{ முகநூல் கருத்துக்கள்}{ட்விட்டர் கருத்துக்கள்}

இந்திய நாட்டின் அனைத்துத் தரப்பு மக்களது பொருளாதார நிலை, அவர்கள் வசிக்கும் வீடுகள், வேலை, வருமானம், வெளி மாநிலத்தவர்கள் குறித்த விபரம், மாற்றுத் திறனாளிகள், வீடில்லாதோர் குறித்த தகவல்களை சேகரிக்கும் பொருட்டு, சமூக - பொருளாதார - சாதிவாரி கணக்கெடுப்பை நாடெங்கும் நடத்திட மத்திய அரசு உத்தரவிட்டுள்ளது. இக்கணக்கெடுப்பு, ஏப்ரல் 23ஆம் தேதி துவங்கி, 40 நாட்கள் நடைபெறவுள்ளது.

இக்கணக்கெடுப்பின்போது செய்ய வேண்டியவை குறித்து முஸ்லிம் சமுதாய பொதுமக்களுக்கு தூத்துக்குடி மாவட்ட இந்திய யூனியன் முஸ்லிம் லீக் சார்பில் வெளியிடப்பட்டுள்ள அறிக்கை பின்வருமாறு:-

சமூக, பொருளாதார மற்றும் சாதிவாரி கணக்கெடுப்பு! முக்கிய வேண்டுகோள்!!

அன்புடையீர் அஸ்ஸலாமு அலைக்கும் (வரஹ்)

சமூக, பொருளாதார மற்றும் சாதிவாரி கணக்கெடுப்பு நடத்த மத்திய அரசு உத்தரவிட்டுள்ளது. அனைத்துத் தரப்பு மக்களின் பொருளாதார நிலை, அவர்கள் வசிக்கும் வீடுகள், வேலை, வருமானம், வெளி மாநிலத்தவர்கள் குறித்த விவரம், மாற்றுத் திறனாளிகள், வீடு இல்லாத நபர்கள் குறித்த தகவல்களை சேகரிக்க இந்தக் கணக்கெடுப்பு 2012 ஏப்ரல் 23ஆம் தேதி தொடங்கி 40 நாட்கள் தமிழகத்தில் நடைபெறுகிறது.

இந்த கணக்கெடுப்பில் பெயர், வயது, சாதி, வருமானம், தொழில், வேலை வாய்ப்பு உள்ளிட்ட 24 கேள்விகள் கேட்கப்பட்டு அவற்றுக்கான பதில்கள் கணினியில் உடனுக்குடன் பதிவு செய்யப்படும். பின்பு இதன் நகலை எடுத்து, குடும்பத் தலைவரிடம் கையெப்பம் பெறப்படும்.

800 வீடுகளுக்கு கணக்கெடுப்பாளர் ஒருவரும், கணினி ஆபரேட்டர் ஒருவரும் நியமனம் செய்யப்பட்டுள்ளனர்.

இவர்கள் வீடு வீடாகச் சென்று விவரங்களை சேகரிப்பர். அவை உடனடியாக கணினியில் பதிவு செய்யப்படும்.

பின்னர் வீட்டு உரிமையாளர்களுக்கு ஒரு அடையாளச் சீட்டு வழங்குவதுடன் கதவில் ஒரு ஸ்டிக்கரும் ஒட்டப்படும்.

கல்வி-வேலை வாய்ப்பில் இட ஒதுக்கீடு கேட்டு அதன் பலனை சமுதாயம் முழுமையாக அனுபவிக்க இந்த கணக்கெடுப்பு அவசியப்படும் என்பதால் இதை முஸ்லிம் சமுதாயம் அலட்சியப்படுத்தி விடக்கூடாது.

இஸ்லாத்தில் சாதிய பிரிவுகள் இல்லையெனினும், தமிழகத்தில் முஸ்லிம்களை - லெப்பை, (தமிழ்-உருது பேசக்கூடிய ராவுத்தர், மரைக்காயர்) தக்னி, (உர்து பேசுவோர்) தூதே குலா, (தெலுங்கு பேசுவோர்) மாப்பிள்ளா (மலையாளம் பேசுவோர்) அன்சர், ஷேக், சையத் என ஏழு பிரிவுகளாக அரசு வகைப்படுத்தியுள்ளது.

இதில், லெப்பை, தக்னி, தூதே குலா, மாப்பிள்ளா ஆகிய நான்கும் தேசிய அளவில் மத்திய அரசின் ஓ.பி.சி. பட்டியலில் இடம்பெற்றுள்ளன. இந்த நான்கில் ஒன்றை இடம்பெறச் செய்தால் மட்டுமே மத்திய-மாநில அரசுகளின் இட ஒதுக்கீட்டுச் சலுகையை பெற முடியும்.

எனவே நமது பகுதியில் கணக்கெடுக்க வரும்போது மதம் என்ற கேள்விக்கு இஸ்லாம் என்றும், சாதி என்ற கேள்விக்கு லெப்பை என்றும் பதிவு செய்ய வேண்டுகிறோம்.

இந்தப் பதிவின்போது, முஸ்லிம்களின் பெயர் தவறுதலின்றி - மிகச் சரியாக பதிவு செய்யப்பட தாங்களாகவே பெயரை எழுதிக் கொடுக்க வேண்டும். அல்லது, தவறாக எழுதப்படவில்லை என்பதை உறுதி செய்துகொள்ள வேண்டும். அத்துடன் எவர் பெயரும் விடுபடாமல் தங்கள் குடும்பத்தார் பெயர்களை சரியாக பதிவுசெய்யவும் வேண்டுகிறோம்.

இந்தக் கணக்கெடுப்பு முடிந்ததும், தங்களிடத்தில் அடையாள சீட்டு தரப்படுகிறதா? கதவில் ஸ்டிக்கர் ஒட்டப்பட்டுள்ளதா? என்பதில் கவனத்தோடு இருக்க வேண்டும்.

இதுபற்றி ஒவ்வொரு பள்ளிவாசல் மஹல்லா ஜமாஅத்திலும், பெண்கள் தைக்காக்களிலும் சமுதாய மக்கள் கூடும் இடங்களிலும் அறிவிப்பு செய்து விழிப்புணர்வோடு இந்த பதிவை முழு அளவில் மேற்கொள்ள வேண்டுமென அன்புடன் வேண்டுகிறோம்.

இவ்வாறு, தூத்துக்குடி மாவட்ட இந்திய யூனியன் முஸ்லிம் லீக் சார்பில் வெளியிடப்பட்டுள்ள அறிக்கையில் தெரிவிக்கப்பட்டுள்ளது.