் கீழ், மாடு பங்கு ஒன்றுக்கு ரூ.1,500/- என தொகை நிர்ணயிக்கப்பட்டுள்ளது. பங்கு சேர விரும்புவோர், எம்.என்.எம்.ஐ.மக்கீ (கைபேசி எண்: +91 99941 29230) என்பவரைத் தொடர்புகொண்டு விபரங்களைக் கேட்டறியலாம் எனவும், பெயர் பதிவுக்கு, உரிய பங்குத் தொகையுடன் மேற்படி பொறுப்பாளர்களை நேரில் அணுகி உறுதி செய்துகொள்ளலாம் எனவும் ஐ.ஐ.எம். நிர்வாகம் சார்பில் தெரிவிக்கப்பட்டுள்ளது.

இக்கூட்டத்தில், ஐ.ஐ.எம். உறுப்பினர்கள் கலந்துகொண்டனர்.