{ முகநூல் கருத்துக்கள்}{ட்விட்டர் கருத்துக்கள்}

29.12.2011 அன்று மூன் டிவி சார்பில் கீழக்கரையில் நடத்தப்பட்ட மாநில அளவிலான - மறைகுர்ஆன் மனனப் போட்டியில், காயல்பட்டினம் அல்ஜாமிஉல் அஸ்ஹர் ஜும்ஆ மஸ்ஜித் நிர்வாகத்தால் நடத்தப்பட்டு வரும் அல்ஜாமிஉல் அஸ்ஹர் திருக்குர்ஆன் மனனப் பயிலக மாணவர் ஹாஃபிழ் கே.எஸ்.முஃபீஸுர்ரஹ்மான் முதலிடம் பெற்று சாதனை புரிந்துள்ளார்.

இம்மாணவர் தனது ஹிஃப்ழு பயிற்சியை முடித்துவிட்டு, காயல்பட்டினம் எல்.கே.மேனிலைப்பள்ளியில் படிப்பைத் தொடர்ந்து, தற்போது 11ஆம் வகுப்பு பயின்று வருகிறார். தம் பள்ளியில் பயிலும் இம்மாணவரின் மாநிலந்தழுவிய சாதனையைப் பாராட்டி, பள்ளி நிர்வாகத்தின் சார்பில் இன்று காலை 09.15 மணிக்கு நடைபெற்ற மாணவர் ஒன்றுகூடலின்போது சிறுநிகழ்ச்சி நடத்தப்பட்டது.

பள்ளியின் கலையரங்க மேடையில் நடைபெற்ற இந்நிகழ்ச்சிக்கு, ஹாஜி ஏ.எஸ்.ஜமால் முஹம்மத் என்ற ஜமால் மாமா தலைமை தாங்கினார். பள்ளி தலைமையாசிரியர் எம்.ஏ.முஹம்மத் ஹனீஃபா, நிர்வாகக் குழு உறுப்பினர்கள் ஹாஜி எச்.எம்.ஷேக், எல்.டி.இப்றாஹீம், அல்ஜாமிஉல் அஸ்ஹர் ஜும்ஆ மஸ்ஜித் தலைவர் ஹாஜி எஸ்.ஐ.தஸ்தகீர் ஆகியோர் இந்நிகழ்ச்சியில் முன்னிலை வகித்தனர்.



மாணவர் ஹாஃபிழ் கே.எஸ்.முஃபீஸுர்ரஹ்மான், மூன் டிவி நடத்திய கிராஅத் போட்டியில் படிப்படியாக முன்னேறி, இறுதிச்சுற்றில் வென்ற நிகழ்வு வரை அனைத்து நிகழ்வுகளும் அனைத்து மாணவர்களுக்கும் தெரிவிக்கப்பட்டது.

விழாவின் இறுதியில், சாதனை மாணவருக்கு பள்ளியின் சார்பில் ரூபாய் ஐந்தாயிரம் பணப்பரிசு வழங்கப்பட்டது.



தகவல் & படங்கள்:
M.ஜஹாங்கீர்,
காயல்பட்டினம்.